![វិស័យអចលនទ្រព្យ](https://cdn.cambonomist.com/media/images/trchlknlnglkryn122222.2e16d0ba.fill-960x540.jpg)
លោកស្រី អាន សុធីតា នាយិកាគ្រប់គ្រងក្រុមហ៊ុន PropNex Cambodia បានគូសបញ្ជាក់ថា ការអភិវឌ្ឍផ្សារទំនើប ឬផ្សារលក់រាយនៅកម្ពុជា បានកើនឡើងយ៉ាងគំហុកនៅប៉ុន្មានឆ្នាំចុងក្រោយនេះ ដែលវាស្របពេលទៅនឹងស្ថានភាពសេដ្ឋកិច្ចពិភពលោករួមទាំងកម្ពុជា កំពុងរងឥទ្ធិពលពីវិបត្តិសកលនានា។
តួយ៉ាងគិតមកដល់ទល់ពេលនេះ កម្ពុជាមានគម្រោងផ្សារទំនើប ឬផ្សារលក់រាយចំនួនប្រមាណជាង៧០គម្រោង ដែលមានអត្រាផ្គត់ផ្គង់សរុបប្រមាណជាង៨៥ម៉ឺនម៉ែត្រការ៉េ ដែលចំនួននេះមានការកើនឡើងទ្វេដង បើធៀបនឹងប្រមាណ៣ទៅ៤ឆ្នាំមុន។ តាមរយៈការកើនឡើងយ៉ាងគំហុកនេះ អ្នកជំនាញរូបនេះ វាយតម្លៃថា វាក៏អាចជាហានិភ័យមួយសម្រាប់វិស័យនេះផងដែរ នៅក្នុងកាលៈទេសៈបច្ចុប្បន្ននេះ ដោយសារការចំណាយលើការទិញទំនិញរបស់ប្រជាពលរដ្ឋមានការធ្លាក់ចុះ។ ហើយតាមរយៈបញ្ហានេះ វាក៏បានធ្វើឱ្យតម្លៃជួល និងចំនួនជួលក្នុងវិស័យនេះ ក៏មានការធ្លាក់ចុះផងដែរ។
យ៉ាងណាមិញ បើតាមការវាយតម្លៃរបស់អ្នកជំនាញរូបនេះ ដើម្បីអាចស្តារទីផ្សារជួលទីតាំងក្នុងផ្សារទំនើប ឬផ្សារលក់រាយឱ្យមានភាពល្អប្រសើរឡើងវិញនោះ ទំនងជាអាចត្រូវការចំណាយពេលយូរជាងអនុវិស័យអចលនទ្រព្យផ្សេងៗទៀត ដែលវិស័យនេះអាចចំណាយពេលពី៣ទៅ៥ឆ្នាំឯណោះ។
លោកស្រី អាន សុធីតា សង្កេតឃើញថា បច្ចុប្បន្នផ្សារទំនើបដែលនៅតែមានដំណើរការល្អ និងទទួលបានការគាំទ្រច្រើននោះ ភាគច្រើនជាប្រភេទផ្សារទំនើបបែបសហគមន៍ ដែលផ្តោតលើការលក់រាយបែបម្អូបអាហារ និងមានលក្ខណៈកម្សាន្តរួមជាមួយផងដែរ ដែលភាគច្រើនមានទ្រង់ទ្រាយក្នុងទំហំចាប់ពី៥ពាន់ម៉ែត្រការ៉េ ទៅ១ម៉ឺន៥ពាន់ម៉ែត្រការ៉េជាដើម៕