ទីបំផុត លោកប្រាយុទ្ធចាន់អូចាបានទៅរួមរស់ជាមួយគណបក្សថ្មីហើយ ដើម្បីឈរឈ្មោះបោះឆ្នោតជានាយករដ្ឋមន្ត្រីម្ដងទៀត

អតីតឧត្តមសេនីយ៍វ័យ ៦៨ឆ្នាំ ដែលបានកាន់អំណាចចាប់តាំងពីបានដឹកនាំរដ្ឋប្រហារក្នុង២០១៤ រូបនេះ ធ្លាប់បានប្រកាសកាលពីដើមខែធ្នូឆ្នាំ២០២២ថា លោកត្រៀមខ្លូនរួចជាស្រេចដើម្បីដឹកនាំប្រទេសតទៅមុខទៀត បើទោះបីជារដ្ឋធម្មនុញ្ញនៃប្រទេសថៃបានកំណត់ឱ្យលោកកាន់អំណាចបានសរុប៨ឆ្នាំក៏ដោយ ខណៈពេលនេះលោកមានពេលអាចកាន់អំណាចបានពីរឆ្នាំទៀត។

បើតាមការស្ទង់មតិលើជម្រើសសម្រាប់នាយករដ្ឋមន្ត្រីថៃបន្ទាប់ បច្ចុប្បន្នលោកប្រាយុទ្ធកំពុងឈរនៅលំដាប់កំពូលគេ តាមពីក្រោយដោយលោកស្រី យីងឡាក់ ស៊ីនណាវ៉ាត់ត្រា(Yingluck Shinawatra) ដែលត្រូវបានទម្លាក់ដោយរដ្ឋប្រហារកាលពីឆ្នាំ២០១៤កន្លងទៅនោះ។

នៅឯពិធីសម្ពោធគណបក្សថៃរួបរួមជាតិ (United Thai Nation) ថ្មីដែលលោកបានចូលមករួមរស់លោក ប្រាយុទ្ធបានប្រាប់សមាជិបក្ស និងអ្នកគាំទ្រ ដែលមកចូលរួមប្រហែល១ម៉ឺននាក់ថា៖ អ្វីៗជាច្រើនត្រូវបន្ត ហើយត្រូវធ្វើបន្ថែមទៀតដើម្បីឱ្យប្រទេសឆ្ពោះទៅមុខ។ លោកនិយាយច្បាស់ៗថា៖ «ខ្ញុំមកទីនេះថ្ងៃនេះ មិនមែនមកពីខ្ញុំចង់បានអំណាចទេ ប៉ុន្តែដោយសារថៃត្រូវបន្តទៅមុខទៀត»។

គួរជម្រាបដែរថា ការបោះឆ្នោតនៅប្រទេសថៃគ្រោងធ្វើឡើងនៅខែឧសភាឆ្នាំ២០២៣នេះហើយ ប៉ុន្តែមែនទែនទៅ គណបក្សថ្មីដែលលោកប្រាយុទ្ធចូលរួមនេះ គឺនៅមិនទាន់ប្រកាសពីបេក្ខភាព នាយករដ្ឋមន្ត្រីជាផ្លូវការនៅឡើយទេ។

គួរកត់សម្គាល់ ក្នុងអំឡុងពេលកាន់អំណាចជាងប្រាំបីឆ្នាំមកនេះ លោក ប្រាយុទ្ធ បានរួចផុតពីបញ្ហាប្រឈមជាច្រើន ដូចជាការជម្រះក្តីដោយតុលាការធម្មនុញ្ញ ការបោះឆ្នោតដកសេចក្តីទុកចិត្តពីសភា និងបាតុកម្មទាមទារឱ្យចេញពីតំណែងរបស់ពលរដ្ឋជាច្រើនដង៕