រដ្ឋាភិបាលថៃ បានកំណត់គោលដៅទាក់ទាញភ្ញៀវទេសចរបរទេសឱ្យបានរហូតដល់ទៅ៤០លាននាក់ក្នុងឆ្នាំ២០២៤ នេះ បើធៀបនឹងចំនួនភ្ញៀវទេសចរបរទេសចំនួន២៧លាននាក់ដែលខ្លួនទទួលបានក្នុងឆ្នាំ២០២៣ កន្លងទៅ។
ជាមួយការជឿជាក់ថា ឧស្សាហកម្មទេសចរណ៍របស់ប្រទេសថៃ នឹងស្ទុះងើបឡើងវិញយ៉ាងឆាប់រហ័សពីការដាំក្បាលចុះខ្លាំងដែលបង្កឡើងដោយវិបត្តិកូវីដ-១៩ រដ្ឋាភិបាលថៃ បានចាត់វិធានការបន្ធូរបន្ថយការរឹតបន្តឹងការធ្វើដំណើរ និងបើកច្រកព្រំដែនអន្តរជាតិឡើងវិញ។ ហើយដើម្បីទាញយកសក្កានុពលនៃការស្ទុះងើបឡើងវិញនៃវិស័យទេសចរណ៍ថៃ ក្រុមហ៊ុនអាកាសចរណ៍ថ្មីៗរហូតដល់ទៅ៩ក្នុងប្រទេសនេះនឹងបើកដំណើរការឆាប់ៗក្នុងឆ្នាំ២០២៤ នេះ។
ក្រុមហ៊ុនអាកាសចរណ៍ទាំងនោះមានរួមមានក្រុមហ៊ុន អេស៊ាន អ៊ែរ៉ូស្ពេស សឺវីស (Asian Aerospace Service), ក្រុមហ៊ុន ស្យាម ស៊ីផ្លេន (Siam Seaplane), ក្រុមហ៊ុន រៀលី ឃូលអ៊ែរ (Really Cool Air), ក្រុមហ៊ុន អាវែនទី អ៊ែរ សាធ័រ (Avanti Air Sarter), ក្រុមហ៊ុន លែនដាច (Landarch), ក្រុមហ៊ុន បាងកក ហេលីកុបទ័រ សឺវីស (Bangkok Helicopter Services), ក្រុមហ៊ុន ប៉ាត់តាយ៉ា អ៊ែរវ៉េ (Pattaya Airway), ក្រុមហ៊ុន អេស៊ា អាត្លង់ទិក អ៊ែរឡាញ (Asia Atlantic Airlines) និងក្រុមហ៊ុន ភី៨០ អ៊ែរ (P80 Air)។
ក្រុមហ៊ុនអាកាសចរណ៍ថ្មីៗទាំង៩នេះ ត្រូវបានគេរំពឹងថា នឹងបន្ថែមសមត្ថភាពដល់ទីផ្សារអាកាសចរណ៍ថៃ ហើយនឹងជួយជំរុញវិស័យទេសចរណ៍។ មួយចំនួនក្នុងចំណោមក្រុមហ៊ុនអាកាសចរណ៍ថ្មីៗទាំងនេះ ក៏ប្រហែលជាដំណើរការជើងហោះហើរអន្តរជាតិផងដែរ។
រដ្ឋាភិបាលថៃ កំពុងផ្តល់ជំនួយហិរញ្ញវត្ថុ ដើម្បីជួយឱ្យក្រុមហ៊ុនអាកាសចរណ៍ទាំងនេះបើកដំណើរការទៅបានដោយរលូន ខណៈខ្លួនរំពឹងថា ក្រុមហ៊ុនអាកាសចរណ៍ទាំងនេះនឹងជួយបង្កើតការងារ និងជំរុញកំណើនសេដ្ឋកិច្ចរបស់ថៃ។ នៅក្នុងឆ្នាំ២០២៣ អ្នកដំណើរតាមផ្លូវអាកាសប្រមាណ១០០លាននាក់បានឆ្លងកាត់អាកាសយានដ្ឋានថៃ ហើយនៅឆ្នាំ២០២៤ នេះថៃរំពឹងថា នឹងទទួលបានអ្នកដំណើរតាមផ្លូវអាកាសយ៉ាងតិច១៣០លាននាក់៕
ដោយ៖ សុវិទ្យា ហោ
