ស្ថានភាពនៃអ្នកជាប់បំណុលធនាគារនានានៅក្នុងប្រទេសថៃ កំពុងតែស្ថិតនៅក្នុងស្ថានភាពដ៏ផុយស្រួយបំផុត

អ្នកជាប់បំណុលធនាគារនៅក្នុងប្រទេសថៃ បានឈរនៅលើចំណាត់ថ្នាក់កំពូលហើយពេលនេះត្រូវបានគេចាត់ទុកថា ជាកូនបំណុលធនាគារដែលមានស្ថានភាពផុយស្រួយបំផុតបើធៀបនឹងប្រទេសផ្សេងទៀត​។ នេះបើតាមសេចក្តីរាយការណ៍របស់សារព័ត៌មានបាងកកប៉ុស្តិ៍ ។

ទិន្នន័យទីភ្នាក់ងារវាយតម្លៃឥណទានដែលសារព័ត៌មានថៃនេះបានដកស្រង់បង្ហាញថា កូនបំណុលធនាគារនៅថៃ ដែលធ្លាក់ខ្លួនចូលក្នុងវិធានការជំនួយបំណុលរបស់ធនាគារកណ្តាលមានចំនួនរហូតដល់ ១១% នៃកូនបំណុលសរុប ដែលនេះជាចំនួនច្រើនបំផុតបើធៀបនឹង ស្ថិតិនៅក្នុងប្រទេសឥណ្ឌូនេស៊ី ម៉ាឡេស៊ី ឥណ្ឌា និងចិន ដែលស្ថិតនៅក្នុងចន្លោះពី ១% ទៅ៥% ។

ពាក់ព័ន្ធនឹងបញ្ហានេះ លោកស្រី ស៊ូវាន់នី ជេតសាដាសាក់ (Suwannee Jatsadasak ) ឧបការីទេសាភិបាលធនាគារកណ្តាលថៃ បាននិយាយថា សមាមាត្រនៃកូនបំណុលដែលត្រូវការជំនួយពីធនាគារកណ្តាលនៅក្នុងប្រទេសអូស្ត្រាលី និងនូវែលសេឡង់គឺ ១% ។

លោកស្រីបានមានប្រសាសន៍ថា អត្រាបំណុលគ្រួសារធៀបនឹងអត្រាផលិតផលនៅក្នុងស្រុក របស់ប្រទេសថៃ បានកើនឡើងដល់កម្រិតជិត ៩១% នៅក្នុងត្រីមាសទី៤នៃឆ្នាំ២០២៣ ដោយសារតែកំណើននៃប្រាក់កម្ចី ខ្ពស់ជាងកំណើនសេដ្ឋកិច្ចថៃ ។

លោកស្រីឧបការីទេសាភិបាលធនាគារកណ្តាលថៃ បានបន្តថា នៅក្នុងរយៈពេលដដែលនេះ អត្រាឥណទានមិនដំណើរការជារួមក៏នៅតែខ្ពស់ពោលគឺប្រមាណជា ២,៦៦% ទោះបីជាវាថយបន្តិចពី ២,៧%ក៏ដោយចុះ ប៉ុន្តែ អត្រាឥណទានមិនដំណើរការលើកម្ចីទិញផ្ទះកើនដល់ ៣,៣២% ខ្ពស់ជាងត្រីមាសមុន ។

ស្ថិតនៅក្នុងស្ថានភាពនេះលោកស្រីបាននិយាយថា ធនាគារកណ្តាលថៃនឹងធ្វើការពិភាក្សាជាមួយក្រុមប្រឹក្សាអភិវឌ្ឍន៍សេដ្ឋកិច្ចនិងសង្គម បន្ទាប់ពីទីភ្នាក់ងារផែនការរដ្ឋបានស្នើសុំឱ្យធនាគារកណ្តាលកាត់បន្ថយអត្រាការប្រាក់អប្បបរមានៃបំណុលកាតឥណទានមកត្រឹម ៥% ខណៈដែលកម្រិតបច្ចុប្បន្នគឺ៨% ៕

ដោយៈ សរ សុជាតិ