ថ្វីបើឥទ្ធិពលនៃព្យុះមួយនេះបានចុះខ្សោយបន្តិចមែនចាប់តាំងពីបានមកដល់ទឹកដីជប៉ុនដំបូងកាលពីល្ងាចថ្ងៃទី១៨ ខែកញ្ញា ជុំវិញទីក្រុង Kagoshima ក្នុងតំបន់ភាគនិរតីនៃតំបន់ ឃ្យូស៊ូ(Kyushu) ប៉ុន្តែកំលាំងរបស់វានៅតែអាចទៅផ្តួលរលំដើមឈើ កម្ទេចបង្អួច និងធ្វើឱ្យកំរិតទឹកទន្លេឡើងខ្លាំងផងដែរ។
ទូរទស្សន៍ជាតិជប៉ុន NHK បានរាយការណ៍ថា មនុស្សម្នាក់បានស្លាប់ និង៥០នាក់ផ្សេងទៀតបានរងរបួស អំឡុងពេលដែលព្យុះនេះបានបោកបក់ឆ្លងកាត់តំបន់ Kyushu ។ ទោះយ៉ាងណា មិនទាន់មានការបញ្ជាក់ភ្លាមៗអំពីតួលេខផ្លូវការពីអាជ្ញាធរជប៉ុនទេ។
នាយករដ្ឋមន្ត្រី Fumio Kishida ដែលគ្រោងនឹងចាកចេញពីប្រទេសជប៉ុនទៅចូលរួមសន្និបាតអង្គការសហប្រជាជាតិនៅថ្ងៃចន្ទសប្តាហ៍នេះ បានពន្យាពេលធ្វើដំណើរមួយថ្ងៃ ដើម្បីទុកពេលឱ្យលោកទៅត្រួតពិនិត្យការខូចខាតដោយព្យុះ។
អត្ថបទគួរអាន
មន្ត្រីមកពីទីភ្នាក់ងារឧតុនិយមជប៉ុនបានព្រមានពីជំនន់ទឹកទន្លេផងដែរ បន្ទាប់ពីក្នុង២៤ម៉ោងចុងក្រោយ ភ្លៀងបានធ្លាក់ខ្លាំងខុសពីធម្មតា ហើយសូម្បីតែភ្លៀងធ្លាក់បន្ថែមបន្តិចបន្តួចក៏អាចធ្វើឲ្យកម្ពស់ទឹកកើនឡើងបានដែរ ដូច្នេះគេត្រូចប្រុងប្រយ័ត្នចំពោះទឹកជំនន់ និងការរអិលបាក់ដី។
ទាំងនេះគ្រាន់តែជាការព្រមានប៉ុណ្ណោះ ខណៈការខូខាតដែលបង្កឡើងដោយព្យុះល្បឿន២៣៤គីឡូម៉ែត្រក្នុងមួយម៉ោងមួយនេះ មានកំរិតតិចតួចនៅឡើយ។ ទោះយ៉ាងណា ការព្រមាននៅតែបន្តដាក់ចេញសម្រាប់ពលរដ្ឋក្នុងតំបន់ទាំងជិត១០លាននាក់ដដែល៕
