ប្រទេសចិន និងរុស្ស៊ី បោះឆ្នោតវេតូ ជំទាស់ការដាក់ទណ្ឌកម្មបន្ថែមរបស់ UN ទៅលើកូរ៉េខាងជើង

ប្រទេសចិន និងរុស្ស៊ី ដូចដែលគេបានទាយទុកមុនអ៊ីចឹង គឺបានបោះឆ្នោតវេតូ ឬជំទាស់ចំពោះការដាក់ទណ្ឌកម្មបន្ថែមទៅកូរ៉េខាងជើង ដ្បិតថា ប្រទេសទាំងពីរនេះ ត្រូវបានគេមើលឃើញថា កំពុងមានទំនាក់ទំនងជិតស្និទ្ធជាមួយកូរ៉េខាងជើងកាន់តែខ្លាំងឡើង ពិសេសក្រោយផ្ទុះសង្គ្រាមឈ្លានពាននៅអ៊ុយក្រែនមក។

ទោះយ៉ាងណា សមាជិកក្រុមប្រឹក្សាសន្ដិសុខអង្គការសហប្រជាជាតិចំនួន ១៣ ប្រទេសដែលនៅសេសសល់ បានបោះឆ្នោតគាំទ្រសេចក្តីសម្រេចដែលព្រាងដោយសហរដ្ឋអាមេរិកដែលបានស្នើឱ្យហាមឃាត់ការនាំចេញថ្នាំជក់ និងប្រេងទៅកាន់ប្រទេសកូរ៉េខាងជើង។

គួររំលឹកថា ការបោះឆ្នោតនេះបានធ្វើឡើងមួយថ្ងៃបន្ទាប់ពីកូរ៉េខាងជើងបានបាញ់សាកល្បងមីស៊ីលចំនួនបីគ្រាប់ រួមមានទាំងមីស៊ីលផ្លោងអន្តរទ្វីប (ICBM)ផងដែរ បន្ទាប់ពីមានដំណើរទស្សនកិច្ចរបស់ប្រធានាធិបតីអាមេរិកលោក Joe Biden ទៅកាន់តំបន់អាស៊ី។

ឯកអគ្គរដ្ឋទូតសហរដ្ឋអាមេរិកប្រចាំនៅអង្គការសហប្រជាជាតិ លោកស្រី លីនដា ថូម៉ាស ហ្គ្រីនហ្វៀល (Linda Thomas-Greenfield) បានសំដែងការខកចិត្តយ៉ាងខ្លាំងទៅនឹងការបោះឆ្នោតរបស់ប្រទេសចិននិងរុស្សីនៅក្នុងក្រុមប្រឹក្សាសន្ដិសុខនៃអង្គការសហប្រជាជាតិ។

បើទោះបីលោកស្រី សំដែងការខកចិត្ត តែក៏មិនភ្ញាក់ផ្អើលនឹងការបោះឆ្នោតនោះដែរ ដោយសារកូរ៉េខាងជើងបានបាញ់មីស៊ីលផ្លោងសរុបចំនួន ២៣ គ្រាប់ រួមទាំងមីស៊ីលអន្តរទ្វីប ICBM ចំនួន៦គ្រាប់រួចទៅហើយ បន្ទាប់ពីការផ្អាកមកអស់រយៈពេល ៥ ឆ្នាំកន្លងមកនេះ។ ទោះយ៉ាងណា លោកស្រីសង្កត់ធ្ងន់ថា នេះជាការគំរាមកំហែងយ៉ាងធ្ងន់ធ្ងរដល់សន្តិភាព និងសន្តិសុខពិភពលោកទាំងមូល។

ទោះបីជាបែបនេះក្តី ប្រទេសចិន និងរុស្ស៊ីបានប្រាប់ក្រុមប្រឹក្សាសន្តិសុខបន្ទាប់ពីការបោះឆ្នោតថា ពួកគេប្រឆាំងនឹងការដាក់ទណ្ឌកម្មបន្ថែមទៀតទៅលើកូរ៉េខាងជើង ដោយសង្កត់ធ្ងន់ថា អ្វីដែលចាំបាច់នៅពេលនេះ គឺសហរដ្ឋអាមេរិកគួរបន្តសារជាថ្មីនៃជំនួបទ្វេភាគីរបស់ខ្លួនជាមួយកូរ៉េខាងជើងវិញ។

ឯកអគ្គរដ្ឋទូតរុស្ស៊ីប្រចាំអង្គការសហប្រជាជាតិ លោក វ៉ាស៊ីលី នេបេនហ្ស៊ី (Vassily Nebenzia) បាននិយាយថា ទីក្រុងមូស្គូបានប្រាប់សហរដ្ឋអាមេរិកម្តងហើយម្តងទៀតថា ការដាក់ទណ្ឌកម្មថ្មីប្រឆាំងនឹងកូរ៉េខាងជើងនេះគឺជា "ផ្លូវទៅកាន់ទីបញ្ចប់ដ៏ងងឹតសូន្យឈឹង" ដោយបានសង្កត់ធ្ងន់ថា ការដាក់សម្ពាធទណ្ឌកម្មបន្ថែមទៀតលើទីក្រុងព្យុងយ៉ាងគឺគ្មានប្រសិទ្ធភាព និងជាទង្វើអមនុស្សធម៌ ។

ឯកអគ្គរដ្ឋទូតប្រទេសចិនប្រចាំអង្គការសហប្រជាជាតិ លោក ហ្ស៊ាង ជុន (Zhang Jun) វិញបាននិយាយថា ការដាក់ទណ្ឌកម្មបន្ថែមប្រឆាំងនឹងកូរ៉េខាងជើង នឹងមិនអាចជួយអ្វីបានទេ ហើយនឹងនាំទៅរក "ផលប៉ះពាល់ជាអវិជ្ជមាន និងការកើនឡើងនៃការប្រឈមមុខដាក់គ្នាក្នុងតំបន់តែប៉ុណ្ណោះ" ។ លោកបានស្តីបន្ទោសសហរដ្ឋអាមេរិកចំពោះការមិនបន្តឡើងវិញនូវជំនួបទ្វេភាគីជាមួយកូរ៉េខាងជើង ដែលមើលឃើញថាមានផលវិជ្ជមាន ក្នុងអំឡុងពេលពិភាក្សាជាមួយរដ្ឋការលោក Trump កាលពីឆ្នាំ ២០១៨ កន្លងទៅ។

គួរបញ្ជាក់ថា មហាសន្និបាតនៃអង្គការសហប្រជាជាតិនឹងពិភាក្សាអំពីរឿងប្រទេសកូរ៉េខាងជើងនេះ ក្នុងរយៈពេលពីរសប្តាហ៍ខាងមុខ ក្រោមច្បាប់ថ្មីដែលតម្រូវឱ្យមានវត្តមានសមាជិកទាំងអស់របស់ខ្លួនចំនួន ១៩៣ ប្រទេសជួបប្រជុំគ្នា រាល់ពេលដែលមានការវេតូជំទាស់នៅក្នុងក្រុមប្រឹក្សាសន្តិសុខ ដោយសមាជិកអចិន្ត្រៃយ៍ណាមួយក្នុងចំណោមសមាជិកអចិន្រ្តៃយ៍ទាំងប្រាំគឺ រុស្ស៊ី ចិន សហរដ្ឋអាមេរិក បារាំង និងអង់គ្លេស៕

អត្ថបទ៖ ហ៊ុន គន្ធថៃ