អ្នកនាំពាក្យសេតវិមានអាមេរិក លោកស្រី ចេន ផាសាគី បាននិយាយនៅក្នុងសន្និសីទសារព័ត៌មានមួយនៅសេតវិមានថា មន្ត្រីការទូត និងអ្នកមុខអ្នកការរបស់អាមេរិក មិនអាចចូលរួមតំណាងឲ្យប្រទេស ក្នុងព្រឹត្តិការណ៍កីឡាអូឡាំពិកក្នុងប្រទេសចិននៅឆ្នាំក្រោយនេះទេ ក្រោយអាមេរិកមើលឃើញថា ការបន្តរំលោភបំពានសិទ្ធិពលរដ្ឋអ៊ុយហ្គ័រក្នុងតំបន់ ស៊ីនជាំងប្រទេសចិននៅតែកើតមាន។ ដូចនេះសហរដ្ឋអាមេរិក និងធ្វើពហិការផ្នែកការទូត ក្នុងព្រឹត្តិការណ៍អូឡាំពិករដូវរងានៅឆ្នាំនេះ។
យ៉ាងណាមិញ អ្នកនាំពាក្យរូបនេះ បានបញ្ជាក់ហើយថា ក្រុមកីឡាករ កីឡាការិនី នឹងបន្តចូលរួមប្រកួតតាមធម្មតា ហើយអ្នកទាំងនោះនឹងទទួលបានការគាំទ្រពេញទំហឹង ពីរដ្ឋាភិបាលក្រុងវ៉ាស៊ីនតោន ពីចំងាយ។
នៅមុនការប្រកាសជាផ្លូវការរបស់សហរដ្ឋអាមេរិកកាលពីថ្ងៃច័ន្ទ ចិនទំនងជាបានដឹងពីបញ្ហានេះ ហើយបានចេញមកប្រកាសថា ទីក្រុងប៉េកាំងនឹងមានវិធានការណ៍ប្រឆាំងដាច់ខាត ចំពោះការចោទប្រកាន់នានា។ ប៉ុន្តែ ទីក្រុងប៉េកាំងមិនបានបញ្ជាក់ចំឈ្មោះថាចង់ប្រឆាំងភាគីមួយណានោះទេ ហើយក៏មិនបានបញ្ជាក់ថា ជាការប្រឆាំងបែបណានោះដែរ។
អត្ថបទគួរអាន
បន្ថែមពីលើនេះ ស្ថានទូតចិនប្រចាំនៅសហរដ្ឋអាមេរិក បានហៅការធ្វើពហិការការទូតនេះថា ជាឧបាយកលនយោបាយរបស់អាមេរិក ដោយសារតែចិន មិនបានអញ្ជើញអ្នកការទូតអាមេរិកណាម្នាក់ឲ្យមកចូលរួមព្រឹត្តិការណ៍នេះនោះទេ លើកលែងតែក្រុមការងារកីឡាករ។
អ្នកនាំពាក្យស្ថានទូតចិន ប្រចាំនៅអាមេរិកលោក លីវ ផេងយូ លើកឡើងថា៖ មែនទែនទៅ គ្មានអ្នកណាខ្វល់ថា អ្នកការទូតអាមេរិកមក ឬមិនមកនោះទេ ហើយទោះពួកគេមិនមក ក៏វាគ្មានឥទ្ធិពលអ្វីមកលើព្រឹត្តិការណ៍អូឡាំពិក ដែលនឹងធ្វើឡើងដោយជោគជ័យនោះដែរ។
គួរជម្រាបថា មិនមែនតែសហរដ្ឋអាមេរិកនោះទេ ដែលបានប្រកាសធ្វើពហិការ សូម្បីតែសម្ព័ន្ធមិត្តខ្លួន ដូចជាជប៉ុន ញូហ្សេលែន និងអូស្ត្រាលី ក៏បង្ហាញការរារែក មិនច្បាស់លាស់ក្នុងបញ្ជូនតំណាងរដ្ឋាភិបាលទៅចូលរួមព្រឹត្តិការណ៍កីឡានេះដូចគ្នាដែរ។
កន្លងមកក្នុងចំណោមប្រទេសធំៗ មានតែថ្នាក់ដឹកនាំប្រទេសរុស្សី លោក វ្លាឌីមៀរ ពូទីនប៉ុណ្ណោះដែលបាន ទទួលការអញ្ជើញឲ្យចូលរួម ពីក្រុងប៉េកាំង។
សូមជម្រាបថា ភាពប្រទាំងប្រទើសគ្នារវាងអាមេរិក និងចិនបានកើតឡើងជាថ្មី នៅមិនយូរប៉ុន្មានក្រោយមេដឹកនាំនៃប្រទេសទាំងពីរ បានជួបគ្នាពិភាក្សាគ្នាតាមប្រព័ន្ធអនឡាញ ដែលជាជំនួបដ៏កម្រមួយ។ ក្នុ្ងងនោះ បញ្ហាសិទ្ធិមនុស្សនៅស៊ីនជាំង ត្រូវបានអាមេរិកលើកមកដាក់លើតុពិភាក្សាជាមួយចិន តែត្រូវបានប៉េកាំងទាត់ចោល៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
