ស្របពេលតម្លៃមាសបានកើនឡើងដល់កម្រិតខ្ពស់ជាប្រវត្តិសាស្ត្រមុនពេលធ្លាក់ចុះកាលពីសប្តាហ៍មុន សារព័ត៌មាន និងអ្នកសេដ្ឋកិច្ចក៏ដូចជាសាធារណជន បានសម្តែងការព្រួយបារម្ភចំពោះការមិនព្រមយកពន្ធលើការជួញដូរលោហៈដ៏មានតម្លៃមួយនេះ ដោយពួកគេភាគច្រើនចេះតែឆ្ងល់ថា ហេតុអ្វីបានជារដ្ឋាភិបាល មិនព្រមយកពន្ធលើការជួញដូរមាសដូចទ្រព្យសម្បត្តិដទៃទៀតដូចជាអចលនទ្រព្យ និងទីផ្សារមូលបត្រ?
ឆ្លើយតបនឹងចម្ងល់របស់មហាជននេះ លោក ជី បាននិយាយថា ក្រសួងហិរញ្ញវត្ថុកំពុងពិចារណាពីការយកពន្ធលើប្រតិបត្តិការជួញដូរមាសនេះហើយ ប៉ុន្តែមុននឹងធ្វើបែបនេះ ក្រសួងកំពុងសិក្សាពីផលប៉ះពាល់នៃការយកពន្ធមាសនេះ ឱ្យបានច្បាស់លាស់សិន មុនបញ្ជូនសំណើលើករណីនេះទៅឱ្យរដ្ឋាភិបាលថ្នាក់លើដើម្បីសម្រេចពីបញ្ហានេះ។
ក្រុមសេដ្ឋវិទូបានអំពាវនាវជាយូរមកហើយតាំងពីមុនពេលធនាគារកណ្ដាលវៀតណាម បានផ្តល់សិទ្ធិឱ្យនាំចូលមាសទៅកាន់ទីផ្សារវៀតណាម មកម្ល៉េះ ដោយពួកគេថា ការយកពន្ធលើប្រតិបត្តិការមាស គឺជារឿងចាំបាច់ ដើម្បីគ្រប់គ្រងតម្លៃមាសកុំឱ្យឡើងខ្លាំងពេក។
លោកស្រី ង្វៀន ធីមួយ (Nguyễn Thi Mùi) សមាជិកក្រុមប្រឹក្សាភិបាលគោលនយោបាយរូបិយវត្ថុជាតិ បានណែនាំឱ្យធនាគារកណ្ដាលវៀតណាម និងក្រសួងហិរញ្ញវត្ថុ ចាប់ផ្តើមបង្កើតគោលនយោបាយពន្ធសម្រាប់ប្រតិបត្តិការជួញដូរមាស។
សម្រាប់មន្ត្រីជាន់ខ្ពស់រូបនេះ ពន្ធមាសអាចជួយកាត់បន្ថយតម្រូវការមាសក្នុងចំណោមវិនិយោគិនមួយចំនួន ជាពិសេសអ្នកទិញមាសទុកចំណេញនាពេលអនាគតតែម្ដង។ ពន្ធមាស ក៏អាចដើរតួជាមូលដ្ឋានគ្រឹះក្នុងការរក្សាបរិយាកាសធុរកិច្ចឱ្យមានភាពយុត្តិធម៌ និងនិរន្តរភាពយូរអង្វែងផងដែរ ព្រោះថា ពាណិជ្ជករអចលនទ្រព្យ និងទីផ្សារមូលបត្រ ក៏ត្រូវបង់ពន្ធលើប្រាក់ចំណូលផ្ទាល់ខ្លួនអីចឹងដែរ៕
