នៅក្នុងសេចក្តីថ្លែងការណ៍មួយចេញដោយការិយាល័យទទួលបន្ទុកកិច្ចការតៃវ៉ាន់របស់ប្រទេសចិន បានអះអាងថា ទីក្រុងប៉េកាំងជំទាស់ដាច់ខាតចំពោះជំនួយយោធាថ្មីសម្រាប់កោះតៃវ៉ាន់ ដែលជាដែនដីប្រវត្តិសាស្ត្ររបស់ប្រទេសចិន។ លោក Chen Binhua អ្នកនាំពាក្យការិយាល័យនេះ បានថ្លែងដូច្នេះថា «មិនថាជនជាតិតៃវ៉ាន់ចំណាយលើការបង់ពន្ធប៉ុន្មានទេ មិនថាក្រុមបំបែកខ្លួនតៃវ៉ាន់ចំណាយប៉ុនណាទេ ឬមានសព្វាវុធអាមេរិកច្រើនយ៉ាងណាក្តី វាមិនបានធ្វើឱ្យញាប់ញ័រចំពោះឆន្ទៈដ៏រឹងមាំរបស់ប្រទេសចិនក្នុងការបង្រួបបង្រួមតៃវ៉ាន់នោះឡើយ។ ។
លោកបានសង្កត់ធ្ងន់នៅក្នុងសេចក្តីថ្លែងការណ៍នោះថា សកម្មភាពរបស់អាមេរិកកំពុងប្រែក្លាយ «តៃវ៉ាន់ទៅជាឃ្លាំងគ្រាប់រំសេវ ដែលត្រៀមនឹងផ្ទុះបែកគ្រាប់ពេលវេលាទាំងអស់ ព្រមទាំងរុញច្រានស្ថានការកាន់តែស្ថិតទៅមាត់ជ្រោះនៃសង្គ្រាមនៅច្រកសមុទ្រតៃវ៉ាន់»។
គួរជម្រាបថា ប្រតិកម្មខ្លាំងៗរបស់ចិននេះ កើតឡើងមួយថ្ងៃប៉ុណ្ណោះ បន្ទាប់ពីសហរដ្ឋអាមេរិកកាលពីថ្ងៃទី២៩កក្កដា បានប្រកាសផ្តល់ជំនួយយោធាក្នុងទំហំទឹកប្រាក់ ៣៤៥លានដុល្លារបន្ថែមទៀត ដើម្បីឱ្យកោះប្រជាធិបតេយ្យមួយនេះ ពន្លឿនការពង្រឹងសមត្ថភាពការពារខ្លួន។ នៅក្នុងកញ្ចប់ជំនួយនោះរួមមាន ឧបករណ៍ស៊ើបការណ៍សម្ងាត់ ប្រព័ន្ធឃ្លាំមើល និងឈ្លបយកការណ៍ និងអាវុធធុនតូចផ្សេងទៀត។ សព្វាវុធទំនើបៗចុងក្រោយនេះ នឹងត្រូវបានដឹកជញ្ជូនលឿនជាងធម្មតា ព្រោះវាដកចេញឃ្លាំងអាវុធបំរុងផ្ទាល់របស់យោធាអាមេរិក។
អត្ថបទគួរអាន
ជាមួយគ្នានេះ ក្រសួងការពារជាតិតៃវ៉ាន់តាមរយៈអ្នកនាំពាក្យលោក Sun Li-fang បានអរគុណទីក្រុងវ៉ាស៊ីនតោនសម្រាប់ការប្តេជ្ញាចិត្តយ៉ាងម៉ឺងម៉ាត់ចំពោះសន្តិសុខរបស់តៃវ៉ាន់។ លោកថា ជំនួយទាំងនេះ គឺពិតជាសំខាន់ណាស់សម្រាប់ការពារខ្លួន ហើយតៃវ៉ាន់ និងសហរដ្ឋអាមេរិកនឹងបន្តធ្វើការជាមួយគ្នាជិតស្និទ្ធបែបនេះតទៅទៀត លើបញ្ហាសុវត្តិដើម្បីសន្តិភាព ស្ថិរភាព និងរក្សាឱ្យបាននូវ«ស្ថានការដើម»ក្នុងច្រកសមុទ្រតៃវ៉ាន់»។
ចូរកុំភ្លេចថា ប្រទេសចិនតាមរយៈប្រធានាធិបតីលោក ស៊ី ជីនពីង តែងតែចិញ្ចឹមចិត្តថាខ្លួនមានសិទ្ធិយកកោះតៃវ៉ាន់មកគ្រប់គ្រងបានគ្រប់ពេលទាំងអស់ ទោះបីជាត្រូវប្រើកម្លាំងទ័ពក្តី។ កាលពីឆ្នាំមុន យោធាចិនបានធ្វើសមយុទ្ធធំបំផុតមិនធ្លាប់មាននៅជុំវិញកោះតៃវ៉ាន់ ព្រមទាំងបិទច្រកសមុទ្រតៃវ៉ាន់ និងបាញ់មីស៊ីលរំលងពីលើកោះនេះថែមទៀត។ ទោះបីជា អាមរិករក្សា និងគោរព«គោលការណ៍ចិនតែមួយ» ពោលគឺមិនគាំទ្រឯករាជ្យតៃវ៉ាន់មែន ប៉ុន្តែច្បាប់របស់អាមេរិកតម្រូវឱ្យផ្តល់ការធានាការពារខ្លួន សម្រាប់ដែនកោះប្រជាធិបតេយ្យមួយនេះ ដូច្នេះហើយ អាមេរិកតែងតែបានផ្ដល់ជំនួយយោធា និងលក់អាវុធជាហូរហែទៅឲ្យតៃវ៉ាន់៕
