ការិយាល័យគ្រប់គ្រងទ្រព្យសម្បត្តិគ្រួសារចិន នៅសិង្ហបុរីធ្លាក់ចុះ ក្រោយមានការបង្ក្រាបការលាងលុយកខ្វក់

គេនៅចាំបានថា កាលពីខែសីហា ឆ្នាំ២០២៣ អាជ្ញាធរសិង្ហបុរី បានបើកប្រតិបត្តិការបង្ក្រាបយ៉ាងចាស់ដៃទៅលើអំពើលាងលុយកខ្វក់ ដោយពេលនោះប៉ូលិសសិង្ហបុរី បានឃាត់ខ្លួនជនសង្ស័យជនជាតិចិនចំនួន១០នាក់ និងបានរឹបអូសទ្រព្យសម្បត្តិសរុបជាង២ពាន់លានដុល្លារអាម៉េរិក។ ក្នុងចំណោមជនសង្ស័យទាំងនេះ មានមួយចំនួនជាប់ពាក់ព័ន្ធនឹងការិយាល័យគ្រប់គ្រងទ្រព្យសម្បត្តិរបស់គ្រួសារទោលប្រហែល១,៤០០កន្លែង។ ការិយាល័យគ្រួសារ គឺជា ស្ថាប័ន្ធគ្រប់គ្រងទ្រព្យសម្បត្តិឯកជន ដែលត្រូវបានបង្កើតឡើងដើម្បីត្រួតពិនិត្យ និងគ្រប់គ្រងកិច្ចការហិរញ្ញវត្ថុរបស់គ្រួសារ ឬបុគ្គលអ្នកមានទ្រព្យសម្បត្តិណាមួយ។

បើតាមលោក ឡូ គៀ ម៉េង (Loh Kia Meng) ប្រធានមន្ត្រីប្រតិបត្តិ និងជាដៃគូជាន់ខ្ពស់នៅក្រុមច្បាប់មួយនៅប្រទេសសិង្ហបុរី បានឱ្យដឹងថា ប្រហែល១០% នៃការិយាល័យគ្រួសារនេះ គឺជាការិយាល័យគ្រួសារដែលដោះស្រាយបញ្ហាប្រាក់កាក់របស់បុគ្គល ឬក្រុមគ្រួសារដែលមានដើមកំណើតនៅប្រទេសចិន​។

លោក ឡូ បានព្យាករថា នៅក្នុងពេលខាងមុខការិយាល័យគ្រួសារនឹងមិនមានការប្រែប្រួលប៉ុន្មាននោះទេ ប៉ុន្តែលោកជឿថា អត្រាកំណើនពិតប្រាកដបានធ្លាក់ចុះដោយសារតែមានការរឹតបន្តឹងលើតម្រូវការទ្រព្យសម្បត្តិនៅក្រោមការគ្រប់គ្រងនៅក្នុងបុរីរដ្ឋមួយនេះ៕