ធនាគារកណ្ដាលវៀតណាម រក្សាកូតាកំណើនឥណទានសម្រាប់ធនាគារក្នុងស្រុក ក្រោយព្រួយបារម្ភពីការកើនឡើងឥណទានខូច

តាមរយៈរបាយការណ៍មួយផ្ញើជូនរដ្ឋសភាកាលពីពេលថ្មីៗនេះ ធនាគារកណ្ដាលវៀតណាម បានបញ្ជាក់ថា នៅមុនឆ្នាំ២០២៣ ខ្លួនបានអនុវត្តកូតាកំណើនឥណទានសម្រាប់គ្រប់ធនាគារទាំងអស់ ពោលគឺទាំងធនាគារក្នុងស្រុក និងធនាគារក្រៅប្រទេស។ ទោះជាយ៉ាងណា ធនាគារកណ្ដាលមួយនេះបានសម្រេចលុបចោលគោលនយោបាយនេះសម្រាប់បណ្ដាធនាគារក្រៅប្រទេសនៅក្នុងឆ្នាំនេះ ហើយរក្សាទុកគោលនយោបាយនេះឱ្យនៅដដែលសម្រាប់បណ្ដាធនាគារក្នុងស្រុក។

របបកូតាកំណើនឥណទាន ឬការដាក់កម្រិតលើការបង្កើនឥណទានរបស់ធនាគារនីមួយៗ ត្រូវបានដាក់ចេញឱ្យអនុវត្តជាផ្លូវការនៅក្នុងឆ្នាំ២០១១ ជាពេលដែលសេដ្ឋកិច្ចរបស់វៀតណាម ជួបប្រទះនឹងអតិផរណាខ្ពស់ដែលបណ្តាលមកពីការផ្គត់ផ្គង់សាច់ប្រាក់ច្រើនហួសប្រមាណ។

សូមបញ្ជាក់ថា របបកូតាកំណើនឥណទាននេះត្រូវបានប្រកាសដោយធនាគារកណ្ដាលវៀតណាម នៅរៀងរាល់ដើមឆ្នាំនីមួយៗ។

ដោយផ្អែកលើគោលដៅកំណើនឥណទានប្រចាំឆ្នាំសម្រាប់ឧស្សាហកម្មធនាគារទាំងមូល ធនាគារកណ្ដាលវៀតណាម នឹងបែងចែកកូតាកំណើនឥណទានសម្រាប់ធនាគារពាណិជ្ជនីមួយៗអាស្រ័យលើសូចនាករសុខភាពហិរញ្ញវត្ថុរបស់ធនាគារទាំងនោះ ដូចជាកម្រិតដើមទុន គុណភាពទ្រព្យសកម្ម អភិបាលកិច្ច លទ្ធផលប្រតិបត្តិការអាជីវកម្ម សាច់ប្រាក់ងាយស្រួល និងភាពរសើបចំពោះហានិភ័យទីផ្សារជាដើម។

ទោះជាយ៉ាងណា មិនមែនធនាគារទាំងអស់សុទ្ធតែពេញចិត្តនឹងការបែងចែកកូតាកំណើនឥណទានរបស់ធនាគារកណ្ដាលវៀតណាម និងអនុវត្តតាមយ៉ាងខ្ជាប់ខ្ជួននោះទេ ដោយជាញឹកញាប់ធនាគារមួយចំនួនបានផ្ដល់ឥណទានខ្ពស់ជាងកូតាដែលបានកំណត់៕​
ដោយ: តែម សុខុម