សហភាពអឺរ៉ុបបានសន្យាផ្តល់ជំនួយចំនួន ១៧០ពាន់លានអាមេរិក ក្នុងកញ្ចប់ជំនួយអភិវឌ្ឍដល់ទ្វីបអាហ្វ្រិក ពេលអំឡុងសន្និសីទរយៈពេលពីរថ្ងៃ ដែលបាននាំយកមេដឹកនាំសហភាពអឺរ៉ុប និងសមភាគីអាហ្វ្រិកចំនួន ៤០ប្រទេសមកជួបប្រជុំគ្នាកាលពីសប្តាហ៍មុន។ យ៉ាងណាមិញ ការសន្យាផ្តល់ជំនួយអភិវឌ្ឍន៍នេះ មិនមែនជាជំនួយថ្មីសន្លាងនោះទេ។ ជំនួយទាំង១៧០ពាន់លានដុល្លារនេះស្ថិតក្នុងផ្នែកមួយ នៃកញ្ចប់ជំនួយដែលអឺរ៉ុបឲ្យឈ្មោះថា ច្រកទ្វារសកល ឬ Global Gateway ជាភាសាអង់គ្លេស។ Global Gateway មានកញ្ចប់ថវិកាចំណាយសរុបជាង ៣០០ពាន់លានដុល្លារ ក្នុងនោះទ្វីបអាហ្វ្រិកនឹងទទួលបានពាក់កណ្តាលនៃទឹកប្រាក់នេះ។
ត្រូវបានដាក់ចេញកាលពីចុងឆ្នាំ២០២១ Global Gateway ជាគំនិតផ្តួចផ្តើម ក្នុងក្របខ័ណ្ឌវិនិយោគ និងជំនួយ ហេដ្ឋារចនាសម្ព័ន្ធក្រៅប្រទេសថ្មីរបស់ អឺរ៉ុប ដើម្បីប្រកួតប្រជែងជាមួយនឹងគំនិតផ្តួចផ្តើមខ្សែក្រវាត់ និងផ្លូវរបស់ចិន។
យ៉ាងណាក៏ដោយ ជំនួយដែលអាហ្វ្រិកនឹងទទួលបាន ឆ្ពោះទៅរកគម្រោងជាច្រើនដូចជា គំនិតផ្តួចផ្តើមថាមពលបៃតង ជំនួយគ្រោះមហន្តរាយ និងការកែលម្អហេដ្ឋារចនាសម្ព័ន្ធសុខភាពសាធារណៈជាដើម។ ប៉ុន្តែវិស័យមួយទៀតដែលសហភាពអឺរ៉ុបផ្តោតជាពិសេសនោះគឺ ទូរគមនាគមន៍។
អត្ថបទគួរអាន
លោក Thierry Breton ស្នងការអឺរ៉ុបទទួលបន្ទុកទីផ្សារផ្ទៃក្នុងបានប្រាប់អ្នកយកព័ត៌មានថា ប្រព័ន្ធផ្កាយរណបល្បឿនលឿនរបស់ EU នឹងគ្របដណ្តប់លើទ្វីបអាហ្វ្រិកផងដែរ។ បណ្តាញនេះជំរុញការគ្របដណ្តប់ទូរគមនាគមន៍នៅក្នុងទ្វីបអាហ្វ្រិកទាំងមូល ដែលនឹងនាំទៅដល់ការអភិវឌ្ឍសេដ្ឋកិច្ច។
គួរជម្រាបថា ការដែលអឺរ៉ុបចង់បង្កើនការគ្របដណ្តប់ទូរគមនាគមន៍នៅអាហ្វ្រិកដូចនេះ ក៏ដោយសារតែ រដ្ឋាភិបាលផ្តាច់ការមួយចំនួននៅអាហ្វ្រិក បានរិតត្បិតការប្រើប្រាស់អ៊ីនធឺនេតលើពលរដ្ឋ។ ដូចនេះ មេដឹកនាំសហភាពអឺរ៉ុបសម្លឹងឃើញវិធីសាស្ត្រនេះ ដើម្បីបង្កើនតម្លៃប្រជាធិបតេយ្យ ដូចជាសេរីភាពនៃការបញ្ចេញមតិ ឲ្យស្របទៅនឹងជំនួយសេដ្ឋកិច្ច។
សូមបញ្ជាក់ថា ដើម្បីបន្តមានកិច្ចសហប្រតិបត្តិការ និងទំនាក់ទំនងល្អឡើងវិញរវាងគ្នាជាមួយនឹងអាហ្វ្រិក សហភាពអឺរ៉ុបកាលពីថ្ងៃទី ១៧-១៨ ខែកុម្ភៈ បានបើកជំនួបកំពូលស្វាគមន៍មេដឹកនាំអាហ្វ្រិក៤០ប្រទេស នាទីក្រុងព្រុចសែល ប្រទេសបែលហ្សិក។ ជំនួបកំពូលនេះ ធ្វើឡើងដើម្បីប្រាប់ទៅមេដឹកនាំអាហ្វ្រិកថា អឺរ៉ុបនៅតែយកចិត្តទុកដាក់នឹងទ្វីបមួយនេះ ស្របពេលដែលអឺរ៉ុបក៏ចង់ធានាឲ្យបានដែរថា ឥទ្ធិពលរបស់ខ្លួនមិនត្រូវធ្លាក់ចុះក្រោមឥទ្ធិពលរបស់ចិន និងរុស្សីនៅក្នុងតំបន់ឡើយ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
