សភាសហភាពអឺរ៉ុបបោះឆ្នោតគាំទ្រការហាមប្រាមទំនិញ ដែលប្រើកម្លាំងពលកម្មដោយបង្ខំ

ក្រុមសិទ្ធិមនុស្សបាននិយាយថា មនុស្សយ៉ាងតិច១លាននាក់ ដែលភាគច្រើនជាជនជាតិភាគតិចមូស្លីមវីហ្គ័រត្រូវបានឃុំខ្លួននៅតំបន់ស៊ីនជាំង ភាគពាយ័ព្យនៃប្រទេសចិន ដោយពួកគេកំពុងប្រឈមនឹងការរំលោភបំពានជាបន្តបន្ទាប់រួមទាំងការបង្ខំឱ្យស្ត្រីឈប់យកកូន និងពលកម្មដោយបង្ខំផងដែរ។ កត្តានេះបានជំរុញឱ្យសភាសហភាពអឺរ៉ុប តាក់តែងសេចក្ដីព្រាងច្បាប់ស្ដីពីការហាមឃាត់ផលិតផលដែលប្រើកម្លាំងពលកម្មដោយបង្ខំ ដែលទើបត្រូវបានអនុម័តជាលើកចុងក្រោយកាលពីថ្ងៃអង្គារ កន្លងទៅ។

នៅក្នុងរយៈពេលកន្លងមកនេះ សហភាពអឺរ៉ុប បានបង្កើតឧបករណ៍ពាណិជ្ជកម្មជាច្រើន ដើម្បីប្រឆាំងនឹងប្រទេសចិន រួមទាំងការស៊ើបអង្កេតប្រឆាំងការឧបត្ថម្ភធនរបស់រដ្ឋចិន ចំពោះបច្ចេកវិទ្យាបៃតងដូចជាបន្ទះស្រូបពន្លឺព្រះអាទិត្យជាដើម ប៉ុន្តែច្បាប់ចុងក្រោយនេះត្រូវបានបង្កើតឡើងដើម្បីលុបបំបាត់ផលិតផល​ដែលប្រើកម្លាំងពលកម្មដោយបង្ខំចេញពីទីផ្សារអឺរ៉ុបតែម្តង។

តាមច្បាប់ចុងក្រោយនេះ បណ្ដារដ្ឋសហភាពអឺរ៉ុបអាចដកចេញផលិតផលណាដែលរកឃើញថា ត្រូវបានផលិតដោយប្រើកម្លាំងពលកម្មដោយបង្ខំ និងអាចដកចេញទំនិញណាដែលផលិតនៅក្នុងប្លុកដែលមានសម្ភារផលិតនៅបរទេសដោយប្រើកម្លាំងពលកម្មទាំងបង្ខំផងដែរ។

សមាជិកសភាសហភាពអឺរ៉ុប លោកស្រី ម៉ារី ម៉ាញូអែល ឡេតៅ (Maria Manuel Leitao) បាននិយាយថា វាមិនអាចទទួលយកបានទេ សម្រាប់សហភាពអឺរ៉ុបក្នុងការបន្តការនាំចូល និងការលក់នូវផលិតផលណា ដែលផលិតឡើងដោយឈាម និងទឹកភ្នែករបស់ពលរដ្ឋ។ បើតាមអង្គការពលកម្មអន្តរជាតិ បានឱ្យដឹងថា មនុស្សប្រហែលជាង២៧ លាននាក់ បានពាក់ព័ន្ធក្នុងការងារដោយបង្ខំនៅក្នុងឆ្នាំ២០២១ រួមទាំងកុមារប្រហែលជាង៣ លាននាក់ផងដែរ៕

អត្ថបទ៖ សុខ មង្គល