ក្រុមហ៊ុនថយន្ត តូយ៉ូតា បានជូនដំណឹងដល់ក្រុមហ៊ុនផ្គត់ផ្គង់គ្រឿងបន្លាស់សំខាន់ៗរបស់ខ្លួនស្ដីពីផែនការជំរុញការផលិតរថយន្តម៉ាកតូយ៉ូតា និងម៉ាកឡិកសឹស (Lexus) ឱ្យឡើងដល់៦០ម៉ឺនគ្រឿងនៅត្រឹមឆ្នាំ២០២៥ ដែលជាការបន្តពីគោលដៅផលិតកម្មសម្រាប់ឆ្នាំ២០២៤ដែលមានចំនួន១៩ម៉ឺនគ្រឿង។ ក្រុមហ៊ុនតូយ៉ូតាបានលក់រថយន្តអគ្គិសនីបានជាង២ម៉ឺនគ្រឿងក្នុងឆ្នាំ២០២២។
គោលដៅផលិតកម្មរបស់ក្រុមហ៊ុនតូយ៉ូតាសម្រាប់រថយន្តទាំងអស់ក្នុងឆ្នាំ២០២៣ គឺធ្វើយ៉ាងណាឱ្យលើសពី១០លានគ្រឿងរួមទាំងរថយន្តអគ្គិសនីប្រហែល១៥ម៉ឺនគ្រឿងផងដែរ ប៉ុន្តែសម្រាប់ឆ្នាំ២០២៥ ក្រុមហ៊ុននេះមានគោលបំណងផលិតរថយន្តឱ្យបាន១១លានគ្រឿង ដែលមានន័យថា រថយន្តអគ្គិសនីនឹងបង្កើនពីអត្រា៥%ទៅ៦%នៃយានយន្តទាំងអស់របស់ក្រុមហ៊ុននេះ។
អត្ថបទគួរអាន
នាយកប្រតិបត្តិក្រុមហ៊ុនគ្រឿងបន្លាស់ម្នាក់បានប៉ាន់ប្រមាណថា ការលក់យានយន្តអគ្គិសនីរបស់ក្រុមហ៊ុនតូយ៉ូតានៅឆ្នាំ២០២៥ នឹងមានប្រហែល៨០ម៉ឺនគ្រឿងរួមទាំងការលក់ឧបករណ៍ OEM ផងដែរ។
ក្រុមហ៊ុន តូយ៉ូតា បានដាក់បង្ហាញរថយន្តម៉ូដែលអគ្គិសនី ហ៊ីលុច (Hilux) ថ្មីនៅប្រទេសថៃនៅដើមឆ្នាំនេះ និងរថយន្ត SUV អគ្គិសនីនៅប្រទេសចិន និងសហរដ្ឋអាមេរិកនៅឆ្នាំក្រោយ ហើយរថយន្តអគ្គិសនីម៉ូដែល Lexus ES គ្រោងនឹងចេញលក់នៅប្រទេសជប៉ុនក្នុងឆ្នាំ២០២៥។
ក្រុមហ៊ុន តូយ៉ូតា គ្រោងនឹងដាក់បង្ហាញប្រព័ន្ធរថយន្តអគ្គិសនីជំនាន់ថ្មី ដែលចាប់ផ្តើមជាមួយនឹងម៉ូដែល Lexus ដែលនឹងដាក់លក់ក្នុងឆ្នាំ២០២៦។ ក្រុមហ៊ុននេះនឹងប្រើឧបករណ៍ដ៏ធំ ដែលអាចផលិតអាលុយមីញ៉ូមចូលទៅក្នុងផ្នែកតួរថយន្ត ជួយសន្សំសំចៃថាមពល ថវិកា និងកម្លាំងពលកម្ម។ ក្រុមហ៊ុនតូយ៉ូតាសង្ឃឹមថា នឹងអាចលក់រថយន្តអគ្គិសនីបានចំនួនជាង៣លានគ្រឿងនៅត្រឹមឆ្នាំ២០៣០ ដែលក្នុងនោះមានជិត២លានគ្រឿង នឹងប្រើប្រាស់ប្រព័ន្ធថ្មីនេះ។
យុទ្ធសាស្ត្ររួមរបស់ក្រុមហ៊ុននេះគឺការផ្ដល់តម្លៃប្រភពថាមពលទាំងអស់រួមទាំងរថយន្តសាំង និងរថយន្តកូនកាត់ជាជាងពឹងតែទៅលើរថយន្តអគ្គិសនីនាពេលអនាគត ប៉ុន្តែរថយន្តអគ្គិសនីរបស់ខ្លួនបច្ចុប្បន្នទទួលបានប្រាក់ចំណេញទាប ហើយការលក់ទៀតសោតគឺមានសន្ទុះយឺតជាងក្រុមហ៊ុន ថេស្លា និងក្រុមហ៊ុន ប៊ីវ៉ាយឌី៕
អត្ថបទ៖ សុខ ជា
