តើមុនដាក់ទុនវិនិយោគត្រូវមើលលើកត្តាអ្វីខ្លះ ដើម្បីកុំឱ្យចាញ់បោកគេ?

លោក ង៉ែត ជូ អ្នកជំនាញក្នុងវិស័យហិរញ្ញវត្ថុម្នាក់កត់សម្គាល់ឃើញថា ការវិនិយោគក្នុងវិស័យដីធ្លី និងការវិនិយោគយកប្រាក់ចំណេញមួយចំនួនបានជួបបញ្ហា គឺ​កើតចេញពីភាពលោភលន់និងការខ្វះចំណេះដឹងក្នុងការប្រើប្រាស់ហិរញ្ញវត្ថុរបស់អ្នកអភិវឌ្ឍន៍ និងអ្នកចូលរួមវិនិយោគ។ ជាមួយគ្នានេះអ្នកជំនាញរូបនេះ ក៏បានចែករំលែកបទពិសោធន៍ និងបង្ហាញពីគន្លឹះក្នុងការមើលគម្រោងវិនិយោគ ដែលមានកម្រិតហានិភ័យនៃការខាតបង់ខ្ពស់ ឬអាចប្រឈមនឹងចេតនាបោកប្រាស់មួយចំនួនផងដែរ។ គន្លឹះក្នុងការមើលទាំងនោះរួមមាន ការសន្យាឱ្យការប្រាក់ ឬប្រាក់ចំណេញខ្ពស់ ប្រវត្តិក្រុមហ៊ុនខ្វះ​សុចរិតភាព ការសម្ញែងផ្ទះតម្លៃថ្លៃៗហួសលទ្ធភាព ជិះរថយន្តទំនើបៗ ចូលហាងថ្លៃៗញឹកញយ មានអ្នកបើករថយន្ត និងដើរហែរហមជាដើម។

​ជុំវិញបញ្ហានេះដែរ លោក ម៉ិច សីហា នាយកវិទ្យាស្ថានអន្តរជាតិ អាយឃី បានបង្ហាញគន្លឹះសំខាន់ៗមួយចំនួន ឱ្យពលរដ្ឋពិចារណាមុននឹងសម្រេចចិត្តបោះទុនវិនិយោគក្នុងវិស័យអ្វីមួយ។ គន្លឹះទាំងនោះរួមមាន កុំអាលជឿ និងទុកចិត្តលើអ្នកដទៃទាំងស្រុងពេក, ត្រូវសិក្សាស្រាវឱ្យបានច្បាស់លាស់ពីរបៀបធ្វើទីផ្សារ និងពាណិជ្ជកម្ម និងត្រូវចេះថ្លឹងថ្លែងពីសមត្ថភាពខ្លួនឯង ហើយជៀសវាងការប្រើអារម្មណ៍ និងជំនឿ។ ទន្ទឹមនេះ អ្នកជំនាញរូបនេះ ជំរុញឱ្យពលរដ្ឋត្រូវចេះសិក្សា និងស្តាប់បទបង្ហាញរបស់អ្នកជំនាញនៅលើបណ្តាញសង្គម សម្រាប់ធ្វើជាជំនួយស្មារតី និងចំណេះដឹងជាមូលដ្ឋាន។

​យើងកត់សម្គាល់ឃើញថា នៅមួយរយៈចុងក្រោយនេះមានផ្ទុះករណីម្ចាស់ក្រុមហ៊ុនអភិវឌ្ឍន៍ដីឡូតិ៍ និងចលនទ្រព្យមួយចំនួនបានបោកប្រាសប្រាក់របស់ប្រជាពលរដ្ឋរាប់លានដុល្លារ ក្រោមរូបភាពកៀរគរទុនពីប្រជាពលរដ្ឋដោយសន្យាផ្តល់អត្រាការប្រាក់ និងប្រាក់ចំណេញក្នុងកម្រិតមួយខ្ពស់ហួសហេតុ លើសពីអ្វីដែលក្រុម​ហ៊ុន ឬគ្រឹះស្ថានហិរញ្ញវត្ថុផ្លូវការផ្តល់ឱ្យរាប់សិបដង។ តែយ៉ាងណាយើងសង្កេតថា ម្ចាស់ក្រុមហ៊ុន រួមជាមួយបក្ខពួករកស៊ីមិនត្រឹមត្រូវទាំងនោះ ក៏ត្រូវបានសមត្ថកិច្ចចាប់ឃុំនៅពន្ធនាគារផងដែរ​៕

អត្ថបទ៖ បូ ដូឡា,រូបភាព ឯកសារ