របាយការណ៍មួយរបស់មជ្ឈមណ្ឌលស្រាវជ្រាវធនាគារកសិករថៃត្រូវបានសារព័ត៌មាន ឌឹ ណេស្សិន ដកស្រង់មកផ្សាយថា គោលនយោបាយសេដ្ឋកិច្ចប្រជានិយម ដែលបង្កើតឡើងដើម្បីឈ្នះការបោះឆ្នោត ត្រូវការមូលនិធិច្រើនណាស់ដើម្បីអនុវត្ត។
ប្រភពដដែលបានបន្តថា គោលនយោបាយនេះនឹងផ្តល់ភាពវិជ្ជមានដល់ផលិតផលក្នុងស្រុកសរុបរបស់ថៃតែក្នុងរយៈពេលខ្លីប៉ុណ្ណោះ ប៉ុន្តែក្នុងរយៈពេលវែង វាអាចបង្កើតឱ្យមានបន្ទុកហិរញ្ញវត្ថុកាន់តែធ្ងន់ធ្ងរ។
សារព័ត៌មានថៃខាងលើបានពន្យល់តាមរបាយករណ៍នោះថា ម្យ៉ាង ការអនុវត្តគោលនយោបាយនេះនឹងតម្រូវឲ្យថៃរៀបចំថវិកាឡើងវិញ ខណៈដែលបច្ចុប្បន្នប្រទេសនេះប្រហែលខ្វះមូលនិធិឬថវិកា។ ម្យ៉ាងទៀត យោងតាម ឌឹ ណេស្សិន វាអាចទាមទារឱ្យរដ្ឋាភិបាលថ្មីបង្កើនចំណូលតាមរយៈគោលនយោបាយសារពើពន្ធ នៅពេលដែលស្ថានភាពសេដ្ឋកិច្ចក្រោយកូវីដ-១៩ មិនទាន់អំណោយផលដល់ការដំឡើងពន្ធនៅឡើយទេ។
មជ្ឈមណ្ឌលស្រាវជ្រាវខាងលើបានបន្ថែមការព្រួយបារម្ភផងដែរថា ប្រសិនបើរដ្ឋាភិបាលថ្មីអនុវត្តតាមគោលនយោបាយប្រជាភិថុតិនោះ រដ្ឋាភិបាលថ្មីនេះមិនទំនងថានឹងអាចបញ្ចៀសបញ្ហាឱនភាពថវិកាបានណាស់ ដូចនេះចាំបាច់ត្រូវតែអនុវត្តគោលនយោបាយតម្លើងអត្រាការប្រាក់ ។ នេះបើតាមសារព័ត៌មាន ឌឹ ណេស្សិន ដែលបានបន្ថែមថា ម្យ៉ាងទៀត ប្រសិនបើឱនភាពថវិកាកើនឡើង វាក៏អាចប៉ះពាល់ដល់វិស័យឯកជន នៅពេលដែលសេដ្ឋកិច្ចកំពុងព្យាយាមងើបឡើងវិញ។
អត្ថបទគួរអាន
ការសិក្សាដែលជាប្រភពព័ត៌មានរបស់កាសែតនេះ ក៏បានចង្អុលឱ្យឃើញការបែងចែកភូមិសាស្ត្រនយោបាយដែលកំពុងកើនឡើង ការផ្លាស់ប្តូររចនាសម្ព័ន្ធប្រជាសាស្រ្ត និងការថយចុះចំនួនប្រជាជននៅប្រទេសថៃដែរ។ លើសពីនេះទៅទៀត បើតាមសេចក្ដីរាយការណ៍ដដែល តម្រូវការឱ្យមានការអនុវត្តប្រកបដោយមេត្រីភាពនិងនិរន្តរភាពបរិស្ថានពីសំណាក់សហគមន៍អន្តរជាតិ ក៏បង្កបញ្ហាប្រឈមសម្រាប់រដ្ឋាភិបាលថ្មីដែលនឹងត្រូវការចក្ខុវិស័យនិងភាពជាអ្នកដឹកនាំច្បាស់លាស់ ដើម្បីឆ្លើយតបទៅនឹងវិញ្ញាសាទាំងនេះ។
ដោយឡែក បើតាម ឌឹ ណេស្សិន មជ្ឈមណ្ឌលស៊ើបអង្កេតសេដ្ឋកិច្ចរបស់ធនាគារពាណិជ្ជស្យាម បាននិយាយថា រដ្ឋាភិបាលអន្តរកាលនឹងមិនមានផលប៉ះពាល់ខ្លាំងដល់ប្រទេសទេរហូតដល់ចុងត្រីមាសទី ៣ ឆ្នាំនេះ ព្រោះថវិកាឆ្នាំ ២០២៣ គ្របដណ្ដប់ចំណាយរបស់រដ្ឋាភិបាលរហូតដល់ចុងត្រីមាសទី ៣ ប៉ុន្តែផលប៉ះពាល់អវិជ្ជមាននឹងលេចឡើងច្បាស់នៅក្នុងត្រីមាសទី ៤ នៅពេលរដ្ឋាភិបាលថ្មីចូលកាន់កាប់ដឹកនាំការងារពេញលេញ ជាពិសេសនៅក្នុងអំឡុងពេលវេលាអនុម័តថវិការសារពើពន្ធសម្រាប់ឆ្នាំ ២០២៤៕
អត្ថបទ ៖ សរ សុជាតិ
