សភាថៃ គាំទ្រផែនការអនុញ្ញាតឱ្យសាងសង់កាស៊ីណូ និងដាក់ឱ្យល្បែងស៊ីសងស្របច្បាប់

ប្រព័ន្ធផ្សព្វផ្សាយជាច្រើនបានរាយការណ៍ថា សមាជិកសភាចំនួន២៥៣រូបក្នុងចំណោមសមាជិកសភា២៥៧រូប ដែលមានវត្តមាននៅក្នុងរដ្ឋសភាថៃ បានបោះឆ្នោតគាំទ្រការផែនការអនុញ្ញាតឱ្យសាងសង់កាស៊ីណូ និងដាក់ឱ្យល្បែងស៊ីសងស្របច្បាប់នៅក្នុងប្រទេសនេះ។

អនុរដ្ឋមន្ត្រីក្រសួងហិរញ្ញវត្ថុលោក ជូឡាពុន អាម៉នវីវ៉ាត (Julapun Amornvivat) ត្រូវបានស្រង់សម្តីថា ការសិក្សាអំពីផែនការខាងលើនេះ នឹងត្រូវបញ្ជូនទៅខុទ្ទកាល័យរដ្ឋាភិបាល ដើម្បីសម្រេចថា តើការដាក់ឱ្យកាស៊ីណូទៅជាស្របច្បាប់ស័ក្តិសមសម្រាប់ប្រទេសជាតិ កាន់ព្រះពុទ្ធសាសនាមួយនេះដែរ ឬយ៉ាងណា។

ពាក់ព័ន្ធនឹងផែនការអនុញ្ញាតឱ្យសាងសង់កាស៊ីណូ និងដាក់ឱ្យល្បែងស៊ីសងស្របច្បាប់នៅក្នុងប្រទេសថៃនេះដែរ ធនាគារម៉ាឡេស៊ី Maybank បានលើកឡើងកាលពីថ្ងៃសុក្រសប្ដាហ៍មុនថា ប្រទេសថៃ អាចនឹងចំណាយពេល ២ ឆ្នាំសម្រាប់ការរៀបចំក្របខណ្ឌបទប្បញ្ញត្តិ និង ៣ ឆ្នាំទៀតសម្រាប់ការសាងសង់ ដូចនេះកាស៊ីណូដំបូងបង្អស់នៅក្នុងប្រទេសថៃ អាចនឹងរួចរាល់សម្រាប់ការបើកដំណើរការនៅឆ្នាំ២០២៩ ពោលគឺរយៈពេល៥ឆ្នាំខាងមុខ។

លោក សាមូអែល យីន សាវ យ៉ាង (Samuel Yin Shao Yang) អ្នកវិភាគនៅធនាគារម៉ាឡេស៊ី Maybank បានលើកឡើងថា ប្រសិនបើប្រទេសថៃ បើកដំណើរការកាស៊ីណូដោយស្របច្បាប់តាមផែនការមែននោះ ការប្រកួតប្រជែងនឹងមានកាន់តែខ្លាំង ហើយវាអាចនឹងក្លាយជាការគំរាមកំហែងក្នុងវិស័យល្បែងស៊ីសងថ្នាក់តំបន់ ហើយក្រុមហ៊ុនល្បែងសិង្ហបុរី Genting Singapore Ltd និងក្រុមហ៊ុនល្បែងហុងកុង Naga Corp នឹងត្រូវប្រឈមមុខនឹងការប្រកួតប្រជែងនេះខ្លាំងបំផុត ប៉ុន្តែរយៈពេល ៥ ឆ្នាំទៀតគឺនៅយូរណាស់៕

អត្ថបទ៖ សុខ ជា