តាមរយៈការបញ្ជាក់ពីអ្នកជំនាញរូបនេះ មិនថាវិស័យកសិកម្ម ឬវិស័យដទៃទៀតនោះទេ ត្រូវតែមានចំណេះ ជំនាញយ៉ាងហោចណាស់ក៏៣ចំណុចដែរ។ យ៉ាងណាមិញ ចំពោះការក្លាយជាសហគ្រិនលើវិស័យកសិកម្មវិញ បណ្ឌិត យ៉ង សាំងកុមារ ផ្តល់យោបល់ថា គួរតែមាន៣ចំនុចដែរ រួមមាន ចំណេះដឹងផ្នែកកសិកម្មខ្លះៗ ចំណេះដឹងផ្នែកហិរញ្ញវត្ថុ និងចំណេះដឹងផ្នែកទីផ្សារនិងគ្រប់គ្រងធនធានមនុស្ស។
បណ្ឌិត យ៉ង សាំងកុមារ បានបញ្ជាក់ថា « សម្រាប់យុវជន ដែលគាត់ចាប់ផ្តើមធ្វើការងារហ្នឹងគាត់ត្រូវការពេលវេលា ដើម្បីហ្វឹកហាត់ ដែលជាចំណុចចាប់ផ្តើមដ៏សំខាន់ ចឹងហើយបានខ្ញុំរៀបចំឲ្យមានកម្មវិធីពន្លកបៃតងហ្នឹង សម្រាប់យុវជនដែលចង់ចាប់ផ្តើមមុខរបរកសិកម្មបានជោគជ័យហ្នឹង ឲ្យគាត់មករៀន មកហាត់ ទីមួយដើម្បីហាត់ពត់លត់ដំខ្លួន ព្រោះការងារកសិកម្មត្រូវការកម្លាំងកាយខ្លះ ហើយធ្វើការក្រោមកំដៅថ្ងៃ ក្រោមភ្លៀង។ ទីពីរឲ្យគាត់ចេះផលិតផ្សាភ្ជាប់នឹងទីផ្សារ និងឲ្យចេះវិភាគចំណូលចំណាយ ក៏ដូចជាថ្លៃដើមផលិតអីជាដើម»។
អត្ថបទទាក់ទង!
មួយវិញទៀត កតា្ដដែលសហគ្រិនកសិកម្មត្រូវមានដែរនោះ គឺការដឹកនាំ ព្រោះថា ការដែលចេះដឹកនាំនេះ ជាកត្តាជំរុញឲ្យការងារមួយទទួលបានជោគជ័យ ពិតប្រាកដ។
ប៉ុន្តែអ្វីដែលជាចំណុចសំខាន់ជាងគេបង្អស់ក្នុង ដែលសហគ្រិនកសិកម្មត្រូវមានជាចាំបាច់បំផុតនោះគឺ ចំណង់ចំណូលចិត្ត។ បណ្ឌិត យ៉ង សាំងកុមារ បន្ថែមថា « ទោះបីយើងអត់មានជំនាញក៏ដោយ យើងអត់បាន[រៀនចប់]ផ្នែកកសិកម្ម យើងអត់ទានមានបទពិសោធន៍លើការងារកសិកម្ម ប៉ុន្តែត្រូវចាប់ផ្តើមជាដំបូងពីចំណង់ បើពិតជាយើងចង់ យើងស្រលាញ់ការងារហ្នឹង»។
លោកថា « យើងគួរចាប់ទៅរស់នៅ ឬហាត់រៀនជាមួយអ្នកមានបទពិសោធន៍ បើយើងចង់ក្លាយជាអ្នកចិញ្ចឹមមាន់ជោគជ័យទៅនៅជាមួយអ្នកចិញ្ចឹមមាន់ បើចង់ក្លាយជាអ្នកដាំបន្លែជោគជ័យ យើងទៅនៅជាមួយអ្នកដាំបន្លែ បើយើងចង់ក្លាយជាអ្នកដាំទុរេនជោគជ័យ ទៅនៅជាមួយអ្នកដាំទុរេន គេប្រើធ្វើអីធ្វើហ្នឹងទៅ ត្រូវចេះដាក់ខ្លួន ធ្វើការងារចាប់ពីការងារតូចរហូតដល់ការងារធំ នោះយើងបានទាំងចំណេះ បទពិសោធន៍និងចំណូលទៀត ដូចដែលខ្ញុំតែងតែចាត់ទុកថា កសិដ្ឋាន ជាសាលា សត្វបន្លែបង្ការជាគ្រូរបស់យើង»។
បើតាមលោកបណ្ឌិត យ៉ង សាំងកុមារ អះអាងថា នៅក្នុងដំណាក់កាលជំងឺកូវីដ-១៩នេះ ជាឱកាសកាន់តែធំទៀត សម្រាប់អ្នកដែលចង់ប្រឡូកក្នុងវិស័យកសិកម្ម ព្រោះថា វាពិតជាមានសារសំខាន់ណាស់ សម្រាប់ការផលិតនៅក្នុងស្រុក ដើម្បីជម្រុះការនាំចូល ដែលឈានទៅការនាំចេញនូវផលិតផលសំខាន់ និងការភ្ញាក់រលឹករបស់សង្គមជាតិទាំងមូលផងដែរ។
បែបនេះក្តី លោកចង់ឲ្យ កសិករគួរតេចាប់ប្រែក្លាយខ្លួននិងច្នៃប្រឌិតការងារកសិកម្មបន្ថែមទៀត ដូចជាការធ្វើឲ្យក្លាយជា កសិ-សិប្បកម្ម កសិ-ពាណិជ្ជកម្ម ឬកសិ-ទេសចរណ៍ជាដើម ដើម្បីអាចបង្កើនចំណូលបន្ថែមពីការងារកសិកម្មនេះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
