សម្រាប់ដំណើរទស្សនកិច្ចនេះ លោកនាយករដ្ឋមន្ត្រីជប៉ុន នឹងជួបជាមួយនឹងប្រមុខមេដឹកនាំប្រទេសឥណ្ឌា និងកម្ពុជា ដើម្បីជជែកពិភាក្សាអំពីបញ្ហាសំខាន់ៗជាច្រើន ក្នុងនោះក៏មានលើកឡើងពីបញ្ហាសង្គ្រាមនៅអ៊ុយក្រែនផងដែរ។ នេះបើតាមការចុះផ្សាយសារព័ត៌មាន The Japan Times ។
ដំណើរទស្សនៈកិច្ចទៅកាន់ប្រទេសឥណ្ឌារបស់នាយករដ្ឋមន្ត្រីលោក Kishida គឺជាដំណើរលើកដំបូងទៅកាន់ប្រទេសអាស៊ីខាងត្បូង ក្នុងនាមជានាយករដ្ឋមន្ត្រីជប៉ុន។
ក្នុងអំឡុងពេលដំណើរទស្សនកិច្ចទៅកាន់ប្រទេសឥណ្ឌារដែលបានគ្រោងទុកនៅថ្ងៃទី ១៩ និង ២០ ខែមីនាខាងមុខនេះ លោក Kishida មានគោលបំណងជជែកពិភាក្សាជាមួយ នាយករដ្ឋមន្ត្រីឥណ្ឌាលោក Narendra Modi អំពីទំនាក់ទំនងក្នុងតំបន់ឥណ្ឌូប៉ាស៊ីហ្វិក សេរី និង បើកចំហ ក្នុងនាមជាសមាជិកនៃសម្ព័ន្ធមិត្ត Quad។ មេដឹកនាំទាំងពីរក៏អាចនឹងពិភាក្សាអំពីគម្រោងផ្លូវរថភ្លើងល្បឿនលឿនឥណ្ឌា ដែលប្រើប្រាស់បច្ចេកវិទ្យារថភ្លើង Shinkansen របស់ប្រទេសជប៉ុនផងដែរ។ ក្នុងនោះ លោក Kishida ក៏គ្រោងលើកឡើងអំពីបញ្ហាការឈ្លានពានរបស់រុស្ស៊ីលើអ៊ុយក្រែន ជាមួយ នាយករដ្ឋមន្ត្រី ឥណ្ឌា ផងដែរ។
គួរជម្រាបថា ឥណ្ឌា ដែលត្រូវបានគេដឹងថា មានការពឹងផ្អែកលើសព្វាវុធរុស្ស៊ីនោះ បានបោះឆ្នោតអនុវាទលើដំណោះស្រាយរបស់ក្រុមប្រឹក្សាសន្តិសុខអង្គការសហប្រជាជាតិ ដឹកនាំដោយសហរដ្ឋអាមេរិក ក្នុងការថ្កោលទោសការឈ្លានពានរបស់រុស្ស៊ីលើអ៊ុយក្រែន។ ដំណើរទស្សនកិច្ចរបស់លោក នាយករដ្ឋមន្ត្រីជប៉ុនក៏ត្រូវបានគេមើលឃើញថា ជាគោលបំណងធំរបស់លោក គឺទាក់ទងនឹងការពិភាក្សាអំពីការវិវឌ្ឍចុងក្រោយនៃវិបត្តិនៅអ៊ុយក្រែន។
ទោះបីជាយ៉ាងនេះក្តី ជប៉ុន និងឥណ្ឌាកំពុងធ្វើការជាមួយសមាជិកចតុភាគី ពីរផ្សេងទៀត គឺ សហរដ្ឋអាមេរិក និងអូស្ត្រាលី ដើម្បីលើកកម្ពស់កិច្ចសហប្រតិបត្តិការសន្តិសុខ ចំពេលមានការកើនឡើងនៃឥទ្ធិពលរបស់ចិននៅក្នុងតំបន់ឥណ្ឌូប៉ាស៊ីហ្វិក។ ប្រទេសទាំងពីរក៏នឹងប្រារព្ធខួបលើកទី ៧០ នៃការបង្កើតទំនាក់ទំនងការទូតនៅឆ្នាំនេះផងដែរ។
បន្ទាប់ពីបំពេញទស្សនកិច្ចនៅឥណ្ឌា២ថ្ងៃរួច លោក Fumio Kishida នាយករដ្ឋមន្ត្រីជប៉ុន ក៏នឹងបន្ដដំណើរបំពេញទស្សនកិច្ចនៅកម្ពុជា ដែលត្រូវបានរៀបចំឡើងនៅថ្ងៃទី ២០ និង ២១ ខែមីនា លោក Kishida នឹងស្នើសុំក្នុងជំនួបជាមួយសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ដើម្បីសម្តែងនូវការការពេញចិត្ត ដែលប្រទេសកម្ពុជាបានគាំទ្រទាំងស្រុង ចំពោះអធិបតេយ្យភាព និងបូរណភាពទឹកដីរបស់ប្រទេសអ៊ុយក្រែន ស្របពេលដែលកម្ពុជាកាន់តំណែងជាប្រធានប្តូរវេនអាស៊ាននៅឆ្នាំ២០២២នេះផងដែរ៕
(អត្ថបទប្រែសម្រួលដោយ កញ្ញា វ៉ាន់ ស្រីរ័ត្ន)
