នៅក្នុងខណៈពេលដែលដំណើរការកសាងរដ្ឋធានី នូសាន់តារ៉ា ដែលមានតម្លៃសរុបប្រមាណជា ៣៥ ពាន់លានដុល្លារ កំពុងតែសម្រុក ហើយរដ្ឋបាលរបស់ប្រទេសគ្រោងនឹងរុះរើនៅក្នុងឆ្នាំ២០២៤ ខាងមុខនេះ ប៉ុន្តែ រដ្ឋបាលទីក្រុងហ្សាកាតា បានប្រាប់ពលរដ្ឋនិងសហគ្រិននៅក្នុង ប្រទេសថា ហ្សាកាតានឹងនៅតែជាទីក្រុងពាណិជ្ជកម្មដ៏ចំបងរបស់ប្រទេសដដែលទោះបីជាមាន ការផ្លាស់ប្តូរដ្ឋធានី។
លោកស្រី ស្រ៊ី ហាយ៉ាទី (Sri Haryati) មន្រ្តីជាន់ខ្ពស់នៅរដ្ឋបាលរដ្ឋធានីហ្សាកាតា បានប្រាប់ទីភ្នាក់ងារសារព័ត៌មាន អង់តារ៉ា ថា ស្របតាមការណែនាំរបស់លោកប្រធានាធិបតី ចូកូវី ទីក្រុងហ្សាកាតានឹងនៅតែជាទីក្រុងពាណិជ្ជកម្ម ដែលជាទីក្រុងសេដ្ឋកិច្ចខ្នាតពិភពលោក ។
លោកស្រីបានកត់សម្គាល់ថា រដ្ឋាភិបាលកណ្តាលកំពុងបន្តធ្វើការពិភាក្សាលើការរក្សាស្ថិរភាពសេដ្ឋកិច្ចរបស់ទីក្រុងហ្សាកាតានាពេលអនាគតបន្ទាប់ពីការផ្លាស់ប្តូរទៅរដ្ឋធានីថ្មី។
អត្ថបទគួរអាន
លោកស្រីបានបន្តថា ទីក្រុងហ្សាការតាបានចូលរួមចំណែកពី ១៦ទៅ១៧ ភាគរយដល់សេដ្ឋកិច្ចឥណ្ឌូនេស៊ី ដូច្នេះស្ថិរភាពសេដ្ឋកិច្ចរបស់ហ្សាកាតានឹងប៉ះពាល់ដល់សេដ្ឋកិច្ចឥណ្ឌូនេស៊ីយ៉ាងខ្លាំង ប្រសិនបើមិនមានការរៀបចំត្រឹមត្រូវទេនោះ។
លោកស្រីបានបន្តថា រដ្ឋាភិបាលក្នុងតំបន់មិនអាចការពារសេដ្ឋកិច្ចរបស់ទីក្រុងហ្សាការតាដោយគ្មានជំនួយពីភាគីផ្សេងទៀតឡើយ ដូច្នេះលោកស្រី បានស្នើឱ្យតួអង្គអាជីវកម្ម រួមទាំងសហគ្រិនលក់រាយ សហការគ្នាក្នុងការគាំទ្រសេដ្ឋកិច្ចទីក្រុង។
មកដល់ពេលនេះនៅទីក្រុងហ្សាកាតាទាំងមូល មានមជ្ឈមណ្ឌលពាណិជ្ជកម្មសរុបប្រមាណជា ៩៦ កន្លែងដោយនៅក្នុងនោះមាន ផ្សារទំនើបធំៗ ៧៦ កន្លែង និង មជ្ឈមណ្ឌលពាណិជ្ជកម្ម ២០ កន្លែង ។
ហ្សាកាតាត្រូវបានគេដឹងថា គឺជាទីក្រុងចំណាស់បំផុតមួយនៅក្នុងចំណោមទីក្រុងដែលមានមនុស្សច្រើនបំផុតនៅលើពិភពលោក ។ នៅលើដែនដីរដ្ឋបាលដែលមានទំហំ៦៦៤ គីឡូម៉ែត្រការ៉េ ទីក្រុងនេះមានប្រជាពលរដ្ឋសរុប រហូតដល់ទៅ ជាង ១០ លាននាក់ ដោយនៅក្នុងនោះ មានតង់ស៊ីតេពលរដ្ឋសរុប គឺ ជាង១៥ ៩០០ នាក់នៅក្នុងមួយគីឡូម៉ែត្រការ៉េ ។ ដោយឡែកទីក្រុងនូសាន់តារ៉ា វិញ ត្រូវបានគេដឹងថា មានផ្ទៃដីសរុប ២ ៥៦០ គីឡូម៉ែត្រការ៉េ ដែលកំពុងតែកសាងឡើង នៅក្រោមទឹកប្រាក់សរុប ប្រមាណជា ៣៥ ពាន់លានដុល្លារ ។ ដំណើរការកសាងទីក្រុងថ្មី នេះ បានប្រើប្រាស់កម្មករប្រមាណជា ពី ១៥០ ០០០ ទៅ ២០០ ០០០ នាក់ ដោយដំណាក់កាលទី១ចាប់ផ្តើមកាលពីខែ សីហា ឆ្នាំ២០២២ ។ គម្រោងកសាងទីក្រុងនេះ មានរយៈពេលដល់ទៅ ៥ ដំណាក់កាល ហើយគ្រោងនឹងបញ្ចប់នៅក្នុងឆ្នាំ ២០៤៥ ឯណោះ៕
