តើវាអាចធ្វើទៅរួចទេចំពេលដែល G20 ត្រូវបានគេមើលឃើញថាកំពុងបែកបាក់ ហើយគេអាចរំពឹងអ្វីបានខ្លះពីកិច្ចប្រជុំនេះ?
យោងតាមការចុះផ្សាយដោយសារព័ត៌មានអន្តរជាតិធំៗ ប្រធានាធិបតីអាមេរិកលោក ចូ បៃដិន ដែលរំលងមិនចូលរួមកិច្ចប្រជុំកំពូលអាស៊ាននៅឥណ្ឌូនេស៊ី បានទៅដល់ទីក្រុងញូដេលីហើយនៅសុក្រនេះ ខណៈមេដឹកនាំ១៩ប្រទេសផ្សេងទៀត ក៏ត្រូវបានគេរំពឹងថា នឹងទៅដល់ប្រទេសឥណ្ឌានៅថ្ងៃសុក្រនេះជាបន្តបន្ទាប់ដែរ។ ក្នុងនោះ លោកស៊ី ជិនពីង នឹងត្រូវបានទៅជំនួសមុខដោយនាយករដ្ឋមន្ត្រីចិនលោក Li Qiang ខណៈ លោក Sergei Lavrov រដ្ឋមន្ត្រីការបរទេសរុស្ស៊ីនឹងមានវត្តមានជំនួសលោក ពូទីន។
ឥណ្ឌាបាននិងកំពុងជំរុញយ៉ាងខ្លាំងសម្រាប់ការចេញសេចក្តីថ្លែងការណ៍រួមមួយ ទោះបីជាគ្មានសង្ឃឹមក៏ដោយពិសេសបញ្ហាអ៊ុយក្រែន។ យោងតាមប្រភពពីមន្ត្រីឥណ្ឌាដែលបាននិយាយកាលពីថ្ងៃព្រហស្បតិ៍ ឥណ្ឌាបានស្នើថា «សេចក្តីថ្លែងការណ៍របស់ G20 ដែលថ្កោលទោសសង្គ្រាមនៅអ៊ុយក្រែន ត្រូវសម្របសម្រួល និងឆ្លុះបញ្ជាំងពីជំហររបស់រុស្ស៊ី និងចិនដែរ ដើម្បីចៀសវាងការជាប់គាំងអំឡុងពេលប្រជុំ។
អត្ថបទគួរអាន
មន្ត្រីប្រតិភូមួយចំនួនថា នេះគឺជាប្រធានបទសំខាន់ទីមួយដែលត្រូវលើកយកមកពិភាក្សា ក្រោយបរាជ័យកាលពីកិច្ចប្រជុំនៅ Bali ឆ្នាំមុន។ បណ្តាប្រទេសលោកខាងលិចចង់បានការថ្កោលទោសពេញលេញ ជាលក្ខខណ្ឌសម្រាប់ការយល់ព្រមចេញសេចក្តីថ្លែងការណ៍រួម។ ប៉ុន្តែរដ្ឋមន្ត្រីការបរទេសរុស្ស៊ីលោក Sergei Lavrov ដែលនឹងចូលរួមជំនួសលោកប្រធានាធិបតី ពូទីន បាននិយាយថា លោកនឹងរារាំងសេចក្តីប្រកាសចុងក្រោយ ប្រសិនបើសេចក្តីថ្លែងការណ៍នោះមិនឆ្លុះបញ្ចាំងពីជំហររបស់រុស្ស៊ី។
ដូចនេះហើយ ឥណ្ឌាបានស្នើថា G20 ត្រូវថ្កោលទោសសង្គ្រាមបង្កឡើងដោយរុស្ស៊ី ប៉ុន្តែក៏ត្រូវឆ្លុះបញ្ចាំងពីជំហរ និងទស្សនរបស់ទីក្រុងម៉ូស្គូ និងទីក្រុងប៉េកាំងដែរ ដោយថាវេទិកានេះមិនមែនជាកន្លែងប្រជែងភូមិសាស្ត្រនយោបាយឡើយ។
