តើមានកត្តាអ្វីខ្លះ ដែលតែងតែធ្វើឱ្យកើតមានការរិះគន់លើការផ្តល់សំណងក្នុងវិស័យធានារ៉ាប់រង?

តែយ៉ាងណាយើងកត់សម្គាល់ឃើញថា កន្លងមកមានអ្នកទិញធានារ៉ាប់រងមួយចំនួនបានបង្ហោះសារ​លើបណ្តាញសង្គមរិះគន់ក្រុមហ៊ុនផ្តល់សេវាធានារ៉ាប់រងជុំវិញការផ្តល់សំណង ក្រោយពួកគេជួបគ្រោះថ្នាក់ផ្សេងៗ។ តើគួរមានការយល់ដឹងអ្វីខ្លះមុននឹងប្រើប្រាស់សេវាធានារ៉ាប់រង? តើមានកត្តាអ្វីដែលធ្វើឱ្យអថិតិជនរិះគន់ក្រុមហ៊ុនផ្តល់សេវាធានារ៉ាប់រងជុំវិញការផ្តល់សំណងពេលពួកគេជួបបញ្ហា ឬគ្រោះថ្នាក់ណាមួយ?

លោក ហ៊ុយ វ៉ាថារ៉ូ ប្រធានសមាគមធានារ៉ាប់រងកម្ពុជា កត់សម្គាល់ឃើញថា អតិថិជនមួយចំនួនមានការយល់ខុសពីការប្រើប្រាស់លើសេវាធានារ៉ាប់រង ដែលបានចុះកិច្ចព្រមព្រៀងជាមួយក្រុមហ៊ុនលើការការពារហានិភ័យ។ បើតាមអ្នកជំនាញរូបនេះ កិច្ចព្រមព្រៀងការពារដែលទទួលបាននូវប្រសិទ្ធភាពនឹងត្រូវអនុវត្តតែលើចំណុចដែលបានចែងក្នុងកិច្ចសន្យាប៉ុណ្ណោះ ប៉ុន្តែនៅពេលមានបញ្ហាកើតឡើង គឺអតិថិជនមួយចំនួនបានយកបញ្ហាផ្សេងមកបញ្ចូលក្នុងលក្ខខណ្ឌដែលមិនមាននៅក្នុងកិច្ចសន្យាទៅវិញ ដែលករណីនេះវាផ្ទុយពីកិច្ចព្រមព្រៀងដែលបានធ្វើឡើងរវាងអតិថិជនជាមួយក្រុមហ៊ុន ខណៈក្រុមហ៊ុនមានឆន្ទៈពិតប្រាកដក្នុងការស្វះស្វែងជួយដល់អតិថិជននៅពេលពួកគេជួបនឹងបញ្ហានានា។ បើតាមថ្នាក់ដឹកនាំសមាគមធានារ៉ាប់រងកម្ពុជារូបនេះ បច្ចុប្បន្នសមាគមនិងដៃគូពាក់ព័ន្ធកំពុងផ្សព្វផ្សាយពីសារប្រយោជន៍នៃវិស័យធានារ៉ាប់រងដើម្បីបញ្រ្ចាបការយល់ដឹងពីវិស័យធានារ៉ាប់រងដល់សាធារណជន។

ជុំវិញស្ថានភាពវិស័យធានារ៉ាប់រងនៅកម្ពុជា ត្រូវបានលោក ហ៊ុយ វ៉ាថារ៉ូ ព្យាករថា នៅតែជាវិស័យដែលមានសក្ដានុពល ស្របតាមស្ថានភាពសេដ្ឋកិច្ចរបស់កម្ពុជា ដែលត្រូវបានអ្នកសេដ្ឋវិទូពិភពលោកព្យាករថានឹងមានភាពវិជ្ជាមាននៅក្នុងឆ្នាំ២០២៤-២០២៥ ខណៈមានពលរដ្ឋជាច្រើនពុំទាន់បានប្រើប្រាស់សេវានេះនៅឡើយទេ។ ទោះបីមានការព្យាករថា វិស័យធានារ៉ាប់រងនៅតែជាវិស័យដែលមានសក្ដានុពលសម្រាប់កម្ពុជាក៏ដោយ តែសម្រាប់អ្នកជំនាញរូបនេះ វិស័យមួយនេះនៅតែមានបញ្ហាប្រឈមខ្លះដូចជា ចំណេះដឹងពីអត្ថប្រយោជន៍នៃវិស័យធានារ៉ាប់រងជាសាធារណៈ និងតម្រូវការធនធានមនុស្សដែលកំពុងមានការកើនឡើងនៅតែមានកម្រិតនៅឡើយ។

យោងតាមទិន្នន័យពីសមាគមធានារ៉ាប់រងកម្ពុជា គិតត្រឹមរយៈពេល៩ខែ ក្នុងឆ្នាំ២០២៣ វិស័យធានារ៉ាប់រងនៅកម្ពុជា កើនឡើងជាង៤% បើធៀបទៅនឹងរយៈពេលដូចគ្នាកាលពីឆ្នាំ២០២២ ជាមួយទំហំបុព្វលាភសរុបជាង២៦៦លានដុល្លារ។ បើតាមទិន្ន័យដដែលនេះ ទំហំបុព្វលាភនេះ ត្រូវបានរួមចំណែកដោយទីផ្សារធានារ៉ាប់រងអាយុជីវិតជាង៥៥% ធានារ៉ាប់រងទូទៅជាង៤២% និងធានារ៉ាប់រងខ្នាតតូចជាង២%។ នៅក្នុងរយៈពេល៩ខែឆ្នាំ២០២៣នេះដែរ អ្នកទិញធានារ៉ាប់រងអាយុជីវិតមានទំហំបុព្វលាភជាង១១៣លានដុល្លារអាម៉េរិក កើនឡើង១០% ខណៈអ្នកទិញធានារ៉ាប់រងទូទៅមានទំហំជាង១៤៧លានដុល្លារ ធ្លាក់ចុះជិត១% និងធានារ៉ាប់រងខ្នាតតូចមានទំហំជាង៥លានដុល្លារកើនឡើងជាង២៧%៕

អត្ថបទ៖ បូ ដូឡា​