ថៃរំពឹងធនាគារចិនមួយជួយផ្តល់ទុន ដើម្បីអភិវឌ្ឍន៍គម្រោងស្ពានអាកាស និងផ្លូវតម្លៃ២៨ពាន់លានដុល្លាររបស់ខ្លួន

គម្រោងស្ពានអាកាស និងផ្លូវតម្លៃ២៨ពាន់លានដុល្លារអាម៉េរិករបស់ថៃ ដែលតភ្ជាប់ខេត្តរ៉ាក់ណង និងខេត្តឈុំផុន នៅភាគខាងត្បូងនៃប្រទេសថៃ ត្រូវបានរំពឹងថា នឹងក្លាយជាបណ្ដាញផ្លូវដឹកជញ្ជូនដ៏សំខាន់មួយ និងជួយបន្ធូរការកកស្ទះក្នុងការដឹកជញ្ជូននៅច្រកសមុទ្រម៉ាឡាកា នៅ១០ឆ្នាំខាងមុខ ហើយមហាយក្សចិន ក៏មិនមើលរំលងគម្រោងខ្នាតយក្សនេះដែរ ដោយបានបង្ហាញចំណាប់អារម្មណ៍ផ្ដល់ហិរញ្ញប្បទានដល់គម្រោងនេះ។

គម្រោងខ្នាតយក្សប្រកបដោយមហិច្ឆតាដ៏ធំសម្បើមនេះ រួមមានការសាងសង់កំពង់ផែទឹកជ្រៅចំនួន២ ដោយមួយស្ថិតក្នុងខេត្តរ៉ាក់ណង និងមួយទៀតស្ថិតក្នុងខេត្តឈុំផុន ដែលត្រូវបានតភ្ជាប់ដោយផ្លូវហាយវ៉េ និងប្រព័ន្ធផ្លូវដែក។ បន្ទាប់ពីបានជួបជាមួយប្រធានធនាគារអភិវឌ្ឍន៍ហេដ្ឋារចនាសម្ព័ន្ធអាស៊ី AIIB លោក សេដ្ឋា ថាវីស៊ីន អះអាងថា ពួកគេចូលចិត្តគោលនយោបាយរបស់រដ្ឋាភិបាលថៃជាខ្លាំង ជាពិសេសគម្រោងស្ពានអាកាស និងផ្លូវ ដែលលោកជឿជាក់ថាពួកគេនឹងចូលរួម។

លោក សេដ្ឋា ថាវីស៊ីន បានបន្ថែមថា ធនាគារអភិវឌ្ឍន៍ហេដ្ឋារចនាសម្ព័ន្ធអាស៊ី AIIB ក៏បង្ហាញចំណាប់អារម្មណ៍លើគម្រោងមួយផ្សេងទៀតរបស់រដ្ឋាភិបាលថៃផងដែរ នោះគឺគម្រោងជួសជុលកែលម្អអាកាសយានដ្ឋានទូទាំងប្រទេសថៃ។ លោកអះអាងថា ធនាគារនេះ បានត្រៀមខ្លួនរួចជាស្រេចដើម្បីជួយគាំទ្រដល់ប្រទេសថៃ ដែលមិនត្រឹមតែបោះទុនវិនិយោគប៉ុណ្ណោះទេ ថែមទាំងជួយសិក្សាសមិទ្ធលទ្ធភាពបឋមក្នុងនាមជាអង្គភាពឯករាជ្យទៀតផង។

នេះជាការឱ្យសញ្ញាយ៉ាងច្បាស់ថា ធនាគារអភិវឌ្ឍន៍ហេដ្ឋារចនាសម្ព័ន្ធអាស៊ី AIIB អាចនឹងជួយផ្ដល់ហិរញ្ញប្បទានដល់គម្រោងខ្នាតយក្សនានារបស់ប្រទេសថៃ រួមទាំងគម្រោងស្ពានអាកាស និងផ្លូវ និងការអភិវឌ្ឍហេដ្ឋារចនាសម្ព័ន្ធអាកាសយានដ្ឋានផងដែរ។ ធនាគារនេះត្រូវបានស្នើបង្កើតឡើងក្នុងឆ្នាំ២០១៣ និងដាក់ឱ្យដំណើរការជាផ្លូវការនៅថ្ងៃទី១៦ មករា ឆ្នាំ២០១៦ ក្នុងគោលបំណងជួយជំរុញការអភិវឌ្ឍសេដ្ឋកិច្ច និងសង្គមនៅអាស៊ី ដើម្បីប្រជែងនឹងធនាគារអភិវឌ្ឍន៍អាស៊ី ADB៕

ដោយ: តែម សុខុម