ការអះអាងបែបនេះ នៅចំពេលដែល ចំណូលដែលប្រមូលដោយអគ្គនាយកដ្ឋានពន្ធដារ មានកំណើនជាបន្ដបន្ទាប់ តួយ៉ាង នៅ៤ខែដើមឆ្នាំនេះ ស្ថាប័នដែលជាសេនាធិការរបស់ក្រសួងសេដ្ឋកិច្ច និងហិរញ្ញវត្ថុមួយនេះ ប្រមូលចំណូលបានជិត ១ពាន់៦រយលានដុល្លារអាមេរិក ស្មើនឹងជាង៤៤% នៃផែនការកំណត់ដោយច្បាប់ស្តីពីហិរញ្ញវត្ថុសម្រាប់ការគ្រប់គ្រង់ឆ្នាំ២០២៣។
បើតាមការលើកឡើងរបស់ថ្នាក់ដឹកនាំអគ្គនាយកដ្ឋានពន្ធដារចំណូលពន្ធនេះត្រូវបានជំរុញដោយស្ថានភាពនៃការប្រមូលចំណូលពន្ធកាលពីត្រីមាសទី១ដែលមានការហក់ឡើងខ្ពស់។ ប៉ុន្តែចំនួននេះហាក់មានការថមថយបើធៀបនឹងការប្រមូលចំណូលពន្ធក្នុងរយៈពេលដូចគ្នាកាលពីឆ្នាំមុន។
ឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រីនិងជាប្រតិភូរាជរដ្ឋាភិបាលទទួលបន្ទុកជាអគ្គនាយកពន្ធដារបានជំរុញមន្ត្រីពន្ធដារពង្រឹងការចុះបញ្ជីក្រុមហ៊ុន សហគ្រាស និងសិប្បកម្មឲ្យបានសុក្រិតបន្ថែមទៀត តាមរយៈការធ្វើបច្ចុប្បន្នភាពតាមក្រុមហ៊ុន និងសហគ្រាល ដែលបានចុះបញ្ជីរួចនៅកម្ពុជា។ ឯកឧត្តមបានគូសបញ្ជាក់ថា ការធ្វើឲ្យមានភាពសុក្រិតក្នុងការចុះបញ្ជីរបស់ក្រុមហ៊ុន សហគ្រាស គឺមានភាពស្មុគស្មាញ និងមានបញ្ហាប្រឈមច្រើន ដោយសារសហគ្រាសខ្លះចង់ចុះបញ្ជី ប៉ុន្តែមានចេតនាគេចវេះការបង់ពន្ធជាលក្ខណៈប្រព័ន្ធ ខណៈខ្លះមិនចង់ចុះបញ្ជី ប៉ុន្តែមានកម្រិតផលរបរ ដែលត្រូវមានកាតព្វកិច្ចចុះបញ្ជី។
អត្ថបទគួរអាន
ទន្ទឹមនឹងនេះឯកឧត្តមជំរុញឲ្យមន្ត្រីបន្តចុះត្រួតពិនិត្យជាក់ស្ដែងតាមរោងចក្រ ដើម្បីតាមដាន និងថែទាំបណ្តាញ និងឧបករណ៍វាស់ចំណុះស្រាបៀរ និងភេសជ្ជៈគ្មានជាតិអាល់កុលរបស់សហគ្រាសផលិតក្នុងស្រុក ហើយក្នុងករណីរកឃើញមានករណីគេចវេះ និងការបំពានការអនុវត្តកាតព្វកិច្ចបំពាក់ឧបករណ៍នេះ ត្រូវចាត់វិធានការពន្ធដារយ៉ាងម៉ឺងម៉ាត់ ដើម្បីធានាបាននូវតម្លាភាព និងការប្រកួតប្រជែងដោយស្មើភាពក្នុងវិស័យនេះ និងនិរន្តរភាព ចំណូលពន្ធដែលជាគុណប្រយោជន៍នៃថវិកាជាតិ។
ការជំរុញបែបនេះធ្វើឡើងក្រោយឯកឧត្តមសង្កេតឃើញថា ការប្រមូលចំណូលពន្ធរបស់អគ្គនាយកដ្ឋានពន្ធដារនៅក្នុងរយៈពេល៤ខែឆ្នាំ២០២៣ សម្រេចបានជិត១ពាន់៦រយលានដុល្លារ ដែលស្មើនឹងជាង ៤៤% នៃផែនការកំណត់ ដោយច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៣។ ក្នុងនោះមួយផ្នែកនៃចំណូលពន្ធបានមកពីការប្រកាស និងបង់ពន្ធលើប្រាក់ចំណូលបន្តកាលពីឆ្នាំ២០២២។
បើតាមការគូសបញ្ជាក់របស់ឯកឧត្តម គង់ វិបុល ស្ថានភាពល្អប្រសើរនៃចំណូលសម្រាប់រយៈពេល៤ខែឆ្នាំ២០២៣ គឺអាស្រ័យដោយស្ថានភាពនៃចំណូលពន្ធពីខែមករា ដល់ខែមីនា ឆ្នាំ២០២៣ បានហក់ឡើងខ្ពស់ ហើយដែលជារដូវកាលនៃការប្រកាស និងបង់ប្រាក់ពន្ធលើប្រាក់ចំណូលប្រចាំឆ្នាំ២០២២។
សូមបញ្ជាក់ជូនផងដែរថា តាមផែនការកំណត់ដោយច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៣ អគ្គនាយកដ្ឋានពន្ធដារ មានបេសកកម្មក្នុងការប្រមូលចំណូលពន្ធប្រមាណជាង ៣ពាន់៥រយលានដុល្លារ ដែលមានការកើនឡើងជាង២៦% បើធៀបនឹង ផែនការឆ្នាំ២០២២៕
