ក្រសួងយុត្តិធម៌អាម៉េរិក បានអះអាងថា យន្តហោះប្រភេទ Dassault Falcon 900EX របស់លោក នីកូឡាស ម៉ាឌូរ៉ូ ប្រធានាធិបតីវេណេស៊ុយអេឡា ត្រូវបានរឹបអូសនៅសាធារណរដ្ឋដូមីនី នៅសមុទ្រការីបៀន ហើយត្រូវបានបញ្ជូនទៅរដ្ឋផ្លរីដា សហរដ្ឋអាម៉េរិក។ អគ្គមេធាវីលោក មឺរីក ហ្កាឡេន (Merrick Garland) បាននិយាយថា យន្តហោះដែលអាម៉េរិក រឹបអូសនេះ ត្រូវបានទិញដោយខុសច្បាប់ក្នុងតម្លៃ១៣លានដុល្លារតាមរយៈក្រុមហ៊ុនមួយ ហើយបានដឹកចេញពីអាម៉េរិក ដើម្បីប្រគល់ឱ្យលោក ម៉ាឌូរ៉ូ និងបក្ខពួករបស់លោក។
ក្រសួងយុត្តិធម៌អាម៉េរិកនឹងបន្តស្វែងរកអ្នកដែលបំពានទណ្ឌកម្មរបស់អាម៉េរិក និងត្រួតពិនិត្យការនាំចេញដើម្បីកុំឱ្យពួកគេអាចប្រើធនធានរបស់អាម៉េរិក ដែលធ្វើឱ្យខូចសន្តិសុខជាតិរបស់អាម៉េរិក។ បក្សពួករបស់លោក ម៉ាឌូរ៉ូ បានរៀបចំទិញយន្តហោះនេះ ពីក្រុមហ៊ុនអាម៉េរិកមួយនៅភាគខាងត្បូងរដ្ឋផ្លរីដា កាលពីចុងឆ្នាំ២០២២ និងដើមឆ្នាំ២០២៣។ យន្តហោះនេះត្រូវបានលួចដឹកចេញពីអាម៉េរិកទៅកាន់តំបន់ការ៉ាប៊ីន បន្ទាប់មកបានបញ្ជូនទៅដល់ប្រទេសវេណេស៊ុយអេឡា ដោយបានបំពានទណ្ឌកម្ម និងការត្រួតពិនិត្យការនាំចេញទំនិញរបស់អាម៉េរិក។
ចាប់តាំងពីពេលនោះមក យន្តហោះនេះបានហោះហើរទៅវិញទៅមកចេញពីមូលដ្ឋានយោធាមួយនៅប្រទេសវេណេហ្ស៊ុយអេឡា ហើយក៏ត្រូវបានប្រើដើម្បីជាប្រយោជន៍របស់លោក ម៉ាឌូរ៉ូ និងអ្នកតំណាងរបស់លោកក្នុងការបំពេញទស្សនកិច្ចនៅប្រទេសផ្សេងៗផងដែរ៕
អត្ថបទ៖ សុខ មង្គល
