តើរូបិយប័ណ្ណប្រទេសណាខ្លះ ដែលមានឥទ្ធិពលបំផុតក្នុងពិភពលោកប្រចាំឆ្នាំ២០២៤?

បើយោងតាមការចុះផ្សាយរបស់សារព័ត៌មាន Business Insider ប្រាក់យន់របស់មហាយក្សចិន ដែលមានសេដ្ឋកិច្ចធំបំផុតទី២ របស់ពិភពលោកបានក្លាយជារូបិយប័ណ្ណដ៏មានឥទ្ធិពលបំផុតទី៥ក្នុងពិភពលោកប្រចាំឆ្នាំ២០២៤ ដោយគ្របដណ្ដប់៣% នៃរូបិយប័ណ្ណបម្រុងនៅតាមបណ្ដាធនាគារកណ្ដាលទូទាំងពិភពលោក។ បន្ថែមពីលើនេះ វាក៏ជារូបិយប័ណ្ណដែលត្រូវបានជួញដូរច្រើនបំផុតទី៥ ក្នុងពិភពលោកផងដែរ ជាមួយនឹងទំហំជួញដូរប្រចាំថ្ងៃជាង៥២០ពាន់លានដុល្លារ។

ងាកមកមើលប្រាក់ផោន របស់ចក្រភពអង់គ្លេស ឯណេះវិញបានជាប់ចំណាត់ថ្នាក់លេខ៤ ដោយគ្របដណ្ដប់៥% នៃរូបិយប័ណ្ណបម្រុងនៅតាមបណ្ដាធនាគារកណ្ដាលទូទាំងពិភពលោកជាមួយនឹងទំហំជួញដូរប្រចាំថ្ងៃប្រមាណ៩៦៨ពាន់លានដុល្លារ។ ទន្ទឹមនេះ ប្រាក់យ៉េន របស់ជប៉ុន ដែលជារូបិយប័ណ្ណអាស៊ី ដ៏ពេញនិយមបំផុតមួយ ជាពិសេសក្នុងស្ថានភាពមិនប្រាកដប្រជាផ្នែកសេដ្ឋកិច្ច បានជាប់ចំណាត់ថ្នាក់លេខ៣ ជាមួយនឹងទំហំជួញដូរប្រចាំថ្ងៃប្រមាណ១,២ទ្រីលានដុល្លារ។

ដោយឡែក ប្រាក់អឺរ៉ូ ដែលជារូបិយប័ណ្ណផ្លូវការរបស់សហភាពអឺរ៉ុប បានជាប់ចំណាត់ថ្នាក់លេខ២ ដោយគ្របដណ្ដប់២១% នៃរូបិយប័ណ្ណបម្រុងនៅតាមបណ្ដាធនាគារកណ្ដាលទូទាំងពិភពលោកជាមួយនឹងទំហំជួញដូរប្រចាំថ្ងៃជាង២,៣ទ្រីលានដុល្លារ។

ហើយចុងក្រោយនេះ គឺប្រាក់ដុល្លាររបស់សហរដ្ឋអាម៉េរិក ដែលមានសេដ្ឋកិច្ចធំបំផុតរបស់ពិភពលោកបានជាប់ឈ្មោះជារូបិយប័ណ្ណដ៏មានឥទ្ធិពលបំផុតទី១ ក្នុងពិភពលោក ដោយ៨៥%នៃការជួញដូរ Forex ទាំងអស់ត្រូវបានធ្វើឡើងជាប្រាក់ដុល្លារអាម៉េរិក ក្នុងទំហំប្រមាណ៦,៦ទ្រីលានដុល្លារ។ យោងតាមមូលនិធិរូបិយវត្ថុអន្តរជាតិ (IMF) ប្រាក់ដុល្លារអាម៉េរិកគ្របដណ្ដប់ប្រមាណ៥៩% នៃរូបិយប័ណ្ណបម្រុងនៅតាមបណ្ដាធនាគារកណ្ដាលទូទាំងពិភពលោក។ សរុបមក ប្រាក់ដុល្លារអា​​ម៉េរិក ពិតជាមានឥទ្ធិពលខ្លាំងណាស់នៅលើទីផ្សារហិរញ្ញវត្ថុ ជាពិសេសវិស័យធនាគារតែម្ដង។

ទាំងធនាគារពិភពលោក (World Bank) និងមូលនិធិរូបិយវត្ថុអន្តរជាតិ (IMF) សុទ្ធតែផ្ដល់កម្ចីនៅទូទាំងពិភពលោកជាប្រាក់ដុល្លារ ហើយមិនតែប៉ុណ្ណោះ សញ្ញាប័ណ្ណ ឬ មូលបត្របំណុលបរទេស និងមូលបត្របំណុលក្រុមហ៊ុនជាទូទៅក៏ត្រូវបានបោះផ្សាយជាប្រាក់ដុល្លារ ផងដែរ៕

ដោយ: តែម សុខុម