អ្នកស្រី Rachada Dhanadirek អនុប្រធានអ្នកនាំពាក្យរាជរដ្ឋាភិបាលថៃ បាននិយាយនៅថ្ងៃអង្គារម្សិលមិញនេះថា ប្រាក់កម្ចីនេះ គឺជាផ្នែកមួយនៃគំនិតផ្ដួចផ្ដើមរបស់ថៃដើម្បីពង្រឹងទំនាក់ទំនងជាមួយប្រទេសជិតខាង។
អ្នកស្រី Rachada បន្ថែមថា ភ្នាក់ងារកិច្ចសហប្រតិបត្តិការ អភិវឌ្ឍន៍សេដ្ឋកិច្ចប្រទេសជិតខាង (NCEDC) របស់ថៃ នឹងរៀបចំ និងពង្រីកប្រាក់កម្ចីបន្ថែម ទៅកាន់ប្រទេសមីយ៉ាន់ម៉ា។ ប្រាក់ទាំងនោះ នឹងត្រូវប្រើប្រាស់លើគោលដៅ សាងសង់ និងធ្វើឲ្យប្រសើរឡើងនៃបណ្ដាញអគ្គិសនី និងប្រព័ន្ធបញ្ជូនអគ្គិសនីនៅក្នុងទីក្រុងយ៉ាំងហ្គនប្រទេសមីយ៉ាន់ម៉ា។
អត្ថបទទាក់ទង!
ប្រភពពីរាជរដ្ឋាភិបាលថៃ បានបញ្ជាក់ថា ក្នុងចំណោមកម្ចីប្រមាណ៤៦លានដុល្លារអាមេរិកនោះ គឺមានប្រមាណពាក់កណ្ដាល នឹងបានមកពីកញ្ចប់ថវិកាប្រចាំឆ្នាំសម្រាប់ឆ្នាំសារពើរពន្ធ ២០២១-២០២៣ និងថវិកាដែលនៅសល់ផ្សេងទៀត គឺបានខ្ចីពីស្ថាប័នហិរញ្ញវត្ថុក្នុងស្រុក ដែលមានរយៈពេលកម្ចី៥ឆ្នាំ។ អ្នកនាំពាក្យរាជរដ្ឋាភិបាលបន្ថែមថា ការដេញថ្លៃសម្រាប់ការខ្ចីក្នុងស្រុក នឹងត្រូវបានធ្វើឡើងសម្រាប់ស្ថាប័នដែលអាចពង្រីកការផ្ដល់ជូនដ៏ល្អបំផុត។
ការផ្ដល់ប្រាក់កម្ចីទៅឲ្យប្រទេសមីយ៉ាន់ម៉ានេះ គឺមានអត្រាការប្រាក់ ១,៥% ក្នុងមួយឆ្នាំ ដោយមានរយៈពេលសង៣០ឆ្នាំ និងមានការអនុគ្រោះមិនផាកពិន័យចំពោះការសងយឺតយ៉ាវរយៈពេល១០ឆ្នាំ។
ក្រោមកិច្ចព្រមព្រៀងនៃប្រាក់កម្ចីនេះ ៥០% នៃទំនិញ និងសេវាកម្ម នៅក្នុងគម្រោងបណ្ដាញថាមពលអគ្គិសនីត្រូវតែយកពីប្រទេសថៃ។ បន្ថែមពីនេះ ប្រទេសមីយ៉ាន់ម៉ា ត្រូវតែមានបញ្ចូលឈ្មោះក្រុមហ៊ុនអ្នកម៉ៅការសាងសង់របស់ថៃ និងវិស្វករប្រឹក្សាយោបល់របស់ថៃ ទៅក្នុងគម្រោងផងដែរ ខណៈដែលច្បាប់គ្រប់គ្រងកិច្ចព្រមព្រៀងប្រាក់កម្ចីនេះ ត្រូវតែចេញដោយប្រទេសថៃ។
អ្នកនាំពាក្យរាជរដ្ឋាភិបាលថៃ បញ្ជាក់ថា «ការផ្ដល់ជំនួយហិរញ្ញវត្ថុដល់មីយ៉ាន់ម៉ា គឺធ្វើឡើងស្របទៅនឹងយុទ្ធសាស្ត្រពង្រឹងទំនាក់ទំនងជាមួយប្រទេសជិតខាង។ វាក៏ជួយគាំទ្រដល់ផលិតកម្មទំនិញ និងសេវាកម្ម របស់សហគ្រិនថៃ និងការជំរុញបង្កើតការងារក្នុងប្រទេសថៃផងដែរ»។
លើសពីនេះទៅទៀត កិច្ចព្រមព្រៀងផ្ដល់កម្ចីនេះ នឹងជួយទាក់ទាញវិនិយោគថៃ ទៅកាន់ប្រទេសមីយ៉ាន់ម៉ាកាន់តែច្រើនផងដែរ។
ប្រទេសថៃ បច្ចុប្បន្ននេះ គឺជាវិនិយោគិនធំបំផុតទី៣ របស់ប្រទេសមីយ៉ាន់ម៉ា បន្ទាប់ពីសិង្ហបុរី និងប្រទេសចិន៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
