ថៃ វៀតណាម ប្តេជ្ញាជំរុញទំហំពាណិជ្ជកម្មទ្វេភាគីឱ្យដល់២៥ពាន់លានដុល្លារនៅឆ្នាំក្រោយ

លោក ផនវីត ស៊ីឡាអុង (Pornvit Sila-on) អគ្គនាយករងនៃអគ្គនាយកដ្ឋានជំរុញពាណិជ្ជកម្មអន្តរជាតិថៃ បានចាត់ទុកពិព័រណ៍ពាណិជ្ជកម្មនៅវៀតណាម ដែលទើបបញ្ចប់កាលពីថ្ងៃទី៣១ ខែមីនា គឺបានដើរតួនាទីយ៉ាងសំខាន់ក្នុងការជួយធុរកិច្ចថៃ ដើម្បីណែនាំផលិតផលរបស់ពួកគេដោយផ្ទាល់ទៅកាន់ទីផ្សារវៀតណាម។

ថៃត្រូវបានគេដឹងថា គឺជាដៃគូពាណិជ្ជកម្មធំទី៩របស់វៀតណាម និងធំជាងគេក្នុងតំបន់អាស៊ាន ហើយគេជឿជាក់ថា សហគ្រិនថៃ ជាពិសេសសហគ្រាសធុនតូច និងមធ្យម នឹងកាន់តែចាប់អារម្មណ៍នឹងទីផ្សារនៅវៀតណាមបន្ថែមទៀត។ យ៉ាងណាមិញលោក ផនវីត បានអះអាងថា សហគ្រាសធុនតូច និងមធ្យមថៃ កាន់តែមើលឃើញនូវសក្តានុពលក្នុងការពង្រីកទីផ្សារនាំចេញទៅកាន់ប្រទេសវៀតណាម។

ដោយឡែកលោក ឆាឡើមឆៃ ផនស៊ីរីភីយ៉ាគុល (Chalermchai Pornsiripiyakool)ប្រធានផ្នែកកិច្ចការសាជីវកម្មអន្តរជាតិនៅមជ្ឈមណ្ឌលចែកចាយទំនិញថៃនៅវៀតណាមបានលើកឡើងថា ស្ថានភាពផលិតផលថៃ គឺកំពុងតែពេញនិយមនៅប្រទេសវៀតណាម ក្នុងនោះជនជាតិវៀតណាមស្ទើរតែទាំងអស់គឺចាប់ផ្តើមចូលចិត្តផលិតផលថៃរាប់ចាប់តាំងពីគ្រឿងទេស អាហារសម្រន់ និងផលិតផលផ្សេងៗទៀត។