កម្ពុជាប្រមូលពន្ធពីកាស៊ីណូនិងឆ្នោតបានជាង ៣៤លានដុល្លារក្នុងរយៈពេល៦ខែ

ចំណូលកាតព្វកិច្ចពន្ធពីកាស៊ីណូនិងឆ្នោតនៅកម្ពុជាប្រមូលបានជាង ៣៤លានដុល្លារ សម្រាប់រយៈពេល ៦ខែដំបូងនៃឆ្នាំ២០២០ ស្មើនឹងជាង ៦៩ភាគរយនៃច្បាប់ហិរញ្ញវត្ថុ និងកើនឡើងលើសកាលពីឆ្នាំ២០១៩។ នេះបើតាមរបាយការណ៍របស់ក្រសួងសេដ្ឋកិច្ចនិងហិរញ្ញវត្ថុ ។

កាស៊ីណូរបស់វិនិយោគិនចិន នៅកណ្ដាលក្រុងព្រះសីហនុ។

ក្នុងរបាយការណ៍របស់ក្រសួងហិរញ្ញវត្ថុស្តីពីលទ្ធផលនៃការអនុវត្តថវិកាឆមាសទី១ សម្រាប់ឆ្នាំ២០២០ ចេញនៅសប្តាហ៍នេះ បង្ហាញថា ចំណូលមិនមែនសារពើពន្ធក្រៅពីទ្រព្យសម្បត្តិរដ្ឋ អនុវត្តបាន ២៦,៣ភាគរយនៃច្បាប់ហិរញ្ញវត្ថុ គឺទាបជាងរយៈពេលដូចគ្នា ក្នុងឆ្នាំ២០១៩ ដែលអនុវត្តបាន ៣៩,១ភាគរយនៃច្បាប់ហិរញ្ញវត្ថុ ហើយបើគិតជាចំណូលសាច់ប្រាក់មានការថយចុះ ៣០,៦ភាគរយ ធៀបនឹងរយៈពេលដូចគ្នាក្នុងឆ្នាំ២០១៩។

លោក មាស សុខសេនសាន អ្នកនាំពាក្យក្រសួងសេដ្ឋកិច្ចនិងហិរញ្ញវត្ថុ ប្រាប់ Newsroom Cambodia តាមប្រព័ន្ធតេឡេក្រាមនៅថ្ងៃទី១០ ខែតុលានេះ ថា ការកើនឡើងចំណូលពន្ធពីកាស៊ីណូ គឺដោយសារពួកគេបង់ពន្ធ ហើយថា ការដែលមានចំនួនតិច នៅឆ្នាំមុនៗ គឺដោយសារពួកគេបង់មិនគ្រប់។

លោកអ្នកនាំពាក្យបាននិយាយថា ៖ «បើបាត់ មានន័យថា មិនបានបង់ ហើយបើកើនហើយ មានន័យថា បានបង់ហើយ»។

នៅពេលសួរបញ្ជាក់ថា នោះមានន័យថាចំណូលពន្ធពីកាស៊ីណូនិងឆ្នោតនេះ ពីមុនទាប ដោយសារពួកគាត់មិនបានបង់ពន្ធ ហើយឆ្នាំនេះកើនដោយសារពួកគាត់បង់ពន្ធ ឬយ៉ាងណា?

លោក មាស សុខសេនសាន បានបញ្ជាក់ថា៖ «គេអាចបង់ តែអាចបង់មិនទាន់គ្រប់ ដោយសារបែបបទរដ្ឋបាល ហើយនៅពេលយើងសើរើពិន័យទៅឃើញទៅ គេបង់បន្ថែម មិនមែនបានន័យថាបាត់ឈឹង ឬមិនបាត់ឈឹងទេ»។

លោក ប៉ិច ពិសី នាយកប្រតិបត្តិនៃអង្គការតម្លាភាពកម្ពុជា លើកឡើងថា ការកើនឡើងនៃចំណូលកាតព្វកិច្ចពីកាស៊ីណូនិងឆ្នោតនេះ ជាចំណុចវិជ្ជមាន។

លោកក៏បានលើកឡើងអំពីព័ត៌មានកន្លងមកដែលថា មានការអនុវត្តច្បាប់ពន្ធមិនស្មើភាពគ្នាដែលជាហេតុធ្វើឲ្យប៉ះពាល់ដល់ការប្រកួតប្រជែងមិនស្មើភាពខាងអាជីវកម្ម និងប៉ះពាល់ដល់បរិយាកាសវិនិយោគ ។

លោក ប៉ិច ពិសី បាននិយាយថា៖ «ការអនុលោមតាមច្បាប់ពន្ធ គួរអនុវត្តដោយមិនរើសអើង និងកាត់បន្ថយការប្រើប្រាស់សែស្រលាយបក្សពួកដើម្បីគេចផុតពីការបង់ពន្ធ។ ម្យ៉ាងទៀត គួរផ្តល់ជូនការលើកទឹកចិត្តដល់ក្រុមហ៊ុន អាជីវកម្មទាំងឡាយណាដែលបង់ពន្ធតាមច្បាប់។»

លោកបន្ថែមថា៖ «អង្គការតម្លាភាពចង់ឃើញការប្រមូលចំណូលចូលរដ្ឋ ប្រព្រឹត្តទៅប្រកបដោយប្រសិទ្ធភាព ប្រសិទ្ធផល និងសមភាព លើគ្រប់វិស័យ ដើម្បីបង្កើនសមត្ថភាពហិរញ្ញវត្ថុជាតិឲ្យបានខ្ពស់ កាត់បន្ថយនូវកង្វះខាតផ្នែកថវិកាជាតិ»។

ចំណូលមិនមែនសារពើពន្ធមានបីផ្នែកសំខាន់ៗ រួមមាន ចំណូលពីទ្រព្យសម្បត្តិរដ្ឋ និងចំណូលមិនមែនសារពើពន្ធក្រៅពីទ្រព្យសម្បត្តិរដ្ឋ ព្រមទាំងចំណូលកាតព្វកិច្ចពីកាស៊ីណូនិងឆ្នោត ក្នុងឆមាសទី១ក្នុងឆ្នាំ២០២០ អនុវត្តបានល្អទាំង៣ផ្នែក និងត្រូវបានប៉ាន់ស្មានថា នៅដំណាច់ឆ្នាំ២០២០ ចំណូលមិនមែនសារពើពន្ធនឹងអាចសម្រេចបានប្រមាណ ៧២,១ភាគយនៃច្បាប់ហិរញ្ញវត្ថុឆ្នាំ២០២០ ៕