![ហេដ្ឋារចនាសម្ព័ន្ធ](https://cdn.cambonomist.com/media/images/Philliphine.2e16d0ba.fill-960x540.jpg)
រដ្ឋមន្ត្រីក្រសួងកសិកម្មហ្វីលីពីន លោក ហ្វ្រេនស៊ីស្កូ ធៀ ឡូរ៉េល ជូនៀ (Francisco Tiu Laurel Jr.) បាននិយាយកាលពីថ្ងៃអង្គារ ក្នុងវេទិកាធុរកិច្ចក្នុងទីក្រុងម៉ានីលថា ប្រទេសអាស៊ីអាគ្នេយ៍មួយនេះគ្រោងនឹងប្រើពេល២៧ឆ្នាំ ក្នុងការវិនិយោគលើហេដ្ឋារចនាសម្ព័ន្ធកសិកម្ម ហើយថា ផែនការពង្រីកកំពង់ផែទឹកជ្រៅថែមទៀតនឹងជួយកែលម្អវិស័យកសិកម្មរបស់ខ្លួន។
លោក Laurel បាននិយាយក្នុងព្រឹត្តិការណ៍នៅមជ្ឈមណ្ឌលពាណិជ្ជកម្មពិភពលោកក្នុងរដ្ឋធានីម៉ានីលថា ប្រសិនបើហ្វីលីពីន ចង់កាត់បន្ថយថ្លៃដើមសម្រាប់ការបង្កបង្កើនផលពោត ស្រូវ និងដំណាំដែលប្រើជីផ្សេងទៀត ហ្វីលីពីនត្រូវការសាងសង់កំពង់ផែបន្ថែមទៀត។ ដូច្នេះហើយ ហ្វីលីពីនគ្រោងនឹងសាងសង់កំពង់ផែថ្មីចំនួន១៧កន្លែងថែមទៀត នៅទូទាំងប្រទេសនេះ។
ប្រទេសហ្វីលីពីនបានផ្តល់ថវិកាដល់នាយកដ្ឋានកសិកម្មប្រហែល៣,៦ពាន់លានដុល្លារសម្រាប់ឆ្នាំសារពើពន្ធ២០២៤។ លោក Laurel បាននិយាយថា លោកមានបំណងបង្កើនចំនួននេះទ្វេដងនៅឆ្នាំ២០២៥ ចំពេលមានការព្រួយបារម្ភកាន់តែខ្លាំងឡើងលើសន្តិសុខស្បៀង។
លោក Laurel រំពឹងថា តម្លៃជីកសិកម្មនឹងធ្លាក់ចុះដល់ទៅ១៥% នៅពេលកំពង់ផែថ្មីទាំងនេះបានសាងសង់រួច ប៉ុន្តែលោកមិនបានផ្តល់ព័ត៌មានលម្អិតពីផែនការ និងទំហំចំណាយលើគម្រោងនេះនោះទេ។
ការហក់ឡើងខ្ពស់នូវតម្លៃស្បៀងអាហារបានប៉ះពាល់ដល់ប្រជាពលរដ្ឋហ្វីលីពីនយ៉ាងខ្លាំងជាហេតុបង្ខំឱ្យរដ្ឋបាលរបស់លោក ម៉ាកូស ប្រធានាធិបតីហ្វីលីពីន ចាត់វិធានការមួយចំនួនដូចជាការកាត់បន្ថយពន្ធសម្រាប់ការនាំចូលអង្ករពី១៥% ទៅ៣៥% នៅដើមខែនេះ ដើម្បីសម្រាល បន្ទុករបស់ប្រជាពលរដ្ឋនៅទូទាំងប្រទេសនេះ៕
អត្ថបទ៖ សុខ មង្គល