សមាគមមីក្រូហិរញ្ញវត្ថុរកមិនឃើញមានករណីគ្រឹះស្ថានហិរញ្ញវត្ថុគាបសង្កត់អតិថិជន ដូចការចុះផ្សាយរបស់សារព័ត៌មានបរទេស

សមាគមមីក្រូហិរញ្ញវត្ថុកម្ពុជា បានអះអាងថា ខ្លួនមិនបានរកឃើញភស្ដុតាងណាមួយបង្ហាញថាមានការគាបសង្កត់ ឬការប្រព្រឹត្តទង្វើអសីលធម៌ណាមួយពីគ្រឹះស្ថានហិរញ្ញវត្ថុ ឬបុគ្គលិកមកលើអតិថិជនរបស់ខ្លួននោះឡើយ។

ការចេញមកអះអាងបែបនេះធ្វើឡើងដើម្បីឆ្លើយតបទៅនឹងការចុះផ្សាយរបស់សារព័ត៌​មានបរទេសមួយចំនួនកាលពីពេលថ្មីៗ ដែលបានចោទប្រកាន់ថា វិស័យមីក្រូហិរញ្ញវត្ថុរបស់កម្ពុជាកំពុងរងការវាយប្រហារដោយសារការទារប្រាក់កម្ចីដ៏ឃោឃៅពីសំណាក់មន្ត្រីឥណទានមកលើកូនបំណុល រហូតធ្វើឱ្យបំណុលខ្លះត្រូវបង្ខំលក់ដីធ្លី ឬបង្ខំឱ្យកូនទៅធ្វើការទាំងស្ថិតក្នុងវ័យសិក្សា ដើម្បីជួយដោះស្រាយបំណុល និងមានកូនបំណុលខ្លះបានធ្វើអត្តឃាតជាដើម។

យ៉ាងណាក៏ដោយសមាគមមីក្រូហិរញ្ញវត្ថុកម្ពុជាអះអាងថា ខ្លួននឹងបន្តតាមដានការអនុវត្តរបស់គ្រឹះស្ថានមីក្រូហិរញ្ញវត្ថុជាសមាជិក ដើម្បីធានាបាននូវការអនុវត្តល្អៗជូនអតិថិជន។

ទន្ទឹមនឹងនេះ សមាគមមីក្រូហិរញ្ញវត្ថុកម្ពុជាក៏បានព្រមានមិនអត់ឱនចំពោះគ្រឹះស្ថានហិរញ្ញវត្ថុណា ដែលអនុវត្តផ្តល់កម្ចីដែលគ្មានវិន័យឥណទាន ឬប្រព្រឹត្តិអំពើមិនសមរម្យណាមួយលើអតិថិជន។

លោក កាំង តុងងី ប្រធាននាយកដ្ឋានទំនាក់ទំនងនៃសមាគមមីក្រូហិរញ្ញវត្ថុកម្ពុជា បានកត់សម្គាល់ដោយផ្អែកតាមរបាយការណ៍សវនកម្មផ្ទៃក្នុងរបស់គ្រឹះស្ថានពាក់ព័ន្ធថា ករណីការចោទប្រកាន់ខាងលើអាចជាប់ពាក់ព័ន្ធជាមួយបំណុលក្រៅប្រព័ន្ធ បញ្ហាក្នុងគ្រួសារ និងកតា្តធ្លាក់ចុះប្រាក់ចំណូលរបស់ប្រជាពលរដ្ឋដោយសារបញ្ហាសេដ្ឋកិច្ច តែរបាយការណ៍នេះមិនបានរកឃើញជាប់ពាក់ព័ន្ធជាមួយគ្រឹះស្ថានមីក្រូហិរញ្ញវត្ថុឡើយ។ ប្រធាននាយកដ្ឋានរូបនេះបន្តថា ជាទូទៅគ្រឹះស្ថានរក្សាភាពវិជ្ជាជីវៈក្នុងការដោះស្រាយបញ្ហាជាមួយអតិថិជន ហើយប្រសិនបើអតិថិជនជួបប្រទះបញ្ហាក្នុងការសងត្រលប់ អតិថិជនអាចស្នើគ្រឹះស្ថានក្នុងការរៀបចំឥណទានឡើងវិញ ដើម្បីបន្ធូរបន្ថយសម្ពាធសាច់ប្រាក់របស់ខ្លួន។ លើសពីនេះ សមាគមមីក្រូហិរញ្ញវត្ថុកម្ពុជា នឹងចាត់វិធានការចំពោះគ្រឹះស្ថានហិរញ្ញវត្ថុ ឬបុគ្គលិករបស់គ្រឹះស្ថានហិរញ្ញវត្ថុណា ដែលអនុវត្តផ្ដល់កម្ចី ដែលគ្មានវិន័យឥណទានរបស់សមាគមមីក្រូហិរញ្ញវត្ថុកម្ពុជា។

សូមបញ្ជាក់ថា វិស័យមីក្រូហិរញ្ញវត្ថុ បានដើរតួនាទីយ៉ាងសំខាន់ក្នុងការជួយជំរុញកំណើនសេដ្ឋកិច្ច និងកាត់បន្ថយភាពក្រីក្រ ពិសេសតាមបណ្តាលខេត្ត ឬតាមជនបទ ហើយវិស័យនេះគឺជាសសៃឈាមក្នុងការជួយគាំទ្រជាដើមទុនសម្រាប់វិស័យផ្សេងៗទៀត ក្នុងការពង្រើកអាជីវកម្ម និងផលិតកម្ម។ តែយ៉ាងណាសម្រាប់លោក កាំង តុងងី ការរីកចម្រើនដ៏ឆាប់រហ័សនៃវិស័យនេះ ក៏បាននាំមកនូវបញ្ហាប្រឈមថ្មីៗមួយចំនួន រួមទាំងកង្វះនូវចំណេះដឹងហិរញ្ញវត្ថុក្នុងចំណោមពលរដ្ឋខ្មែរផងដែរ។ ម្យ៉ាងវិញទៀត វិស័យហិរញ្ញវត្ថុមានទំនាក់ទំនងយ៉ាងជិតស្និតជាមួយវិស័យផ្សេងៗ ដូច្នេះនៅពេលវិស័យផ្សេងៗជួបបញ្ហា ដូចជាកំណើនសេដ្ឋកិច្ចធ្លាក់ចុះ វិស័យហិរញ្ញវត្ថុក៏រងផលប៉ះពាល់ដោយប្រយោលដូចគ្នា។

យ៉ាងណាក៏ដោយ សមាគមមីក្រូហិរញ្ញវត្ថុកម្ពុជា រួមជាមួយសមាជិក និងអ្នកពាក់ព័ន្ធកំពុងដោះស្រាយនូវបញ្ហាប្រឈមយ៉ាងសកម្មតាមរយៈគំនិតផ្តួចផ្តើមថ្មីៗ ដូចជាវិធានផ្តល់ឥណទានសម្រាប់គ្រប់គ្រងបំណុលច្រើនលើសលុប ស្តង់ដារកិច្ចសន្យាឥណទាន ដើម្បីបង្កើនតម្លាភាព និងកិច្ចការពារអតិថិជន គម្រោងសុវត្ថិភាពហិរញ្ញវត្ថុសហគមន៍ ដើម្បីលើកកម្ពស់ចំណេះដឹងហិរញ្ញវត្ថុ សិទ្ធិ និងកិច្ចការពារអ្នកប្រើប្រាស់តាមកម្រិតមូលដ្ឋាន និងយុទ្ធនាការណ៍លើកម្ពស់ចំណេះដឹងហិរញ្ញវត្ថុជាដើម៕