ពិភពលោកនៅតែបន្តបង្ហាញពីការប្តេជ្ញាចិត្តនៅក្នុងការបញ្ចប់ឲ្យបាននូវកិច្ចព្រមព្រៀងពន្ធជាសកល

អង្គការដើម្បីកិច្ចសហប្រតិបត្តិការសេដ្ឋកិច្ច និងអភិវឌ្ឍន៍ បានអះអាងថា គោលដៅនេះមិនទាន់អាចសម្រេចទៅបាន ក៏ដោយសារប្រទេសធំៗមួយចំនួននៅមានភាពស្ទាក់ស្ទើរ។ នេះបើយោងតាមការចុះផ្សាយដោយសារព័ត៌មានធំៗជាច្រើន។

អង្គការដើម្បីកិច្ចសហប្រតិបត្តិការសេដ្ឋកិច្ច និងអភិវឌ្ឍន៍ ហៅកាត់ (OECD) នៅតែមើលឃើញពីការប្តេជ្ញាចិត្តជារួមពីបណ្តាប្រទេស ដែលស្វែងរកការបញ្ចប់កិច្ចព្រមព្រៀងពន្ធសកល ស្តីពីពហុជាតិ ដែលរកបានប្រាក់ចំណេញខ្ពស់ បន្ទាប់ពីបានពន្យារពេលជាច្រើនខែ និងការស្ទាក់ស្ទើរពីសំណាក់ប្រទេសធំៗមួយចំនួន។ អង្គការ OECD បានអះអាងថា កតិកាសញ្ញានេះ ជាកិច្ចព្រមព្រៀងដំបូងបង្អស់នៃការត្រួតពិនិត្យពន្ធសាជីវកម្មឆ្លងព្រំដែនពីរ ដែលបានព្រមព្រៀងក្នុងឆ្នាំ២០២១។ កតិកាសញ្ញានេះ មានបំណងជំនួសពន្ធលើសេវាកម្មឌីជីថលឯកតោភាគីជាមួយនឹងច្បាប់ថ្មីសម្រាប់ការចែករំលែកសិទ្ធិពន្ធលើក្រុមហ៊ុនដូចជា Alphabet's Google និង Amazon និង Apple ជាដើម ។

លោកស្រី ម៉ាណាល់ ខ័វិន (Manal Corwin) មន្រ្តីនៃអង្គការ OECD បានលើកឡើងថា ទោះបីគោលដៅកំណត់មិនទាន់ទទួលបានជោគជ័យក៏ពិតមែន តែក្រុមមន្រ្តីប្រទេសនានា នៅតែមានការប្តេជ្ញាចិត្ត១០០% ក្នុងការធ្វើឱ្យកិច្ចព្រមព្រៀងពន្ធជាសកលនេះលេចចេញជារូបរាងនាពេលអនាគត។

ទាក់ទងនឹងបញ្ហាពន្ធសកលនេះ ទីក្រុងវ៉ាស៊ីនតោន បាននិយាយថា ប្រទេសឥណ្ឌា ចិន និងអូស្ត្រាលីនៅតែរក្សាការទាមទាររបស់ខ្លួនលើមធ្យោបាយនៃការគណនាពន្ធនៃការផ្ទេរប្រាក់។ ទន្ទឹមនឹងនេះ បណ្តាប្រទេសនានា បានចាប់ផ្តើមអនុវត្តសសរស្តម្ភទីពីរនៃកិច្ចព្រមព្រៀងពន្ធសកលឆ្នាំ២០២១ ដោយពួកគេបានយល់ព្រមកំណត់អត្រាពន្ធសាជីវកម្មអប្បបរមា១៥%។

អង្គការ OECD បាននិយាយថា ជាផ្នែកនៃការអនុវត្តសសរស្តម្ភទីពីរ មានប្រទេសចំនួន១៩ បានចុះហត្ថលេខាកាលពីថ្ងៃព្រហស្បតិ៍ និងបានប្តេជ្ញាចុះហត្ថលេខាលើសន្ធិសញ្ញាដែលអនុញ្ញាតឱ្យប្រទេសកំពុងអភិវឌ្ឍន៍យកពន្ធលើការទូទាត់ផ្ទៃក្នុងរបស់ក្រុមហ៊ុនក្រៅប្រទេសមួយចំនួន៕

ដោយៈ សរ សុជាតិ