លោក ផាម ញ៉ាត វឿង ប្រធានក្រុមហ៊ុន VinFast នៅតែបន្តឈរនៅលើលំដាប់កំពូលមហាសេដ្ឋីនៅក្នុងប្រទេសវៀតណាម ដោយលោក មានទ្រព្យសម្បត្តិសរុបរហូតដល់ ៤៤ ពាន់លានដុល្លារ បើបូករួមទាំងទ្រព្យដែលកើនថ្មី សរុប ៣៩ ពាន់លានដុល្លារ ។នេះបើយោងទៅតាមសន្ទស្សន៍ទ្រព្យសម្បត្តិដែលចងក្រងដោយសារព៍ត៌មាន Bloomberg។
អត្ថបទគួរអាន
ការកើនឡើងទ្រព្យសម្បត្តិរបស់លោក វឿង ដ៏គំហុកគឺដោយសារតែតម្លៃភាគហ៊ុនរបស់ក្រុមហ៊ុន VinFast ដែលបានបង្ហាញខ្លួនជាលើកដំបូងរបស់ខ្លួននៅលើផ្សារហ៊ុន Nasdaq នៅសហរដ្ឋអាមេរិកកាលពីថ្ងៃអង្គារក្នុងតម្លៃ មួយភាគហ៊ុនត្រឹមតែ ២២ ដុល្លារ ប៉ុន្តែនៅពេលដែលទីផ្សារជូញដូរបានបិទតម្លៃភាគហ៊ុននេះបានកើនឡើងរហូតដល់ទៅជាង ៣៧ ដុល្លារនៅក្នុងមួយហ៊ុន ។
សារព័ត៌មាន VN Express បានរាយការណ៍ថា ជាមួយនឹងតម្លៃនេះ បាននាំឲ្យក្រុមហ៊ុន VinFast របស់លោក រឿង មានតម្លៃសរុបរហូតដល់៨៥ ពាន់លានដុល្លារ ពោលគឺមានទំហំធំ ជាងតម្លៃហ៊ុនសរុប របស់ក្រុមហ៊ុន Ford ដែលមានតម្លៃត្រឹមតែ៤៨ ពាន់លានដុល្លារ ហើយក្រុមហ៊ុន General Motor វិញ មានតម្លៃត្រឹម ៤៦ ពាន់លានដុល្លារ។
មកដល់ពេលនេះគេដឹងថា VinFast ដែលជាក្រុមហ៊ុនបុត្រសម្ព័ន្ធនៃក្រុមហ៊ុនធំជាងគេរបស់វៀតណាម Vingroup បានទទួលការយល់ព្រមក្នុងការសាងសង់រោងចក្រផលិតរថយន្តតម្លៃ ៤ ពាន់លានដុល្លារនៅរដ្ឋ North Carolina ក្នុងសហរដ្ឋអាមេរិក បន្ទាប់ពីក្រុមហ៊ុនបាននាំ រថយន្តអគ្គិសនីជិត ៣០០០ គ្រឿងទៅកាន់សហរដ្ឋអាមេរិក ដែលរំពឹងថានឹងក្លាយជាទីផ្សារដ៏សំខាន់មួយរបស់ខ្លួន៕
