លោកស្រី ប៉ុង លីមសាន ក៏ត្រូវបានគេស្គាល់ថាជាអ្នកនៅពីក្រោយការបង្កើត App «ពេទ្យយើង» ដែលជាប្រព័ន្ធគ្រប់គ្រងមន្ទីរពេទ្យបែបឌីជីថល ។
នៅពេលសួរអំពីថាតើសម្រាប់ start-up (អាជីវកម្មចាប់ផ្ដើមថ្មី) មានគន្លឹះសំខាន់ៗអ្វីខ្លះ ដើម្បីជំរុញឲ្យ startup ដំណើរការទៅបាន លោកស្រី ប៉ុង លីមសាន បានប្រាប់ពីគន្លឹះសំខាន់បំផុតចំនួន ៣ចំណុច យ៉ាងដូច្នេះថា «Start-up សម្រាប់ខ្ញុំផ្ទាល់ មាន ៣ចំណុចសំខាន់ ដើម្បីឲ្យ startup នោះដើរ ។ សំខាន់ទី១ គឺពេលវេលា គឺ invest ទាំងអស់ ហើយបើសិនគាត់ start-up សុំកុំទៅធ្វើការឲ្យគេ មានន័យថា គាត់ត្រូវដាក់ពេលវេលាគាត់ ១០០% មកធ្វើរឿងហ្នឹង ...បើសិនគាត់ឆ្លៀតទៅធ្វើការឲ្យគេផង ធ្វើការងារខ្លួនគាត់ផង ខ្ញុំគិតថា នឹងធ្វើឲ្យ start-up គាត់ដើរយឺត ។»
អត្ថបទទាក់ទង
លោកស្រី លីមសាន បានបន្ថែមថា ៖ «ទី២ គាត់ត្រូវរៀបចំរចនាសម្ព័ន្ធក្រុមហ៊ុនឲ្យបានត្រឹមត្រូវតាមស្តង់ដារ ជាពិសេស រៀបចំ finance [ហិរញ្ញវត្ថុ] ។ ស្តង់ដារ គឺមានន័យថា គាត់ត្រូវជួលក្រុមហ៊ុន accounting ឬ finance ឲ្យរៀបចំប្រព័ន្ធ business គាត់ឲ្យហើយ ។ ចុងក្រោយគេ គឺ ស្រឡាញ់ហើយចេះខ្លួនឯងទៀត ។ តើបើឃើញគេធ្វើ ធ្វើដែរ គាត់កូពី [copy] គាត់លួចពីគេ ខ្ញុំអត់ support ទេ ។ បើក្ដីស្រឡាញ់ខាងហ្នឹង ចេះដឹងខាងហ្នឹង សឹមធ្វើ ។»
សូមបញ្ជាក់ថា កម្មវិធី «ពេទ្យយើង» គឺជា App ដែលប្រើប្រាស់សម្រាប់គ្រប់គ្រងប្រតិបត្តិការមន្ទីរពេទ្យ ឬគ្លីនិកនានា តាមបែបឌីជីថល ដូចជា ការរក្សាកំណត់ត្រាអ្នកជំងឺ គ្រប់គ្រងស្តុកឱសថ ស្តុកសម្ភារមន្ទីរពេទ្យ គ្រប់គ្រងទៅលើគណនេយ្យលំហូរសាច់ប្រាក់ និង ធនធានមនុស្ស។ រហូតមកដល់ពេលថ្មីៗ នេះ មន្ទីរពេទ្យ គ្លីនិក រដ្ឋ និង ឯកជនចំនួនជាង ១៣០ ហើយដែលបានតំឡើង និង ប្រើប្រាស់កម្មវិធី «ពេទ្យយើង» យ៉ាងពេញលេញនៅទូទាំងប្រទេសកម្ពុជា ៕
