ថៃកំពុងរងគ្រោះដោយទឹកជំនន់ ខណៈគ្រាន់តែវិស័យទេសចរណ៍ខាតបង់អស់ជិត១៥លានដុល្លារ

រដ្ឋមន្ត្រីចាំផ្ទះនៃក្រសួងទេសចរណ៍ និងកីឡា លោក សើមសាក់ ផុងផានីត (Sermsak Pongpanit) បានអះអាងថា ទឹកជំនន់ដែលកំពុងវាយលុយនៅភាគខាងជើងនៃប្រទេសថៃ បានបង្កការខូចខាតយ៉ាងដំណំដល់វិស័យទេសចរណ៍ ដែលគិតជាទឹកប្រាក់មានទំហំជិត១៥លានដុល្លារ។ ជាមួយគ្នានេះក្រសួងទេសចរណ៍ថៃ កំពុងតាមដានស្ថានភាពទឹកជំនន់នៅក្នុងតំបន់ជាច្រើន ជាពិសេសខេត្តឈៀងរ៉ៃ, ផាយ៉ាវ, ណាន់ និងសុខោទ័យជាដើម។

បើតាមថ្នាក់ដឹកនាំរូបនេះ ទឹកជំនន់ដ៏ធ្ងន់ធ្ងរនេះបានកាត់បន្ថយចំនួនភ្ញៀវទេសចរជិត៦ម៉ឺននាក់ ដែលនាំឱ្យចំណូលទេសចរណ៍ធ្លាក់ចុះជិត៦លានដុល្លារ ស្របពេលដែលទឹកជំនន់ និងគ្រោះបាក់ដីបានធ្វើឱ្យតំបន់ទេសចរណ៍មួយចំនួនត្រូវបានបិទជាបណ្ដោះអាសន្ន។ លោកបាននិយាយថា ក្រសួង និងអាជ្ញាធរទេសចរណ៍នៃប្រទេសថៃកំពុងរៀបចំផែនការស្តារទេសចរណ៍នៅក្នុងខេត្ត ដែលរងផលប៉ះពាល់ដោយទឹកជំនន់ទាំងនេះ។

ដោយឡែក បើតាមសេចក្តីរាយការណ៍របស់កាសែតបាងកកប៉ុស្តិ៍ បានបង្ហាញការព្រួយបារម្ភអំពីគ្រោះទឹកជំនន់នៅរដ្ឋធានីបាងកកផងដែរ។ នាយកដ្ឋានធារាសាស្ត្រថៃបានព្រមានថា កម្រិតទឹកជំនន់ដែលទម្លាក់ពីភាគខាងជើងមក កំពុងតែហូរយ៉ាងគំហុកមកកាន់រដ្ឋធានីបាងកក។

លោក ផាណែត ស៊ុំប៊ុន (Thanet Somboon) ប្រធានការិយាល័យគ្រប់គ្រងទឹក និងជលសាស្ត្រ បាននិយាយថា កម្រិតនៃរំហូរនៃទឹកនៅអាងទន្លេចៅប្រាយ៉ាអាចបន្តឡើងដល់១ពាន់៤រយម៉ែត្រគូបក្នុងមួយវិនាទីក្នុងប៉ុន្មានថ្ងៃខាងមុខនេះ។

ដោយៈ សរ សុជាតិ