ជាក់ស្តែង តាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ បានបង្ហាញថា ការនាំចេញស្វាយស្រស់កម្ពុជាទៅកាន់ទីផ្សារអន្តរជាតិនៅឆមាសទី១ឆ្នាំ២០២៣នេះ សម្រេចបានជាង ៩ម៉ឺនតោន ធ្លាក់ចុះជាង ២០% បើធៀបនឹងរយៈពេលដូចគ្នាកាលពីឆ្នាំ២០២២ ខណៈការនាំចេញដំណាប់ស្វាយវិញសម្រេចបានចំនួន ១ម៉ឺន៦ពាន់តោន កើនឡើង៤៣% បើធៀបនឹងរយៈពេលដូចគ្នាកាលពីឆ្នាំ២០២២។
ឧកញ៉ា ហ៊ុន ឡាក់ អគ្គនាយកក្រុមហ៊ុន រីច ហ្វាម អេស៊ា បានគូសបញ្ជាក់ថា ការនាំចេញស្វាយស្រស់កម្ពុជាទៅទីផ្សារអន្តរជាតិសម្រេចបានជាង ៩ម៉ឺនតោន ធ្លាក់ចុះជាង ២០% នៅឆមាសទី១ឆ្នាំនេះ គឺដោយសារទិន្នផលផ្លែស្វាយស្រស់ ដែលត្រូវស្តង់ដារសម្រាប់នាំចេញមិនសូវសម្បូរច្រើន។ ទិន្នផលស្វាយត្រូវតាមស្តង់ដារមិនសូវសម្បូរ ក៏ដោយសារតែអ្នកដាំដុះស្វាយភាគច្រើនបានផ្អាកការដាំដុះ និងមិនបានមើលថែទាំចម្ការស្វាយឱ្យបានដិតដល់ ក្រោយពីពួកគាត់ខាតបង់ច្រើនកាលពីឆ្នាំមុនៗ ដោយសារបញ្ហាបម្រែបម្រួលអាកាសធាតុ និងការកើនខ្ពស់នៃធាតុចូលកសិកម្ម ដូចជាជី និងថ្នាំកសិកម្មជាដើម គួបផ្សំតម្លៃស្វាយស្រស់នៅលើទីផ្សារមិនទាន់អាចកើនខ្ពស់ប្រសើរឡើងមកវិញបានផងដែរ។
ទោះយ៉ាងណា ឧកញ៉ា ហ៊ុន ឡាក់ អះអាងថា ស្របពេលស្វាយស្រស់មិនត្រូវស្តង់ដារនាំចេញនៅសល់ច្រើន ធ្វើឱ្យការកែច្នៃស្វាយទាំងនោះ ទៅជាដំណាប់ស្វាយក៏មានការកើនឡើងច្រើនផងដែរ ដែលបានធ្វើឱ្យការនាំចេញដំណាប់ស្វាយនៅឆមាសទី១ឆ្នាំនេះ មានសម្ទុះកើនឡើងខ្លាំងដល់ទៅ ៤៣% ធៀបនឹងឆ្នាំមុន។ គួបផ្សំតម្លៃដំណាប់ស្វាយនៅលើទីផ្សារបច្ចុប្បន្ន ក៏មានតម្លៃល្អ ពិសេសគឺនៅទីផ្សារប្រទេសចិនតែម្តង បានធ្វើឱ្យអ្នកនាំចេញស្វាយស្រស់មួយចំនួនបាន ងាកមកជំរុញការនាំចេញដំណាប់ស្វាយច្រើនជាងវិញផងដែរ។
អត្ថបទគួរអាន
យ៉ាងណាក៏ដោយចុះ លោកឧកញ៉ា ហ៊ុន ឡាក់ រំពឹងថា តម្លៃនិងទីផ្សារនាំចេញស្វាយស្រស់កម្ពុជានឹងមានភាពល្អប្រសើរឡើងវិញ នៅចុងឆ្នាំ២០២៣ ឬដើមឆ្នាំ២០២៤ខាងមុខនេះ ដោយសារតែផលិតកម្មមានការថយចុះ ដូចនេះវាអាចនឹងនាំឱ្យមានតម្រូវការខ្ពស់ឡើងវិញ ដែលធ្វើឲ្យកសិករនាំគ្នាពង្រឹងគុណភាពដាំដុះ ការថែទាំ ដើម្បីបំពេញតម្រូវការនាំចេញ។
បើតាមការបញ្ជាក់របស់ឧកញ៉ា ហ៊ុន ឡាក់ ទីផ្សារនាំចេញស្វាយស្រស់របស់កម្ពុជាភាគច្រើន គឺនាំចេញទៅកាន់ប្រទេសចិន និងមួយចំនួននាំចេញទៅប្រទេសថៃ ខណៈដំណាប់ស្វាយវិញ ភាគច្រើននាំចេញទៅទីផ្សារប្រទេសចិន និងទីផ្សារមួយចំនួនទៀត ដូចជាប្រទេសថៃ រុស្សី ហ្វីលីពីន ហុងកុង សិង្ហបុរី និងជប៉ុនជាដើម។ ដោយឡែក សម្រាប់តម្លៃស្វាយស្រស់នាំចេញបច្ចុប្បន្នវិញ អាចលក់ចេញបានក្នុងតម្លៃ ១,៤០០ ដុល្លារក្នុងមួយតោន ខណៈដំណាប់ស្វាយវិញអាចលក់ចេញបានក្នុងតម្លៃ ៤,៣០០ ដុល្លារក្នុងមួយតោន។
សូមបញ្ជាក់ថា តាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ បានបង្ហាញថា នៅឆមាសទី១ ឆ្នាំ២០២៣នេះ កម្ពុជាទទួលបានចំណូលជាង ២ពាន់៤រយលានដុល្លារពីការនាំចេញផលិតផលកសិកម្មទៅកាន់ទីផ្សារអន្តរជាតិ ក្នុងបរិមាណសរុបមានជិត ៤លានតោន ថយចុះជាង ២២% បើធៀបនឹងរយៈពេលដូចគ្នានៅឆ្នាំ២០២២៕
