តម្លៃក្រុមហ៊ុន Berkshire Hathaway របស់កំពូលមហាសេដ្ឋី វ៉ារ៉េន ប៊ូហ្វេត ឡើងដល់១ទ្រីលានដុល្លារ

សន្ទស្សន៍តម្លៃហ៊ុនសរុបរបស់ក្រុមហ៊ុន ប៊ើកស៊ា ហត្ថាវ៉េ (Berkshire Hathaway) របស់លោក វ៉ារ៉េន ប៊ូហ្វេត ដែលមានមូលដ្ឋាននៅរដ្ឋ ណេប្រាស្កា បានស្ទុះឡើងដល់កម្រិតខ្ពស់បំផុតរហូតដល់ទៅ១ទ្រីលានដុល្លារ នៅពេលបើកការជួយដូរកាលពីថ្ងៃពុធ កន្លងទៅ។ ជាមួយនឹងសន្ទស្សន៍តម្លៃហ៊ុនដ៏មហាសាលនេះ បានធ្វើឲ្យក្រុមហ៊ុន Berkshire Hathaway ក្លាយជាក្រុមហ៊ុនបណ្តាក់ទុនកម្រិត A នៅទីផ្សារហ៊ុនពិភពលោក ដោយមួយហ៊ុនមានតម្លៃប្រមាណលើសពី៦៩ម៉ឺនដុល្លារ។

ស្ថិតនៅក្រោមការគ្រប់គ្រងដោយលោក វ៉ារ៉េន ប៊ូហ្វេត ដែលមានអាយុ៩៤ឆ្នាំ ក្រុមហ៊ុន Berkshire Hathaway ដែលបង្កើតឡើងនៅក្នុងឆ្នាំ១៩៦៥ កំពុងក្លាយជាក្រុមហ៊ុនវិនយោគលើអាជីវកម្មជាច្រើន រាប់ចាប់តាំងពីក្រុមហ៊ុនធានារ៉ាប់រង ក្រុមហ៊ុនគ្រប់គ្រងសេវាកម្មដឹកជញ្ជូនផ្លូវដែក ក្រុមហ៊ុនគ្រប់គ្រងថាមពល និងក្រុមហ៊ុនជាច្រើនទៀត។

មូលហេតុដែលវិនិយោគិន ចាប់អារម្មណ៍ និងគាំទ្រ សេវាកម្មនានារបស់ក្រុមហ៊ុននេះ គឺបន្ទាប់ពីមានរបាយការណ៍មួយអះអាងថា នៅឆមាសទី១ ឆ្នាំ២០២៤ ក្រុមហ៊ុន Berkshire Hathaway ទទួលបានប្រាក់ចំណេញរហូតដល់ទៅជិត២៣ពាន់លានដុល្លារ ពោលគឺមានការកើនឡើង២៦% បើធៀបនឹងលទ្ធផលសម្រេចបានកាលពីឆ្នាំ២០២៣។

លោក ស្ទីវ ឆេក (Steve Check ) ប្រធានក្រុមហ៊ុន Check Capital Management នៅរដ្ឋកាលីហ្វ័រញ៉ា ដែលបានបណ្តាក់ទុនប្រមាណជា២ពាន់លានដុល្លារ នៅក្នុងក្រុមហ៊ុន Berkshire Hathaway បាននិយាយថា លោក វ៉ារ៉េន ប៊ូហ្វេត បានសាងសង់អាណាចក្រវិនិយោគរបស់ Berkshire Hathaway តាមរបៀបដែលមានហានិភ័យទាប។

បច្ចុប្បន្នលោក វ៉ារ៉េន ប៊ូហ្វេត បានកាន់កាប់ផលប្រយោជន៍របស់ក្រុមហ៊ុន Berkshire Hathaway ត្រឹមតែ១៤% ប៉ុណ្ណោះ ក្រៅពីនេះលោកបានបរិច្ចាគ​ទៅអង្គការមនុស្សធម៌តាំងពីឆ្នាំ២០០៦ មកម្ល៉េះ តែទោះជាយ៉ាងណាទស្សនាវដ្តី Forbes បាននិយាយថា លោកនៅមានទ្រព្យសម្បត្តិរហូតដល់១៤៦ពាន់លានដុល្លារនៅក្នុងដៃ ដូច្នេះលោកស្ថិតនៅក្នុងលំដាប់ជាកំពូលអ្នកមានបំផុតទី៦របស់ពិភពលោក៕

ដោយៈ សរ សុជាតិ