ដោយមើលឃើញអំពីសក្ដានុពលនេះ ថៃដែលប្រទេសជាប់ភូមិផងរបងជាមួយឡាវនោះ បាននិងកំពុងខិតខំខ្លាំងណាស់ ក្នុងការច្បាមយកប្រយោជន៍ពីមធ្យោបាយដឹកជញ្ជូនមួយនេះ និងជំរុញការតភ្ជាប់ផ្លូវដែករបស់ខ្លួន ជាមួយនឹងផ្លូវរថភ្លើងល្បឿនលឿនចិន-ឡាវដែរ ដ្បិតថា ប្រទេសចិន គឺជាទីផ្សាផលិតផលកសិកម្មដ៏ធំមួយរបស់ខ្លួន។
លោក Athipu Chitranukroh អគ្គនាយករងនៃអគ្គនាយកដ្ឋានដឹកជញ្ជូនផ្លូវដែក និងលោកKitjaluck Srinuchsart អគ្គនាយករងនៃនាយកដ្ឋានគយរបស់ថៃ បានធ្វើដំណើរទស្សនកិច្ចទៅកាន់ប្រទេសឡាវថ្មីៗនេះ ដើម្បីពិភាក្សាគ្នាអំពីការតភ្ជាប់ផ្លូវដែករវាងថៃ និងផ្លូវរថភ្លើងល្បឿនលឿនចិន-ឡាវ ដែលបានដាក់ឲ្យដំណើរការផ្លូវការកាលពីចុងឆ្នាំ២០២១។
ក្រុមអ្នកជំនាញអះអាងថា បណ្ដាញផ្លូវដែកល្បឿនលឿននេះ នឹងត្រូវបានអភិវឌ្ឍជាមួយនឹងហេដ្ឋារចនាសម្ព័ន្ធដែលមាននាពេលបច្ចុប្បន្ន ហើយវានឹងផ្ដល់អត្ថប្រយោជន៍ទាំងសងខាង រវាងប្រទេសថៃ និងប្រទេសជិតខាងគ្នាទាំងពីរ គឺឡាវ និងចិន។
បើតាមប្រភពតួលេខពីរដ្ឋាភិបាលថៃបានឲ្យដឹងថា ពាណិជ្ជកម្មនាំចេញនាំចូលទំនិញ នៅតាមប៉ុស្ដិ៍ត្រួតពិនិត្យតាមច្រកព្រំដែនរវាងថៃ និងឡាវ នៅក្នុងខេត្ត ណង ខៃ កាលពីឆ្នាំ២០២២ មានដល់ទៅប្រមាណ ៣ពាន់លានដុល្លារអាមេរិក។ បើទោះបីជា មានការរំខានដោយសារកូវីដ១៩ក្ដី ប៉ុន្ដែ ពាណិជ្ជកម្មតាមព្រំដែនរវាងប្រទេសថៃ និងឡាវនេះ សម្រេចបានកំណើនប្រមាណ ៤០% បើធៀបនឹងឆ្នាំ២០២១។
អត្ថបទគួរអាន
រដ្ឋាភិបាលថៃ បច្ចុប្បន្នកំពុងអភិវឌ្ឍស្ថានីយផ្លូវដែកនៃខេត្ត ណង ខៃ ដើម្បីក្លាយជាមជ្ឈមណ្ឌលត្រួតពិនិត្យទំនិញ សម្រាប់ការដឹកជញ្ជូនទំនិញឆ្លងដែន និងការតភ្ជាប់ការដឹកជញ្ជូនទំនិញពីរថភ្លើង ទៅកាន់ការដឹកជញ្ជូនតាមផ្លូវថ្នល់ផងដែរ។
តាមគោលដៅ បណ្ដាញផ្លូវរថភ្លើងថៃ-ឡាវ នឹងបើកប្រតិបត្តិការដឹកជញ្ជូនចំនួន១៤ ខ្សែរថភ្លើងក្នុងមួយថ្ងៃ ហើយវាត្រូវបានរំពឹងថា នឹងទាក់ទាញការវិនិយោគបន្ថែមកាន់តែច្រើនឡើង។
សូមបញ្ជាក់ថា នាពេលកន្លងមក បើទោះបីជា មិនទាន់មានការតភ្ជាប់ផ្លូវរថភ្លើងដោយផ្ទាល់ជាមួយនឹងផ្លូវរថភ្លើងល្បឿនលឿន ចិន-ឡាវ ក៏ពិតមែន ប៉ុន្ដែ ប្រទេសថៃ ក៏បានទាញប្រយោជន៍ពីផ្លូវរថភ្លើងនេះគួរឲ្យកត់សម្គាល់ដែរ ពិសេស គឺថៃបានប្រើប្រាស់ផ្លូវរថភ្លើងនេះ ដើម្បីដឹកជញ្ជូនផលិតផលកសិកម្មរបស់ខ្លួនឆ្លងកាត់ប្រទេសឡាវ ឆ្ពោះទៅកាន់ទីផ្សារចិនបានកាន់តែឆាប់រហ័សជាងមុន ហើយកន្លងមកក៏មានអ្នកដំណើរពីប្រទេសចិន ក៏បានធ្វើដំណើរឆ្លងតាមផ្លូវរថភ្លើងចិន-ឡាវ នេះ ដើម្បីបន្ដដំណើរឆ្លងមកកាន់ទឹកដីថៃផងដែរ៕
