ប្រទេសបង់ក្លាដែស បានជួបប្រទះភាពចលាចលជិតមួយខែមកហើយ បន្ទាប់ពីមានចលនារបស់និស្សិតទ្រង់ទ្រាយធំ ដែលទាមទារឱ្យលុបចោលប្រព័ន្ធកូតាការងាររដ្ឋសម្រាប់កូនអ្នកនយោបាយ បានធ្វើឱ្យមានការប៉ះទង្គិចគ្នាដោយហិង្សា ដោយគេបានឃើញកងកម្លាំងប៉ូលិស ទាហាន និងក្រុមគាំទ្ររដ្ឋាភិបាល បានវាយប្រហារក្រុមបាតុករប្រឆាំងរដ្ឋាភិបាល។
សកម្មជនសិទ្ធិមនុស្សបានរាយការណ៍ថា មនុស្សយ៉ាងតិច២៦៦នាក់ ដែលភាគច្រើនជានិស្សិតត្រូវបានសម្លាប់ ហើយជាង៧ពាន់នាក់ទៀតបានរងរបួសនៅក្នុងការបង្ក្រាបទៅលើក្រុមបាតុករនៅរង្វង់សប្តាហ៍ទីបីនៃខែកក្កដា។ ពេលនេះក្រុមតវ៉ាបានទាមទារឱ្យដោះលែងនិស្សិតដែលត្រូវបានចាប់ខ្លួនទាំងអស់ ដកតំណែងទេសរដ្ឋមន្ត្រីទទួលបន្ទុកសន្តិសុខ និងច្បាប់ចេញពីខុទ្ទកាល័យ និងកាត់ទោសបុគ្គលិកសន្តិសុខពាក់ព័ន្ធនឹងការសម្លាប់ក្រុមបាតុករ ហើយទោះបីជាបានទាមទារបែបនេះក្ដី ក៏អាជ្ញាធរនៅតែបន្តការបង្ក្រាបដោយចាប់ខ្លួននិស្សិតរាប់ពាន់នាក់នៅទូទាំងប្រទេសនេះ។
ការបង្ក្រាបយ៉ាងឃោរឃៅរបស់អាជ្ញាធរបង់ក្លាដែសនេះ មិនត្រឹមតែមិនធ្វើឱ្យការបាតុកម្មមានភាពធូរស្បើយនោះទេ តែបានធ្វើឱ្យការបាតុកម្មរីករាលដាលកាន់តែធំឡើងៗរហូតដល់ស្រទាប់មហាជន។ ពេលនេះក្រុមគ្រូបង្រៀននៅសកលវិទ្យាល័យ ឪពុកម្តាយ សិល្បករល្បីៗ មេធាវី និងប្រជាពលរដ្ឋផ្សេងទៀតកំពុងចូលរួមធ្វើបាតុកម្មនេះ ដោយប្រែក្លាយបាតុកម្មនេះទៅជាចលនាប្រជាជនប្រឆាំងនឹងរបបនាយករដ្ឋមន្ត្រីលោកស្រី ស៊េក ហាស៊ីណា (Sheikh Hasina)។
ក្រៅពីការបង្ក្រាបដោយហិង្សា អាជ្ញាធរបង់ក្លាដែសបានដាក់ចេញបម្រាមគោចរ និងផ្តាច់អ៊ីនធឺណិត ដើម្បីបំបែកក្រុមបាតុករ និងបញ្ចប់សកម្មភាពបាតុកម្មនៅក្នុងប្រទេស។ ប៉ុន្តែចំណាត់ការនេះមិនត្រឹមតែមិនអាចបញ្ឈប់សកម្មភាពបាតុកម្មរបស់ក្រុមបាតុករនោះទេ ថែមទាំងអាចធ្វើឱ្យប្រទេសដែនកោះនេះខាតបង់សេដ្ឋកិច្ចរហូតដល់១០ពាន់លានដុល្លារបន្ថែមទៀត។
លោកស្រី ហាស៊ីណា ដែលបានកាន់តំណែងជានាយករដ្ឋមន្ត្រីបង់ក្លាដែស តាំងពីឆ្នាំ២០០៩ ត្រូវបានចោទប្រកាន់ពីបទផ្តាច់ការ និងអំពើពុករលួយ ហើយលោកស្រី ក៏បានរងការចោទប្រកាន់ពីការក្លែងបន្លំសន្លឹកឆ្នោតក្នុងការបោះឆ្នោតសកល៣លើកចុងក្រោយផងដែរ ដោយគណបក្សប្រឆាំង និងអ្នកសង្កេតការណ៍អន្តរជាតិ បានលើកឡើងពីភាពមិនប្រក្រតីយ៉ាងទូលំទូលាយលើបញ្ហានេះ។ ក្រុមសិទ្ធិមនុស្ស ក៏ចោទប្រកាន់លោកស្រី ពីបទប្រើក្បាលម៉ាស៊ីនរដ្ឋមិនត្រឹមត្រូវ ដើម្បីរក្សាអំណាចរបស់ខ្លួន រារាំងអ្នកប្រឆាំង និងសម្លាប់សកម្មជនបក្សប្រឆាំងក្រៅប្រព័ន្ធតុលាការផងដែរ៕
អត្ថបទ៖ សុខ មង្គល
