ការនាំចេញរបស់ប្រទេសម៉ាឡេស៊ីបានកើនឡើង ៣៩% នៅក្នុងខែមិថុនា គឺឡើងដល់កំណត់ត្រាប្រចាំខែប្រហែលជិត៣៣ ពាន់លានដុល្លារ។ នេះបើយោងតាមតួលេខចុងក្រោយរបស់រដ្ឋាភិបាលម៉ាឡេស៊ី។
ការនាំចេញថាមពលមានសន្ទុះខ្លាំង ដោយឧស្ម័នធម្មជាតិរាវបានកើនឡើង ១៥០% តាមតម្លៃគឺខ្ពស់ជាងឆ្នាំមុន និងប្រេងឆៅកើនឡើង ៨០% ចំណែកប្រេងដូង និងផលិតផលកសិកម្មពឹងផ្អែកលើប្រេងដូង ដែលជាប្រភេទទំនិញធំបំផុតទី៣បានកើនឡើង ៥២%។ ការលុកលុយរបស់រុស្ស៊ីលើអ៊ុយក្រែនបានបង្កឱ្យមានការកើនឡើងនូវតម្លៃសម្រាប់ផលិតផលនីមួយៗ និងកើនឡើងជាបន្តបន្ទាប់។
ការនាំចេញរបស់ប្រទេសឥណ្ឌូណេស៊ីបានកើនឡើង ៤១% ក្នុងខែមិថុនា គឺឡើងដល់២៦ ពាន់លានដុល្លារ។ ប្រទេសនាំចេញប្រេងដូងធំជាងគេក្នុងពិភពលោកមួយនេះ បានបន្ធូរបន្ថយការហាមឃាត់ការនាំចេញរបស់ខ្លួនលើទំនិញនេះ ដែលបានហាមឃាត់កាលពីខែមេសា ហើយឧស្សាហកម្មរ៉ែរបស់ឥណ្ឌូនេស៊ីបានបង្កើនការនាំចេញរបស់ខ្លួនទ្វេដងកាលពីខែមុនដោយបានបង្ហាញឲ្យឃើញថាប្រេងដូង និងថាមពលបានជំរុញឱ្យមានការកើនឡើងស្រដៀងទៅនឹងប្រទេសម៉ាឡេស៊ីអ៊ីចឹងដែរ។
អត្ថបទគួរអាន
ចំណែកប្រទេសថៃ ដែលជាប្រទេសនាំចេញផលិតផលកសិកម្មដ៏សំខាន់មួយឯណោះវិញបានរាយការណ៍កាលពីថ្ងៃពុធថា ការនាំចេញសរុបរបស់ខ្លួនបានកើនឡើង១២%កាលពីខែមិថុនា។ ផលិតផលកសិកម្មបានកើនឡើង ២៥% ដោយសារតម្រូវការសាកលបានកើនឡើង។ ដោយឡែក ប្រទេសសិង្ហបុរីវិញការនាំចេញអាហារបម្រុង ឬអាហារកែច្នៃបានធ្លាក់ចុះ ៤៨%នៅខែមិថុនា។
សម្រាប់កម្ពុជា ក៏សម្រេចបានកំណើននាំចេញខ្ពស់ដែរ ពោលគឺ នៅឆមាសទី១ ឆ្នាំ២០២២ កម្ពុជាសម្រេចបានការនាំចេញប្រមាណជាង១១ពាន់លានដុល្លារ កើន៣៤%ឯណោះ ខណៈដែលការនាំចូលវិញមានជាង១៥ពាន់លានដុល្លារ កើនប្រមាណ ១២%។ នេះបើតាមតួលេខ ពីអគ្គនាយកដ្ឋានគយ និងរដ្ឋាករកម្ពុជា។
យ៉ាងណាមិញ ប្រយោជន៍នៃការនាំចេញស្បៀងអាហារ និងឥន្ធនៈជាពិសេសបានអនុគ្រោះដល់សមាគមនៃប្រជាជាតិអាស៊ីអាគ្នេយ៍ ដែលមានសមាជិក១០ប្រទេស និងជំរុញកំណើនសេដ្ឋកិច្ចប្រកបដោយស្ថិរភាព។ ពាណិជ្ជកម្មក្នុងតំបន់ក៏ទទួលបានអត្ថប្រយោជន៍ផងដែរ ដោយសារការនាំចេញរបស់ម៉ាឡេស៊ីទៅកាន់សិង្ហបុរីក្នុងខែមិថុនាបានកើនឡើង៧១% និងនាំទៅឥណ្ឌូនេស៊ីមានកំណើន ៧៦%។
ទោះបីជាមានការព្រួយបារម្ភថា អតិផរណា និងការរឹតបន្តឹងរូបិយវត្ថុដោយធនាគារកណ្តាលនឹងបង្កឱ្យមានវិបត្តិសេដ្ឋកិច្ចសកលយ៉ាងណាក៏ដោយ ក៏ប៉ុន្តែសមាជិកអាស៊ានត្រូវបានគេមើលឃើញថា មានហានិភ័យទាបនៃការធ្លាក់ចុះសេដ្ឋកិច្ច។
មូលនិធិរូបិយវត្ថុអន្តរជាតិ (IMF) បានព្យាករណ៍កាលពីថ្ងៃអង្គារថា សេដ្ឋកិច្ចប្រទេសអាស៊ានធំៗចំនួន៥រួមគ្នានឹងមានកំណើន ៥,៣%នៅឆ្នាំនេះ ដែលគ្មានការផ្លាស់ប្ដូរពីការប៉ាន់ប្រមាណដែលបានចេញផ្សាយកាលពីខែមេសានោះឡើយ។ ប៉ុន្តែមូលនិធិ IMF បានបន្ទាបទស្សនវិស័យកំណើនពិភពលោកមកនៅត្រឹម ៣,២%។ ការប៉ាន់ប្រមាណកំណើនត្រូវបានកាត់បន្ថយសម្រាប់សហរដ្ឋអាមេរិក ប្រទេសចិន និងប្រទេសដែលមានសេដ្ឋកិច្ចធំៗផ្សេងទៀត ប៉ុន្ដែសម្រាប់ប្រទេសនៅតំបន់អាស៊ីអាគ្នេយ៍ IMF មើលឃើញថា គឺមានសេដ្ឋកិច្ចងើបឡើងវិញយ៉ាងឆាប់រហ័ស។
ធនាគារអភិវឌ្ឍន៍អាស៊ីកាលពីសប្តាហ៍មុនបានកែលម្អទស្សនវិស័យកំណើនឆ្នាំ ២០២២ របស់ខ្លួនសម្រាប់តំបន់អាស៊ីអាគ្នេយ៍រហូតដល់ ៥% ពោលគឺបានបង្កើនការព្យាករណ៍កាលពីខែមេសាដែលមានត្រឹមតែ ៤,៩%៕