ទោះយ៉ាងណា ឥណ្ឌានឹងនៅតែសង្ឃឹមថា បញ្ហាអ៊ុយក្រែនមិនធ្វើឱ្យរាំងស្ទះដល់កង្វល់របស់លោកខាងត្បូង ដែលជាប្រទេសកំពុងអភិវឌ្ឍន៍នោះទេ។ G20 ដែលតំណាងឱ្យ ៨៥% នៃទិន្នផលសេដ្ឋកិច្ចពិភពលោក ៧៥% នៃពាណិជ្ជកម្មពិភពលោក និងពីរភាគបីនៃចំនួនប្រជាជនសាកល ហើយប្រទេសឥណ្ឌាបាននិយាយម្តងហើយម្តងទៀតថា G20 មានទំនួលខុសត្រូវចំពោះប្រទេសដែលមិនមានវត្តមាននៅក្នុង G20 ដូចជាប្រទេសនៅអាហ្រ្វិកដែលកំពុងជួបបញ្ហាស្បៀង បំណុល តម្លៃប្រេងកើនឡើងជាដើម។
បន្ថែមពីនេះ ប្រទេសឥណ្ឌាក៏ចង់ពិភាក្សាលើបទប្បញ្ញត្តិជាសកលលើរូបិយប័ណ្ណឌីជីថល ឬ Crypto ដែរ។ ការផ្លាស់ប្តូរស្ថាប័នដូចជាធនាគារពិភពលោក និង IMF ព្រមទាំងបញ្ហាបម្រែបម្រួលអាកាសធាតុក៏សុទ្ធសឹងតែជាប្រធានបទ ដែលនឹងត្រូវលើកយកមកពិភាក្សាផងដែរ។ ទោះជាយ៉ាងណា សន្តិសុខស្បៀង និងថាមពលក៏កំពុងរង់ចាំការពិភាក្សាផងដែរ ហើយគេរំពឹងថា ការយល់ស្របមួយចំនួនអាចឈានដល់លើបញ្ហានេះ បើទោះបីជាមួយផ្នែកធំអាស្រ័យលើទីក្រុងម៉ូស្គូដែលយល់ព្រមចាប់ផ្តើមកិច្ចព្រមព្រៀងសមុទ្រខ្មៅឡើងវិញក៏ដោយ។
ប៉ុន្តែអ្នកវិភាគនិយាយថា ការទម្លុះកិច្ចព្រមព្រៀងនេះនៅក្នុងក្របខ័ណ្ឌ G20 ទំនងជាមិនអាចទៅរួមទេ។ កិច្ចព្រមព្រៀងស្តីពីកសិកម្ម ការត្រៀមលក្ខណៈសម្រាប់ជំងឺរាតត្បាត ការថែទាំសុខភាព និងខ្សែសង្វាក់ផ្គត់ផ្គង់សកលទំនងជានឹងត្រូវលើកយកមកពិជជែកដែរ ប៉ុន្តែគេមិនច្បាស់ថាតើប្រធានបទទាំងនេះនឹងក្លាយជាផ្នែកមួយនៃសេចក្តីប្រកាសរួមដែរឬទេ។ នាយករដ្ឋមន្ត្រីឥណ្ឌាលោក Narendra Modi បានព្យាយាមប្រើប្រាស់វេទិកា G20 នេះ ដើម្បីបង្ហាញពិភពលោកថា ឥណ្ឌាបានក្លាយជាមហាអំណាចលេចធ្លោមួយ ដែលមានសមត្ថភាពក្នុងការបង្កើតឯកភាពគ្នាលើបញ្ហាសកលធំៗ ទោះបីជាលទ្ធផលជាក់ស្តែងយ៉ាងណាមិនទាន់មាននៅឡើយក្តី៕
