នៅក្នុងដំណើរទស្សនកិច្ចដ៏កម្រនេះ លោកគីម ជុងអ៊ុន នឹងធ្វើដំណើរពីរដ្ឋធានីព្យុងយ៉ាងរបស់កូរ៉េខាងជើងតាមរយៈរថភ្លើង ទៅកាន់ទីក្រុង Vladivostok នៅឆ្នេរសមុទ្រប៉ាស៊ីហ្វិកនៃប្រទេសរុស្ស៊ី ជាកន្លែងដែលលោកនឹងជួបជាមួយលោកពូទីននៅទីនោះ។ នេះបើតាមការរាយការណ៍ដោយកាសែតNew York Times កាលពីថ្ងៃចន្ទដែលស្រង់សំដីពីមន្ត្រីអាមេរិក។
នៅទីក្រុង Vladivostok នោះ ដែលមិនឆ្ងាយប៉ុន្មានពីកូរ៉េខាងជើង មេដឹកនាំទាំងពីរនឹងពិភាក្សាគ្នា អំពីការបញ្ជូនគ្រាប់កាំភ្លើងធំទៅឱ្យរុស្ស៊ី និងមីស៊ីលប្រឆាំងរថក្រោះ ជាថ្នូរឱ្យទីក្រុងម៉ូស្គូផ្តល់ឲ្យទីក្រុងព្យុងយ៉ាងវិញ នូវបច្ចេកវិទ្យាទំនើបប្រើក្នុងផ្កាយរណប និងនាវាមុជទឹកដើរដោយថាមពលនុយក្លេអ៊ែរ។
អត្ថបទគួរអាន
កាលពីថ្ងៃចន្ទ រដ្ឋមន្ត្រីការពារជាតិរុស្ស៊ីលោក Sergei Shoigu បានប្រាប់ទីភ្នាក់ងារព័ត៌មាន Interfax របស់រុស្ស៊ីថា «កូរ៉េខាងជើងគឺជាអ្នកជិតខាងរបស់យើង ជាប្រទេសជិតខាងដែលរស់នៅក្នុងសន្តិភាព និងភាពសុខដុម»។ វិមានក្រឹមឡាំងបាននិយាយកាលពីសប្តាហ៍មុនថា ទីក្រុងមូស្គូមានបំណងធ្វើឱ្យកាន់តែស៊ីជម្រៅនូវ «ទំនាក់ទំនងប្រកបដោយការគោរពគ្នាទៅវិញទៅមក» ជាមួយទីក្រុងព្យុងយ៉ាង ដែលជាសម្ព័ន្ធមិត្តដ៏ជិតស្និទ្ធមួយក្នុងសម័យសង្គ្រាមត្រជាក់ ហើយក៏ជាប្រទេសតូចមួយ ដែលមានទឹកចិត្តគាំទ្ររុស្ស៊ីនៅក្នុងជម្លោះជាមួយអ៊ុយក្រែនផងដែរ។
ទោះជាយ៉ាងណា ទីភ្នាក់ងារសារព័ត៌មានកូរ៉េខាងត្បូង Yonhap កាលពីពេលកន្លងទៅ បានស្រង់សំដីទីភ្នាក់ងារស៊ើបការណ៍សម្ងាត់របស់កូរ៉េខាងត្បូងថា លោក Shoigu ដែលបានទៅបំពេញទស្សនកិច្ចនៅទីក្រុងព្យុងយ៉ាងកាលពីខែកក្កដានោះ បានស្នើទៅលោកគីម ជុងអ៊ុន ពិចារណាផ្គត់ផ្គង់សព្វាវុធដល់រុស្ស៊ី និងស្នើឱ្យទីក្រុងព្យុងយ៉ាងធ្វើសមយុទ្ធយោធាជើងទឹក រួមជាមួយនឹងប្រទេសចិនផងដែរ។
ថ្មីៗនេះទៀតសោធ សហរដ្ឋអាមេរិកក៏បានសម្តែងការព្រួយបារម្ភថា ការចរចាអាវុធរវាងរុស្ស៊ី និងកូរ៉េខាងជើងកំពុងដំណើរការទៅមុខយ៉ាងសកម្ម ហើយនឹងឈានទៅដល់ការសម្រេចណាមួយក្នុងពេលដ៏ខ្លីខាងមុខ។ ទោះបីជាមានការចោទប្រកាន់យ៉ាងណាក្តី កូរ៉េខាងជើងតែងប្រកែកម្តងហើយម្តងទៀតថាខ្លួនមិនបាន ហើយនឹងក៏មិនមានកិច្ចព្រមព្រៀងអាវុធជាមួយរុស្ស៊ីដែរ បើទោះបីជា រដ្ឋអំណាចព្យុងយ៉ាងទទួលស្គាល់ថា ទំនាក់ទំនងប្រទេសទាំងពីរចុងក្រោយនេះមានភាពស្អិតល្មួតខ្លាំងយ៉ាងណាក្តី។
