លោក សុខ ឡៃ អ្នកគ្រប់គ្រងទូទៅរបស់ក្រុមហ៊ុនពិស្ណុការ ដែលជាក្រុមហ៊ុនម៉ៅការសំណង់ដ៏ធំមួយនៅកម្ពុជា យល់ឃើញថា ការកើនឡើងការនាំចូលដែក និងដែកថែបមកកាន់ទីផ្សារកម្ពុជា នៅក្នុងរយៈពេល៧ខែកន្លងមកនេះ គឺអាចត្រូវបានជំរុញដោយតម្រូវការសាងសង់គម្រោងរបស់រដ្ឋាភិបាល ដូចជាគម្រោងព្រលានយន្តហោះថ្មី និងគម្រោងពង្រីកកំពង់ផែស្វយ័តក្រុងព្រះសីហនុ ជាដើម។
ទន្ទឹមនឹងនេះអ្នកជំនាញរូបនេះ កត់សម្គាល់ឃើញថា តម្រូវការដែកសម្រាប់បម្រើឱ្យការសាងសង់ក្នុងវិស័យឯកជនដូចជាគម្រោងលំនៅឋាន និងអគារពាណិជ្ជកម្មនានា ពុំមានកំណើនគួរឱ្យកត់សម្គាល់នោះទេ។ យ៉ាងណាក៏ដោយ លោក សុខ ឡៃ បានចាត់ទុកកំណើននៃការនាំចូលដែកនេះ គឺជាសញ្ញាវិជ្ជមានមួយ ដែលបង្ហាញពីការរីកចម្រើននៃទីផ្សារការងារនៅក្នុងស្រុក។
ស្រដៀងគ្នានេះ ឧកញ៉ា ហ៊ួត ជា អគ្គនាយកក្រុមហ៊ុន ហ៊ួត ជា ផ្គត់ផ្គង់សម្ភារសំណង់យល់ឃើញថា ទំហំកើនឡើងនៃការនាំចូលដែកមកកម្ពុជានេះ អាចដោយសារតែតម្រូវការសាងសង់នូវគម្រោងហេដ្ឋារចនាសម្ព័ន្ធធំៗរបស់រដ្ឋាភិបាល និងការសាងសង់តំបន់ឧស្សាហកម្មក្នុងតំបន់សេដ្ឋកិច្ចពិសេសជាដើម។
អ្នកជំនួញរូបនេះ ចាត់ទុកការកើនឡើងនៃការនាំចូលដែកនេះថា ជាសញ្ញាល្អសម្រាប់សេដ្ឋកិច្ចរបស់កម្ពុជា ខណៈរាជរដ្ឋាភិបាលកំពុងខិតខំទាក់ទាញអ្នកវិនិយោគនានា ឱ្យមកបណ្ដាក់ទុនវិនិយោគនៅកម្ពុជា។ បើតាមអ្នកជំនាញរូបនេះ តំបន់សេដ្ឋកិច្ចពិសេស ហាក់មានចំនួនកើនឡើងជាបន្តបន្ទាប់ ក្រោយការខិតខំប្រឹងប្រែងរបស់រដ្ឋាភិបាលកន្លងមកនេះ។
យ៉ាងណាមិញលោកឧកញ៉ា ហ៊ួត ជា កត់សម្គាល់ឃើញថា ការសាងសង់លំនៅឋានដែលជាតម្រូវការរបស់ពលរដ្ឋនៅតែមានសកម្មភាពនៅក្នុងរយៈពេល៧ខែកន្លងមកនេះ បើទោះបីមិនមានការអភិវឌ្ឍន៍គម្រោងថ្មីៗ និងគម្រោងពង្រីកក្នុងទីផ្សារលំនៅឋានក៏ដោយ។
បើតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា នៅក្នុងរយៈពេល៧ខែ ឆ្នាំ២០២៤ កម្ពុជា បាននាំចូលដែក និងដែកថែប ក្នុងទំហំទឹកប្រាក់សរុបជាង៣៥២លានដុល្លារ មានការកើនឡើងជាង៦៣% បើធៀបនឹងរយៈពេលដូចគ្នាក្នុងឆ្នាំ២០២៣៕
អត្ថបទ៖ បូ ដូឡា
