ឥណ្ឌូណេស៊ីមានបំណងចង់ក្លាយជាសមាជិកអង្គការសេដ្ឋកិច្ច ដ៏ធំមួយនៅក្នុងតំបន់នៅ៣ឆ្នាំខាងមុខ

ការបញ្ជាក់របស់រដ្ឋមន្ត្រីឥណ្ឌូនេស៊ីនេះបានធ្វើឡើងបន្ទាប់ពីអង្គការ OECD ដែលមានប្រទេសសមាជិកចំនួន៣៨ បានសម្រេចចិត្តកាលពីសប្តាហ៍មុនថា នឹងបើកការពិភាក្សាសម្រាប់ការចូលជាសមាជិករបស់ឥណ្ឌូនេស៊ី បន្ទាប់ពីប្រទេសនេះបានដាក់ពាក្យសុំចូលកាលពីអំឡុងខែកក្កដា ឆ្នាំមុន។ រដ្ឋមន្ត្រីក្រសួងសេដ្ឋកិច្ចរបស់ឥណ្ឌូនេស៊ី លោក អែរឡាងហ្កា ហាតាតូ (Airlangga Hartarto) បាននិយាយថា ឥណ្ឌូនេស៊ីមានសុទិដ្ឋិនិយមខ្ពស់ចំពោះការទទួលបានសមាជិកអង្គការ OECD ដោយសារប្រទេសនេះបានគោរពតាមស្តង់ដាររបស់អង្គការនេះរួចហើយ រួមទាំងសម្រាប់សេដ្ឋកិច្ចប្រកបដោយយុត្តិធម៌ និងការប្រឆាំងអំពើពុករលួយផងដែរ។​

បន្ទាប់ពីពិធីបរិភោគអាហារពេលល្ងាចកាលពីថ្ងៃពុធ ជាមួយនឹងឯកអគ្គរដ្ឋទូតរបស់ប្រទេសជាសមាជិកអង្គការ OECD ទាំង៣៣រួចហើយ លោកបានប្រាប់អ្នកសារព័ត៌មានថា គោលការណ៍ផ្សេងៗទៀតគឺដូចគ្នាដូច្នេះជាមូលដ្ឋានឥណ្ឌូនេស៊ី បានអនុវត្តតាមស្តង់ដាររបស់អង្គការ OECD នេះរួចស្រេចហើយ។ ដូច្នេះហើយប្រទេសនេះសង្ឃឹមថា ដំណើរការចូលជាសមាជិក អង្គការ OECD អាចត្រូវបានបញ្ចប់ក្នុងរយៈពេលពីរទៅបីឆ្នាំខាងមុខទៀត។ បើយោងតាមអង្គការ OECD ឥណ្ឌូនេស៊ី គឺជាប្រទេសអាស៊ីអាគ្នេយ៍ដំបូងគេ ដែលបានដាក់ពាក្យសុំចូលជាសមាជិករបស់អង្គការនេះ។ ​

លោករដ្ឋមន្ត្រី ហាតាតូ បាននិយាយថា ឥណ្ឌូណេស៊ី ឥឡូវនេះនឹងធ្វើការរួមគ្នាជាមួយអង្គការ OECD ដើម្បីបំពេញឯកសារផែនទីបង្ហាញផ្លូវ ដែលកំណត់រយៈពេល លក្ខខណ្ឌ និងដំណើរការសម្រាប់ការចូលជាសមាជិក ហើយគ្រោងនឹងបង្ហាញឯកសារទាំងនេះនៅក្នុងកិច្ចប្រជុំក្រុមប្រឹក្សារដ្ឋមន្ត្រីរបស់អង្គការ OECD នៅអំឡុងខែឧសភា ខាងមុខនេះ។ ​

ដំណើរការចូលជាសមាជិករបស់ឥណ្ឌូនេស៊ីនេះ នឹងត្រូវឆ្លងកាត់ការពិនិត្យយ៉ាងហ្មត់ចត់ដែលក្របដណ្ដប់លើបញ្ហាពាណិជ្ជកម្ម ការប្រឆាំងអំពើពុករលួយ និងបម្រែបម្រួលអាកាសធាតុដើម្បីធានាថា ប្រទេសនេះបំពេញតាមស្តង់ដាររបស់អង្គការ OECD៕

អត្ថបទ៖ សុខ ជា