លោក ងួន ឡាយប្រធានសមាគមម្រេចកំពតបានលើកឡើង ម្រេចកំពតសព្វថ្ងៃបានផលិតលើសតម្រូវការទីផ្សារហើយ។ ចំណែក តម្លៃទៀតសោធ ក៏កំពុងតែធ្លាក់ចុះបណ្តើរៗដែរ ខណៈដែលប្រភេទម្រេចខ្លះមានតម្លៃនៅទ្រឹង។
លោកបានអំពាវនាវថា ដើម្បីសង្រ្គោះទីផ្សារម្រេច ខាងសមាគមម្រេចកំពត បាននិងកំពុងស្វែងរកចាប់ដៃគូថ្មីៗ បន្ថែមទៀត ដើម្បីពង្រីកទីផ្សារ ខណៈកាលពីឆ្នាំ២០១៦ និង២០១៧ មានក្រុមហ៊ុនវិចខ្ចប់កែច្នៃដើម្បីនាំចេញ មានចំនួន ២១ ក្រុមហ៊ុនប៉ុណ្ណោះ។ លោក ងួន ឡាយ អះអាងថា ជាផែនការនៅឆ្នាំ២០១៨ នេះសមាគមកំពុងតែបង្កើនដៃគូអ្នកនាំចេញកើនដល់៣១ ក្រុមហ៊ុន។
លោក ច័ន្ទ សុផល នាយកមជ្ឈមណ្ឌលសិក្សាគោលនយោបាយ និងជាអ្នកវិភាគសេដ្ឋកិច្ចកម្ពុជាបានអះអាងថា ទីផ្សារម្រេចនៅក្នុងអំឡុងពេលនេះមិនទាន់ចោទជាបញ្ហាទេ គ្រាន់តែតម្លៃម្រេចបានធ្លាក់ចុះបន្តិច តែនូវតែអាចទទួលយកបាន។
យ៉ាងណាដើម្បីបង្កើនទីផ្សារ និងរក្សាតម្លៃម្រេចឯកឧត្តម ម៉ៅ ថូរ៉ា រដ្ឋលេខធិកាក្រសួងពាណិជ្ជកម្ម បានគូសបញ្ជាក់ថា រាជរដ្ឋាភិបាលកម្ពុជាបាននិងកំពុងរៀបចំគោលនយោបាយម្រេចដ៏សមស្របមួយ សម្រាប់ជាត្រីវិស័យ ក្នុងការអភិវឌ្ឍវិស័យម្រេចកម្ពុជាឲ្យមានការរីកចម្រើនថែមទៀត។ ឯកឧត្តម បានកត់សម្គាល់ឃើញថា ទីផ្សារម្រេចកំពតមិនចោទជាបញ្ហាឡើយ។
ផ្អែកតាមការវាយតម្លៃពីក្រុមអ្នកជំនាញការជាតិ និងអន្តរជាតិ ស្ថានភាពអភិវឌ្ឍន៍របស់វិស័យម្រេចនៅកម្ពុជាគឺកំពុងចាប់ផ្តើមរីកលូតលាស់ ទោះកំពុងស្ថិតនៅក្នុងដំណាក់កាលដែលថ្លៃម្រេចប្រែប្រួលបន្តិចក៏ដោយ ប៉ុន្តែស្ថានភាពទីផ្សារម្រេចសកលបានបង្ហាញពីសញ្ញារឹងមាំល្អ ដែលនេះជាក្តីសង្ឃឹមសម្រាប់ផលិតករកម្ពុជា។
អត្ថបទទាក់ទង!
ឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្មបានលើកឡើងពីគោលជំហររបស់ខ្លួនថា រាជរដ្ឋាភិបាលកម្ពុជា តាមរយៈក្រសួងពាណិជ្ជកម្មកំពុងរៀបចំរចនាសម្ព័ន្ធដឹកនាំវិស័យម្រេច ជាមួយដៃគូអភិវឌ្ឍន៍ និងសង្ឃឹមថា នាឆ្នាំខាងមុខ វិស័យនេះ នឹងមានការរីកចម្រើនរឹងមំាប្រហាក់ប្រហែលវិស័យស្រូវ អង្ករ និងដំឡូងមីផងដែរ។
យោងតាមរបាយការណ៍ពីសមាគមម្រេចកំពត នៅឆ្នាំ២០១៧ កន្លងទៅ ទិន្នផលម្រេចកំពតប្រមូលបានសរុបជាង ១០០ តោន ពោលគឺច្រើនជាងឆ្នាំមុនៗដែលធ្លាប់មានជុំវិញ ៦០ទៅ៧០តោន។
យ៉ាងណាក៏ដោយចុះ ប្រធានសមាគមម្រេចកំពតលោក ងួន ឡាយ នៅតែព្យាករថា នៅឆ្នាំ២០១៨ នេះទិន្នផលម្រេចកំពតអាចប្រមូលបាន នឹងធ្លាក់មកនៅត្រឹម៧០តោនវិញហើយ ខណៈអាកាសធាតុមិនអំណោយផលដោយសារឡើងកំដៅខ្លាំង។ លោកថា នៅដើមឆ្នាំនេះម្រេចកំពតទើបប្រមូលបានជាង១៥ ភាគរយប៉ុណ្ណោះ គឺនៅតិចតួចខ្លាំងណាស់៕
គួរជម្រាបដែរ ការប្រែប្រួលនៃទីផ្សារម្រេចសកល បាននិងកំពុងធ្វើឲ្យប្រទេសដាំដុះម្រេចច្រើន កំពុងប្រឈមនឹងបញ្ហាទីផ្សារ។ តួយ៉ាង ប្រទេសវៀតណាម កាលពីពេលថ្មីៗនេះ បានប្រកាសថា នឹងធ្វើការកាត់បន្ថយផ្ទៃដីដាំដុះម្រេចរបស់ខ្លួន ប្រមាណ២៦% ពោលគឺនឹងកាត់បន្ថយពី ១៥ម៉ឺនហិកតា នាពេលបច្ចុប្បន្ន ឲ្យមកនៅត្រឹមតែ ១១ម៉ឺនហិកតាប៉ុណ្ណោះ នៅឆ្នាំខាងមុខនេះ ដើម្បីជាការឆ្លើយតបទៅនឹងការធ្លាក់ចុះនៃទីផ្សារម្រេចសកលលោក៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
