ការបញ្ជាទិញស្ករត្នោតកំពង់ស្ពឺពីទីផ្សារអឺរ៉ុបធ្លាក់ចុះ តែវាមិនបានធ្វើឱ្យប៉ះពាល់ដល់អ្នកផលិតនោះទេ

លោក សំ សារឿន ប្រធានសមាគមលើកកម្ពស់ស្ករត្នោតកំពង់ស្ពឺ បានបញ្ជាក់ប្រាប់ខេមបូណូមីសថា ការបញ្ជាទិញស្ករត្នោតកំពង់ស្ពឺ ពីទីផ្សារអឺរ៉ុបនៅឆ្នាំនេះ មានចំនួនតែ៦៥តោនតែប៉ុណ្ណោះ តិចជាងផែនការប្រមាណ១៥តោន ដោយសមាគមមានផែនការនាំចេញទៅកាន់ទីផ្សារនេះឱ្យបាន៨០តោន។ តែយ៉ាងណាប្រធានសមាគមរូបនេះ អះអាងថា ការធ្លាក់ចុះនេះមិនបានធ្វើឱ្យប៉ះពាល់ធ្ងន់ធ្ងរដល់អ្នកផលិត និងទីផ្សារនាំចេញស្ករត្នោតកំពង់ស្ពឺនោះទេ។

​បើតាមប្រធានសមាគមលើកកម្ពស់ស្ករត្នោតកំពង់ស្ពឺ រូបនេះ ការផលិតស្ករត្នោតបានតិច ឬច្រើនវាអាស្រ័យលើអាកាសធាតុ តែគិតត្រឹមថ្ងៃទី១៩ ខែមីនា កសិករពុំទាន់ទទួលរងផលប៉ះពាល់ធ្ងន់ធ្ងរដោយសារកត្តាអាកាសធាតុក្ដៅនៅឡើយទេ ប៉ុន្តែអាចនឹងមានការប្រឈមថយទិន្នផលប្រមាណ២០%នៅចុងខែនេះ។

​បច្ចុប្បន្នសមាគមលើកកម្ពស់ស្ករត្នោតកំពង់ស្ពឺ មានសមាជិកចំនួន១៥០គ្រួសារ កំពុងផលិតស្ករត្នោត ស្ករត្នោត៤ប្រភេទ រួមមានស្ករសាច់ ស្ករម្សៅ ស្ករផែន និងស្ករស៊ីរ៉ូ ដើម្បីនាំចេញទៅបណ្ដាប្រទេសចំនួន១៨ នៅលើពិភពលោក៕

អត្ថបទ៖ បូ ដូឡា​