ក្រសួងហិរញ្ញវត្ថុវៀតណាម នឹងសិក្សាលទ្ធភាពលើការយកពន្ធ ចំពោះអ្នកដែលកាន់កាប់អចលនវត្ថុលើសពីមួយ

ប្រភពព័ត៌មាន VN Express ដែលបានស្រង់សម្ដីរបស់​ អនុរដ្ឋមន្ត្រីហិរញ្ញវត្ថុវៀតណាម លោក ង្វៀន ដុក ជី បានឲ្យដឹងថា ក្រសួងហិរញ្ញវត្ថុ គាំទ្រលើគោលនយោបាយពន្ធនេះ ដែលនឹងមានគោលដៅដាក់​លើបុគ្គលណា ដែលមានអចលនទ្រព្យ​លើសពីមួយ ដែលជាប្រភេទអចលនទ្រព្យទំនេរ មិនមាន​សកម្មភាពអភិវឌ្ឍ ឬប្រតិបត្តិការប្រើប្រាស់។

លោក ង្វៀន ដុក ជី បន្ថែមថា «ក្រសួងនឹងពិចារណា និងស្រាវជ្រាវ គោលនយោបាយ ដើម្បី​កែលម្អតម្លាភាព​ទីផ្សារអចលនទ្រព្យ។» ទោះយ៉ាងណា​ លោកថា គោលដៅនេះ នឹងមិនអាចសម្រេច​ទៅបាន​​តាមរយៈគោលនយោបាយពន្ធតែឯងនោះទេ ពោលគឺ​ចាំបាច់ត្រូវមានផែនការ និងបទប្បញ្ញត្តិ​ទាក់ទងនឹងដីធ្លីផងដែរ។

គោលដៅកំណត់ពន្ធនេះ ត្រវបាន​ស្នើទៅកាន់រដ្ឋាភិបាល ដោយក្រសួងសំណង់ ចំពេលដែលទីផ្សារ​អចលនទ្រព្យ​មានការឡើងថ្លៃខ្ពស់កប់ពពក។ តួយ៉ាង ដីឡូតិ៍ជាយក្រុង ក្នុងតំបន់មួយចំនួន ត្រូវបាន​លក់ក្នុងតម្លៃជាង ៤ពាន់ដុល្លារអាមេរិក ក្នុងមួយម៉ែត្រការ៉េឯណោះ។

សមបញ្ជាក់ថា សមាគមឈ្មួញកណ្ដាលអចលនវត្ថុវៀតណាម ក៏ធ្លាប់បានស្នើឲ្យមានការយកពន្ធ​ស្រដៀងគ្នានេះដែរ។