ធនាគារកូរ៉េខាងត្បូង សន្យាផ្ដល់ប្រាក់១.៥ពាន់លានដុល្លារ សម្រាប់អាជីវកម្មខ្នាតតូច ចំពេលមានការជំរុញឱ្យចែករំលែកប្រាក់ចំណេញ

សហព័ន្ធធនាគារកូរ៉េ (KFB) ដែលតំណាងឱ្យស្ថាប័នហិរញ្ញវត្ថុ ចំនួន២៣ រួមទាំងធនាគារ Kookmin និងធនាគារ Woori Bank ដែលមានវត្តមាននៅកម្ពុជា​ផងដែរ បាននិយាយថា កញ្ចប់ថវិកាសរុបចំនួនជាង១,២ពាន់លានដុល្លារ នឹងត្រូវប្រើប្រាស់ជាសាច់ប្រាក់បង្វិលសងសម្រាប់ការទូទាត់ការប្រាក់ដែលអ្នកខ្ចីត្រូវសងម្ចាស់បំណុលរបស់ពួកគេ ដើម្បីជួយពួកគេទប់ទល់ការចំណាយសម្រាប់ទ្រទ្រង់ជីវិតដែលចេះតែកើនឡើង ស្របពេលអត្រាការប្រាក់កើនឡើងកាន់តែខ្ពស់។

មានការដាក់សម្ពាធកាន់តែខ្លាំងទៅលើបណ្ដាស្ថាប័នផ្តល់ប្រាក់កម្ចីក្នុងស្រុក ដែលជំរុញឱ្យពួកគេចែករំលែកប្រាក់ចំណេញរបស់ខ្លួនទៅសង្គមវិញ ដោយកាលពីឆ្នាំមុនប្រាក់ចំណេញរួមគ្នារបស់ធនាគារពាណិជ្ជធំៗបំផុតចំនួន៤ នៅក្នុងប្រទេសកូរ៉េខាងត្បូង ដែលបានពីសកម្មភាពផ្តល់ប្រាក់កម្ចីមានចំនួនជាង២៥ពាន់លានដុល្លារ ពោលគឺបានកើនឡើងជាង២០%សម្រាប់ឆ្នាំនេះ។

បើតាមសេចក្ដីថ្លែងការណ៍បានឱ្យដឹងថា ម្ចាស់អាជីវកម្មខ្នាតតូចនឹងទទួលបានប្រាក់បង្វិលសងវិញដល់ចំនួន៩០%នៃការប្រាក់ដែលត្រូវបង់សម្រាប់រយៈពេលមួយឆ្នាំ ពោលគឺកើនលើស៤%នៃការប្រាក់ដែលពួកគេត្រូវបង់ទៅទៀត ខណៈដែលអ្នកខ្ចីម្នាក់អាចទទួលបានប្រាក់បង្វិលសងវិញត្រឹមតែចំនួនជាង២ពាន់ដុល្លារប៉ុណ្ណោះ ហើយបន្ទុកធនាគារកំពូលទាំង៥ ត្រូវបានគេប៉ាន់ប្រមាណថា មានចំនួនចន្លោះពីជាង១៥០លានដុល្លារ ដល់២៣០លានដុល្លារ នៅក្នុងធនាគារនីមួយៗ។

លោក គីម ជូយុន (Kim Joo-hyun) ប្រធានគណៈកម្មាធិការសេវាហិរញ្ញវត្ថុរបស់ប្រទេសកូរ៉េខាងត្បូង បាននិយាយថា ម្ចាស់អាជីវកម្មខ្នាតតូចមួយចំនួនបានទទួលរងផលប៉ះពាល់ខ្លាំងបំផុតដោយសារតែកត្តាមួយចំនួនរួមទាំងការកើនឡើងអត្រាការប្រាក់ផងដែរ ទោះជាអ្វីៗបានល្អប្រសើរឡើងវិញក្រោយពីជំងឺកូវីដ-១៩ ហើយក៏ដោយ ដូច្នេះហើយលោកបានសង្កត់ធ្ងន់ថា ការផ្តល់ជំនួយផ្នែកហិរញ្ញវត្ថុនេះនឹងជួយដល់អាជីវកម្មខ្នាតតូច។

ធនាគារកូរ៉េ បានប្រឈមការរិះគន់ថា ពួកគេទទួលបានប្រាក់ចំណូល “យ៉ាងងាយស្រួល” ពីអត្រាការប្រាក់ខ្ពស់ ខណៈដែលអាជីវកម្មខ្នាតតូច និងក្រុមអ្នកខ្ចីដែលងាយរងគ្រោះបានជួបវិបត្តិនៃការចំណាយទ្រទ្រង់ជីវិតក្នុងពេលអតិផរណាកើនខ្ពស់។

ទេសាភិបាលធនាគារ FSS គឺលោក លី បុកយុន (Lee Bokhyun) បាននិយាយកាលពីខែវិច្ឆិកាថា ប្រាក់ចំណេញប្រតិបត្តិការរបស់ធនាគារក្នុងត្រីមាសទី៣ឆ្នាំនេះ គឺមានចំនួនច្រើនជាងប្រាក់ចំណេញរបស់ក្រុមហ៊ុន Samsung Electronics Co., ក្រុមហ៊ុន LG Electronics Inc. និងក្រុមហ៊ុន Hyundai Motor Co. ទៅទៀត ហើយថា ប្រាក់ចំណូលការប្រាក់របស់ធនាគារត្រូវបានគេរំពឹងថានឹងកើនឡើងដល់៤៦ពាន់លានដុល្លារ នៅឆ្នាំនេះ។

គណបក្សប្រជាធិបតេយ្យ ដែលជាបក្សប្រឆាំងដ៏សំខាន់របស់កូរ៉េខាងត្បូង បានព្យាយាមបង្កើតកម្មវិធីយកពន្ធលើធនាគារ ដើម្បីលើកកម្ពស់ជីវភាពរស់នៅរបស់ប្រជាជនដែលរងគ្រោះដោយអត្រាការប្រាក់ខ្ពស់ជាមួយនឹងចំណូលពន្ធ ដែលបានបង្កើតឡើងតាមរយៈការរួមចំណែកពីវិស័យធនាគារ៕

អត្ថបទ៖ សុខ ជា