ឥទ្ធិពលសេដ្ឋកិច្ចឆ្នាំនេះ នៅតែបន្តផលប៉ះពាល់នៃអតិផរណាលើពលរដ្ឋអាម៉េរិក

ដើម្បីឱ្យអតិផរណាស្ថិតក្រោមការគ្រប់គ្រងបាន ធនាគារកណ្តាលសហរដ្ឋអាម៉េរិក បានសម្រេចដំឡើងអត្រាការប្រាក់ចំនួន១១ដង ក្នុងរយៈពេលពេញមួយឆ្នាំ២០២៣ ហើយមកដល់ពេលនេះ ទោះបីស្ថានភាពមានភាពវិជ្ជមានបន្តិចមែន ប៉ុន្តែស្ថិតនៅក្នុងស្ថានភាពនៃការស្ទាបស្ទង់ ហើយក៏មានការលេចលឺនូវការព្រួយបារម្ភអំពីបញ្ហាអតិផរណានេះបន្តដដែល។

តាមសេចក្តីរាយការណ៍របស់សារព័ត៌មានធំៗ សម្ពាធតម្លៃទំនិញនៅក្នុងប្រទេសមហាអំណាចលេខ១លើពិភពលោកនេះ អាចនឹងបន្តអូសបន្លាយបន្ថែមទៀត បើទោះបីជាអតិផរណាបានធ្លាក់ចុះជាបន្តបន្ទាប់ ក្រោយហក់ឡើងដល់កម្រិតកំពូល៩,១% កាលពីខែមិថុនា ឆ្នាំ២០២២ ក៏ដោយ។

ពលរដ្ឋអាម៉េរិកម្នាក់បានប្រាប់សារព័ត៌មានថា ពួកគេកំពុងតែប្រឈមនឹងវិបត្តិអតិផរណាខ្លាំង ដោយ​សារតែពេលនេះ រាល់ការចំណាយសុទ្ធតែកើនឡើង ដោយរាប់ចាប់តាំងពីសកម្មភាព ដូចជាកីឡាឡើងទៅ។ យុវជនវ័យ២០ឆ្នាំម្នាក់បាននិយាយនៅពេលដែលរូបគេកំពុងតែដើរទិញទំនិញថា តម្លៃទំនិញនៅអាម៉េរិកឡើងថ្លៃគ្រប់យ៉ាងរាប់តាំងពីគ្រឿងទេសឡើងទៅ ដូច្នេះពលរដ្ឋមិនអាចចេះតែចាយ និងចេះតែធ្វើសកម្មភាពនេះសកម្មភាពនោះបានច្រើនដូចធម្មតាបានឡើយ ដោយសារតែតម្លៃ នៃការចំណាយគឺកាន់តែខ្ពស់។

លោក អ ជេ ហូតូវី (R.J. Hottovy) ប្រធានផ្នែកស្រាវជ្រាវ និងវិភាគនៅក្រុមហ៊ុន Placer.ai បានឲ្យដឹងថា ដោយសារតែបញ្ហានេះបានធ្វើឲ្យពលរដ្ឋអាម៉េរិកត្រូវបង្ខំចិត្តរិតត្បិតការចំណាយ ប្រសិនបើបញ្ហានេះនៅតែអូសបន្លាយ នោះនឹងមានភោជណីយដ្ឋានមួយចំនួនអាចក្លាយជាកន្លែងលក់គ្រឿងទេស។ លោកបានបន្តថា នៅពេលនេះធនាគារកណ្តាលអាម៉េរិកកំពុងខិតខំធ្វើឱ្យកម្រិតនៃអតិផរណាស្ថិតក្រោមការគ្រប់គ្រង ហើយក៏ប្រឹងប្រែង ដើម្បីធ្វើយ៉ាងណាទម្លាក់អត្រាការប្រាក់ឱ្យស្ថិតក្នុងកម្រិតពី៥,២៥ ទៅ៥,៥ភាគរយ៕

ដោយៈ សរ សុជាតិ