ការបង្ហាញពីការពឹងពាក់គ្នាទៅវិញទៅមកនេះ ធ្វើឡើងនៅក្នុងកិច្ចសន្ទនាសេដ្ឋកិច្ច និងហិរញ្ញវត្ថុ ចិន-បារាំងកាលពីចុងសប្ដាហ៍មុននេះ។
រដ្ឋមន្ត្រីហិរញ្ញវត្ថុបារាំងលោក ព្រុយណូ ឡឺមែរ (Bruno Le Maire) បានជួបជាមួយឧបនាយករដ្ឋមន្ត្រីចិនលោក ហេ លីហ្វឹង (He Lifeng) និងមន្ត្រីចិនកំពូលៗមួយចំនួនទៀតកាលពីថ្ងៃសៅរ៍ ទី២៩ ខែកក្កដា សម្រាប់កិច្ចពិភាក្សាស្ដីពីការស្ថាបនាពាណិជ្ជកម្មទ្វេភាគី។ ក្រោយពីកិច្ចប្រជុំនេះហើយមួយថ្ងៃ លោក ឡឺមែរ និយាយថា បារាំងមិនចង់ប្រឈមមុខនឹងឧបសគ្គផ្នែកច្បាប់ ឬឧបសគ្គមួយចំនួនទៀត ក្នុងការចូលទៅកាន់ទីផ្សារចិននោះទេ។
លោក ឡឺមែរ បានបន្ថែមថា ជាការពិតណាស់ នេះហើយគឺជាចំណុចស្នូលនៃការពិភាក្សារបស់ប្រទេសបារាំង ហើយបារាំងចង់ទទួលបានការចូលទៅក្នុងទីផ្សាររបស់ចិនកាន់តែប្រសើរឡើង និងកាន់តែមានតុល្យភាពជាងមុន។
នៅក្នុងកិច្ចប្រជុំថ្ងៃដដែលនោះ លោក ហេ លីហ្វីង ឧបនាយករដ្ឋមន្ត្រីចិន បាននិយាយថា ប្រទេសចិនសង្ឃឹមថា បារាំងអាច «រក្សាស្ថិរភាព»នៃទំនាក់ទំនងសហភាពអឺរ៉ុប-ចិនខណៈដែលទីក្រុងប៉េកាំងមានឆន្ទៈក្នុងការធ្វើពង្រឹងកិច្ចសហប្រតិបត្តិការជាមួយទីក្រុងប៉ារីសក្នុងវិស័យមួយចំនួនដូចជា ហិរញ្ញវត្ថុព្រមទាំងវិទ្យាសាស្ត្រ និងនវានុវត្តន៍បច្ចេកវិទ្យា។ លោក បានបន្ថែមថា ប្រទេសចិនជឿថា ទំនាក់ទំនងទ្វេភាគីរបស់ចិននិងបារាំងមានមូលដ្ឋានគ្រឹះល្អមួយ។
អត្ថបទគួរអាន
មន្ត្រីអឺរ៉ុបបាននិយាយជារឿយៗថា ពួកគេមិនចង់ផ្ដាច់ខ្លួនចេញពីប្រទេសចិនទេ ប៉ុន្តែគឺគ្រាន់តែ«ចង់កាត់បន្ថយហានិភ័យ»នៅក្នុងការប្រឈមមុខទៅនឹងអ្វី ដែលក្រុមប្រទេសមានសេដ្ឋកិច្ចរីកចម្រើនទាំង៧ (ជី៧)ហៅថាជា«ការបង្ខិតបង្ខំសេដ្ឋកិច្ច»របស់ប្រទេសចិនតែប៉ុណ្ណោះ។
លោក ឡឺមែរ រដ្ឋមន្ត្រីហិរញ្ញវត្ថុបារាំង បាននិយាយថា ការកាត់បន្ថយហានិភ័យមិនមែនមានន័យថាប្រទេសចិនគឺជាហានិភ័យនោះទេ ប៉ុន្តែគឺមានន័យថា អឺរ៉ុបចង់បានឯករាជ្យជាងមុន និងមិនចង់ប្រឈមមុខនឹងហានិភ័យណាមួយ នៅក្នុងខ្សែចង្វាក់ផ្គត់ផ្គង់របស់ពួកគេឡើយប្រសិនបើមានវិបត្តិថ្មីណាមួយកើតឡើង ដូចជាជំងឺកូវីដ១៩ជាដើម ដែលធ្វើឱ្យខូចទាំងស្រុងនូវខ្សែចង្វាក់តម្លៃមួយចំនួន។
ប្រទេសចិនគឺជាដៃគូពាណិជ្ជកម្មដ៏ធំបំផុតទី៣របស់បារាំងប៉ុន្តែ ក្រុមហ៊ុនបារាំងមួយចំនួនមានការព្រួយបារម្ភកាន់តែខ្លាំងឡើងថា ពួកគេអាចជាប់នៅក្នុងស្ថានភាពនៃការប្រកួតប្រជែងគ្នាកាន់តែខ្លាំងឡើងរវាងទីក្រុងវ៉ាស៊ីនតោន និងទីក្រុងប៉េកាំង ដែលជាមហាអំណាចសេដ្ឋកិច្ចពិភពលោកទាំង២។
លោក ហេ លីហ្វេង ឧបនាយករដ្ឋមន្ត្រីចិន បានអះអាងដែរថា កិច្ចសន្ទនារវាងចិន និងបារាំងនេះ ជា "សញ្ញាវិជ្ជមាន ដែលថាប្រទេសចិន និងបារាំងនឹងធ្វើការរួមគ្នា ដើម្បីដោះស្រាយបញ្ហាប្រឈមនិងបញ្ចូលស្ថេរភាពទៅក្នុងពិភពលោកដែលមិនច្បាស់លាស់" ខណៈដែលស្ថានភាពមិនច្បាស់លាស់នេះ កំពុងវិវត្តយ៉ាងលឿនទៅរកអស្ថិរភាព និងភាពមិនប្រាកដប្រជា ដែលគេមិនធ្លាប់បានឃើញក្នុងរយៈពេល ១០០ ឆ្នាំកន្លងមកនេះ៕ .
អត្ថបទ៖ សុខ ជា
