ក្រុមហ៊ុនបច្ចេកវិទ្យាយក្សរបស់សហរដ្ឋអាម៉េរិកមួយនេះបានផ្តល់ការងារដល់មនុស្ស១ម៉ឺន២ពាន់នាក់រួចហើយនៅក្នុងប្រទេសអ៊ីស្រាអែល ហើយបានវិនិយោគជាង៥០ពាន់លានដុល្លារនៅក្នុងប្រទេសនេះក្នុងរយៈពេល៥០ឆ្នាំចុងក្រោយនេះ។
ពេលនេះក្រុមហ៊ុន Intel ចង់ពង្រីករោងចក្រផលិតបន្ទះឈីបដែលមានស្រាប់របស់ខ្លួននៅក្នុងទីក្រុងកៀយ៉ាត ហ្គាត (Kiryat Gat) ដែលស្ថិតនៅចម្ងាយប្រមាណ២៦គីឡូម៉ែត្រ ភាគឦសាននៃតំបន់ហ្គាហ្សា (Gaza) ប៉ុន្តែត្រូវបានអាក់ខានដោយសារការវាយប្រហារកាលពីថ្ងៃទី៧ ខែតុលា និងសង្រ្គាម ដែលកំពុងបន្តរវាងអ៊ីស្រាអែល និងក្រុមហាម៉ាស។
រដ្ឋមន្ត្រីក្រសួងហិរញ្ញវត្ថុរបស់អ៊ីស្រាអែល លោក បេហ្សាលែល ស្មូទ្រិច (Bezalel Smotrich) បានសរសេរសារបង្ហោះលើបណ្ដាញទំនាក់ទំនងសង្គម X កាលពីថ្ងៃអង្គារដើមសប្ដាហ៍នេះថា ក្រុមហ៊ុន Intel បានជ្រើសរើសអនុម័តការវិនិយោគ ដែលមិនធ្លាប់មានពីមុនមកក្នុងទំហំ២៥ពាន់លានដុល្លារ ដើម្បីបង្កើតរោងចក្រថ្មីរបស់ខ្លួននៅក្នុងប្រទេសអ៊ីស្រាអែល។
លោកបានបន្ថែមថា ការវិនិយោគនេះសន្យាថា នឹងលើកកម្ពស់ឱកាសការងារ ដែលមានគុណភាពខ្ពស់ជាមួយនឹងផលិតភាពខ្ពស់នៅតាមតំបន់ដាច់ស្រយាល ហើយនឹងរួមចំណែកយ៉ាងសំខាន់ដល់កំណើនសេដ្ឋកិច្ចអ៊ីស្រាអែល។ លោក ណេតាន់យ៉ាហ៊ូ បានប្រកាសគម្រោងរោងចក្រថ្មីនេះជាលើកដំបូងកាលពីខែមិថុនា ដោយចាត់ទុកថា វាជាការវិនិយោគដ៏ធំបំផុតមិនធ្លាប់មានដោយក្រុមហ៊ុនអន្តរជាតិនៅអ៊ីស្រាអែល។
ទោះជាយ៉ាងណា នៅពេលនោះក្រុមហ៊ុន Intel មិនបានបញ្ជាក់ពីការវិនិយោគថ្មីនេះទេ ដោយគ្រាន់តែលើកឡើងថា ប្រតិបត្តិការរបស់ខ្លួននៅក្នុងប្រទេសអ៊ីស្រាអែល មានសារសំខាន់ណាស់ចំពោះភាពជោគជ័យរបស់ក្រុមហ៊ុន ហើយថា ផែនការពង្រីកប្រតិបត្តិការនឹងធ្វើឡើងដើម្បីបំពេញតម្រូវការផលិតកម្មនាពេលអនាគត។ ហើយទើបតែថ្ងៃអង្គារ ដើមសប្ដាហ៍នេះទេដែលក្រុមហ៊ុននេះ Intel បានបញ្ជាក់ពីផែនកាវិនិយោគនេះ៕
ដោយ៖ សុវិទ្យា ហោ
